1. UJesu wathini kubagoli benhlanzi abane futhi benzani?

UPHETRO lo-Andreya loJakhobe loJohane babelebhizimusi yokugola inhlanzi. Kumele ukuthi bamangala besizwa uJesu esithi: “Ngilandelani, ngizalenza libe ngabagoli babantu.” * Manje benzani? IBhayibhili lithi: “Bahle batshiya amambule abo bamlandela.” (Mat. 4:18-22) Impilo yabo yatshintsha kusukela ngalesosikhathi. Babezatshiya umsebenzi wokugola inhlanzi baqalise ‘ukugola abantu bephila.’ (Luk. 5:10) Lamuhla uJesu ubiza abantu abathobekileyo futhi abathanda iqiniso ukuthi benze umsebenzi lo. (Mat. 28:19, 20) Wena usuqalisile yini ukwenza umsebenzi wokugola abantu?

2. Ngubani okumele azimisele ukuba ngumgoli wabantu njalo kuyini okuzamnceda ukuthi enze isinqumo lesi?

² Mhlawumbe kunengi osukufundile eBhayibhilini njalo usutshintshile ukuphila kwakho. Khathesi sekumele ukhethe ukuthi uzaba ngummemezeli wezindaba ezinhle yini. Ungadani nxa kuyikuthi uyesaba ukuba ngumgoli wabantu. Engxenye okwenza wesabe yikuthi uyakwazi ukuthi lesi yisinqumo esiqakatheke kakhulu. IBhayibhili liyatsho sibili ukuthi uPhetro labangane bakhe bahle batshiya amambule abo. Kodwa lokhu akutsho ukuthi benza isinqumo lesi bengazange bacabange. Kwasekwedlule izinyanga ezingaphezu kweziyisithupha bemazi uJesu njalo bekholwa ukuthi unguMesiya. (Joh. 1:35- 42) Lawe ungabe usufunde okunengi ngoJehova loJesu futhi usufuna ukuqhubeka usondela kuJehova. Kodwa kumele uqale ucabangisise ungakakhethi ukuba ngummemezeli. Kuyini okwanceda uPhetro lo-Andreya kanye labanye ukuthi bakhethe ukuba ngabagoli babantu?

3. Kuyini okuzakunceda ukuthi ube lesifiso esikhulu sokwenza umsebenzi wokugola abantu?

³ Abafundi bakaJesu bokuqala babewuthanda umsebenzi wabo wokugola inhlanzi, bewazi, belesibindi njalo besebenza ngamandla abo wonke. Lokhu yikho okwenza baphumelela emsebenzini wokugola abantu. Esihlokweni lesi sizaxoxa ngokuthi ungabalingisela njani abafundi ukuze lawe uphumelele emsebenzini wokugola abantu.

4. Kuyini okwakusenza uPhetro agole inhlanzi?

⁴ Okwakusenza uPhetro agole inhlanzi ayisikho ukuthi wayefuna ukunakekela imuli yakhe kuphela kodwa kukhanya wayevele ewuthanda umsebenzi lo. (Joh. 21:3, 9-15) Wawuthanda lomsebenzi wokugola abantu futhi uJehova wamncedisa ukuthi awenze kuhle.—ImiSeb. 2:14, 41.

5. Ngokwalokho okutshiwo kuLukha 5:8-11, kungani uPhetro wayesesaba njalo kuyini okungasinceda nxa lathi sisesaba?

⁵ Isizatho esiqakatheke kulazo zonke esenza sitshumayele yikuthi siyamthanda uJehova. Nxa simthanda sizatshela abanye ngaye lanxa sicabanga ukuthi ngeke siwenze kuhle umsebenzi lo. UJesu wathi ebiza uPhetro ukuthi abe ngumgoli wabantu wamtshela wathi: “Yekela ukwesaba.” (Bala uLukha 5:8-11.) Ayisikho ukuthi uPhetro wayesesaba lokho okwakungenzakala nxa engaba ngumfundi kodwa wayeyethuswe yisimanga esasenziwe nguJesu sokuthi bagole inhlanzi ezinengi. Lokhu kwenza uPhetro wazibona engafanelanga ukuthi asebenze loJesu. Kungenzakala lawe uyesaba njengoPhetro.  Mhlawumbe ukhathazekile ngokuthi kawusoze wenelise ukwenza konke okumele ukwenze ukuze ube ngumfundi kaKhristu. Nxa kunjalo, zimisele ukumthanda kakhulu uJehova loJesu kanye lomakhelwane. Lokhu kuzakwenza uwuthande umsebenzi wokugola abantu.—Mat. 22:37, 39; Joh. 14:15.

6. Yiziphi ezinye izizatho ezenza sikuthande ukutshumayela?

⁶ Nanzi ezinye izizatho ezenza sikuthande ukutshumayela. Sifuna ukulalela umlayo kaJesu othi: ‘Hambani liyekwenza abantu babe ngabafundi.’ (Mat. 28:19, 20) Kanti njalo abantu ‘bahlukuluzekile futhi balahlelwe iganga’ njalo bayakudinga sibili ukufundiswa iqiniso ngoMbuso. (Mat. 9:36) UJehova ufuna yonke imihlobo yabantu ithole ulwazi oluqondileyo lweqiniso njalo isindiswe.—1 Tim. 2:4.

7. URoma 10:13-15 utshengisa njani ukuthi umsebenzi wokutshumayela uqakathekile?

⁷ Ukukhumbula ukuthi umsebenzi wokutshumayela usindisa abantu ngokunye okuzakwenza siwenze umsebenzi lo. Umuntu ogola inhlanzi uyazithengisa kumbe azidle kodwa thina sigola abantu ukuze sibasindise.—Bala uRoma 10:13-15; 1 Tim. 4:16.

8-9. Kuyini umgoli wenhlanzi okumele abekwazi njalo kungani?

⁸ Ngesikhathi sikaJesu, umgoli wenhlanzi ongum-Israyeli kwakumele abekwazi ukuthi yiwuphi umhlobo wenhlanzi ayengawubamba. (Levi. 11:9-12) Kwakumele abekwazi lokuthi inhlanzi zitholakala ngaphi. Inhlanzi zijayele ukuhlala endaweni elamanzi eziwathandayo lokudla okunengi. Kulendaba yini ukuthi umgoli wenhlanzi uhamba sikhathi bani esiyazibamba? Ye. Omunye umnali ohlala esihlengeni esisePacific wafunda ukuthi kulesikhathi esithile sokubamba inhlanzi. Omunye umzalwane wakuleyondawo wamcela ukuthi bahambe bonke ukuyagola inhlanzi. Umnali wathi kuye: “Kasihlangane ngo-9 kusasa ekuseni.” Umzalwane wamphendula wathi: “Hatshi, akwenziwa njalo. Kasihambi ngesikhathi esisifunayo thina kodwa sihamba ngesikhathi esifanele ukugola inhlanzi.”

⁹ Labagoli babantu ngesikhathi sabaphostoli babesiya endaweni lapho abantu ababetholakala khona langesikhathi ababengatholakala ngaso. Ngokwesibonelo, abalandeli bakaJesu babetshumayela ethempelini lasemasinagogeni, endlini ngendlu lasemamakethe. (ImiSeb. 5:42; 17:17; 18:4) Lathi kumele sazi ukuthi abantu esibatshumayezayo batholakala nini emizini yabo loba kwezinye indawo. Kumele sizimisele ukutshintsha inhlelo zethu ukuze sitshumayeze abantu lapho abakhona langesikhathi abangatholakala ngaso.—1 Khor. 9:19-23.

10. Inhlanganiso kaJehova isinikeni?

¹⁰ Umgoli wenhlanzi kumele abe lezinto eziyizo zokubamba inhlanzi njalo abekwazi ukuzisebenzisa. Lathi kumele sibe lezinto eziyizo zokutshumayela futhi sibekwazi ukuzisebenzisa. UJesu watshela abafundi bakhe ukuthi bazitshumayele njani izindaba ezinhle. Wabatshela ukuthi kuyini okwakungamelanga bakuthwale, ukuthi batshumayele ngaphi njalo batshumayele besithini. (Mat. 10:5-7; Luk. 10:1-11) Lamuhla inhlanganiso kaJehova isinike iBhokisi Elilamathuluzi Okufundisa elilezinto ezisinceda ukuthi sitshumayele. * Iphinda isifundise ukuthi sizisebenzise njani lezozinto. Lokhu kusinceda ukuthi sibe lesibindi ekutshumayeleni njalo sibe zingcitshi ekufundiseni abanye.—2 Tim. 2:15.

11. Kungani kumele abagoli babantu babe lesibindi?

¹¹ Abantu abalebhizimusi yokugola inhlanzi kumele babe lesibindi. Kwesinye isikhathi ulwandle luyaphongujikisa. Bajayele ukusebenza ebusuku njalo elwandle kungaba lesiphepho loba nini. Abagoli babantu labo kumele babe lesibindi. Nxa sisanda kuqalisa ukuphuma ekutshumayeleni futhi sitshela abanye ukuthi singoFakazi bakaJehova, singaphikiswa ngabemuli, sihlekwe ngabangane bethu njalo abanye bangangawulaleli umlayezo esiwutshumayelayo. Kodwa lokhu akusimangalisi ngoba uJesu waxwayisa abalandeli bakhe ukuthi wayezabathuma ukuthi bayetshumayela ebantwini ababezabaphikisa.—Mat. 10:16.

12. Ngokwalokho okutshiwo kuJoshuwa 1:7-9, kuyini okungasinceda ukuthi sibe lesibindi?

¹² Ungenzani ukuze ube lesibindi? Okokuqala, kumele ukholwe ukuthi uJesu ulokhu ewuqondisa umsebenzi wokutshumayela esezulwini. (Joh. 16:33; Isam. 14:14-16) Okwesibili, woba lokholo oluqinileyo esithembisweni sikaJehova sokuthi uzakunakekela. (Mat. 6:32-34) Nxa ukholo lwakho luqhubeka luqina uzaqhubeka usiba lesibindi. UPhetro labangane bakhe batshengisa ukuthi balokholo oluqinileyo ngesikhathi betshiya ibhizimusi yabo yokugola inhlanzi ukuze balandele uJesu. Lawe watshengisa ukuthi ulokholo oluqinileyo ngesikhathi utshela abangane bakho labangakini ukuthi usufunda iBhayibhili laboFakazi bakaJehova njalo usungena imihlangano  yabo. Kumele ukuthi kulotshintsho olukhulu osulwenzile empilweni yakho ukuze uphile ngendlela uJehova ayifunayo. Lalokhu kutshengisa ukuthi ulokholo kanye lesibindi. Nxa ungaqhubeka utshengisa ukuthi ulesibindi kawusoze uthandabuze ukuthi “uJehova uNkulunkulu wakho uzakuba lawe loba kungaphi lapho oya khona.”—Bala uJoshuwa 1:7-9.

13. Ukuthandaza lokucabangisisa kungakunceda njani ukuthi ube lesibindi?

¹³ Kuyini okunye okungasinceda ukuthi sibe lesibindi? Yikuthandaza sisicela kuJehova. (ImiSeb. 4:29, 31) UJehova uzayiphendula imithandazo yakho, njalo kasoze akutshiye loba sekutheni. Uzahlala ekusekela. Okunye okungakunceda yikucabangisisa ngendlela uJehova ayesindisa ngayo abantu bakhe kudala. Cabanga langendlela uJehova akuncedisa ngayo usebunzimeni lakunika ngayo amandla okuthi utshintshe indlela owawuphila ngayo. Akuthandabuzwa ukuthi lowo owakhokhela abantu bakhe bedabula phakathi koLwandle Olubomvu angakuncedisa ukuthi ube ngumfundi kaKhristu. (Eks. 14:13) Lawe ungaba lokholo oluqinileyo njengomhubi owathi: “UJehova ulami, angiyikwesaba. Umuntu angenzani kimi na?”—Hubo. 118:6.

14. Ufundani kulokho okwenzakala kuMasae loTomoyo?

¹⁴ Okunye okungasinceda ukuthi sibe lesibindi yikufunda ngendlela uJehova ancedise ngayo abantu abalenhloni ukuthi babelaso. Asixoxeni ngodade okuthiwa nguMasae. Wayelenhloni futhi wayecabanga ukuthi kasoze enelise ukutshumayela. Wayekubona kungumqanso ukukhuluma labantu angabaziyo. Yikho wazimisela ukuthi amthande kakhulu uNkulunkulu labomakhelwane bakhe. Wacabangisisa ngokuthi kuqakatheke ngani ukuthi sitshumayele khathesi njengoba siphila ensukwini zokucina wasekhuleka ecela ukuthi awuthande kakhulu umsebenzi lo. Walwisana lokwesaba futhi useke waba liphayona lesikhathi sonke. UJehova angancedisa lalabo abasanda kuba ngabamemezeli ukuthi babelesibindi. Cabanga ngalokho okwenzakala kudade okuthiwa nguTomoyo. Wathi eqalisa ukutshumayela endlini ngendlu umninimuzi wokuqala wamtshingela wathi: “Angifuni kukhuluma laboFakazi bakaJehova,” wasetshayelela isivalo. UTomoyo kazange esabe, kodwa watshela ayehamba laye wathi: “Umzwile ukuthi utheni? Angikhulumanga lutho, kodwa uhle wabona ukuthi nginguFakazi kaJehova. Sengithabe!” Khathesi uTomoyo uliphayona lesikhathi sonke.

15. Singabalingisela njani abagoli benhlanzi njalo kungani lokho kuqakathekile?

¹⁵ Abagoli benhlanzi abaphumelelayo benza konke okusemandleni abo ukuthi benze lokho okumele kwenziwe. Ngokwesibonelo, kumele bavuke kusesele, basebenze umsebenzi uze uphele njalo baqhubeke besebenza lanxa umkhathi umubi. Lathi singasebenza ngamandla ethu wonke sizenelisa ukuqinisela emsebenzini esiwenzayo futhi siwuqede.—Mat. 10:22.

16. Kuyini okungasinceda ukuthi senze izinto okungabe kunzima ukuthi sizenze?

¹⁶ Sijayele ukufuna ukwenza izinto ngendlela elula. Kodwa kwezinye izikhathi ukwenza izinto eziqakathekileyo akulula, yikho kuyabe kumele sifunde ukuzibamba. Sidinga uncedo ukuze sizifundise ukwenza izinto okungabe kunzima ukuthi sizenze. UJehova uyasincedisa esebenzisa umoya wakhe ongcwele.—Gal. 5:22, 23.

17. Ngokwalokho okutshiwo ku-1 Khorinte 9:25-27, umphostoli uPhawuli uthi kuyini okwakumele akwenze ukuze asebenze ngamandla wonke?

¹⁷ Umphostoli uPhawuli wayesebenza ngamandla akhe wonke. Kodwa wavuma ukuthi kwakumele awutshaye kakhulu umzimba  wakhe ukuze enze okuqondileyo. (Bala u-1 Khorinte 9:25-27.) Wakhuthaza abanye ukuthi basebenze ngamandla abo wonke lokuthi benze izinto zonke “ngendlela efaneleyo lehlelwe kuhle.” (1 Khor. 14:40) Kumele sisebenze nzima ukuze siqhubeke sikhonza uJehova futhi lokhu kugoqela ukuhlala sitshumayela njalo sifundisa abanye izindaba ezinhle.—ImiSeb. 2:46.

18. Kuyini okwenza uJehova asibone siphumelela emsebenzini wokutshumayela?

¹⁸ Umgoli wenhlanzi uyabe ephumelele nxa ebambe inhlanzi ezinengi. Kodwa ukuphumelela kwethu emsebenzini wokutshumayela akuyi ngokuthi sincedise abantu abangaki ukuthi babuye enhlanganisweni kaNkulunkulu. (Luk. 8:11-15) UJehova usibona siphumelela nxa siqinisela emsebenzini wokutshumayela izindaba ezinhle lowokufundisa abanye. Okwenza asibone njalo yikuthi siyabe simlalela futhi silalela leNdodana yakhe.—Mak. 13:10; ImiSeb. 5:28, 29.

19-20. Yisiphi isizatho esiqakathekileyo esenza sitshumayele khathesi?

¹⁹ Kwamanye amazwe ukugola inhlanzi kuvunyelwa ngenyanga ezithile kuphela. Emazweni lawo umgoli wenhlanzi usebenza ngamandla wonke nxa isikhathi sokugola sesisiyaphela. Lathi njengabagoli babantu kuqakatheke kakhulu ukuthi sitshumayele khathesi ngoba sekuseduze ukuthi umumo lo uphele. Sekusele isikhathi esincane kakhulu sokuthi sitshumayele izindaba ezinhle ezisindisa ukuphila. Ungalindeli ukuthi konke kukulungele empilweni yakho ukuze uqalise ukwenza umsebenzi lo oqakathekileyo.—UmTshu. 11:4.

²⁰ Zimisele ukuwuthanda umsebenzi wokutshumayela, ukufunda okunengi ngalokho iBhayibhili elikutshoyo, ukuba lesibindi kanye lokusebenza ngamandla wonke. Sebenza labagoli babantu abedlula 8 miliyoni. Ungenza njalo, uzathola ukuthokoza okuvela kuJehova. (Neh. 8:10) Zimisele ukwenza konke ongakwenza emsebenzini wokutshumayela futhi uqhubeke uwenza uJehova aze athi sekwanele. Esihlokweni esilandelayo sizaxoxa ngezinto ezintathu ezizasinceda ukuthi sizimisele ukuqhubeka sitshumayela izindaba ezinhle zoMbuso.