Nxa abantu bonke sebebuswa nguhulumende kaNkulunkulu osezulwini bazathokoza njalo bahlale ndawonye ngokuthula besenza imisebenzi abazayikholisa kakhulu. UNkulunkulu ubeke uJesu Khristu ukuthi abuse umhlaba. UJesu kafanani lababusi abanengi ngoba yena ulendaba labantu. Uzabusa ngendlela elothando njalo uzabe eyiNkosi elomusa lesihawu futhi eyahlulela kuhle.—U-Isaya 11:4.

Abantu bazabe bengasehlukaniswa yikuthi bavela kuliphi ilizwe kumbe ukuthi ngabawuphi umhlobo. Bonke bazabe sebemanyene. (ISambulo 7:9, 10) Bonke abantu emhlabeni bazabe bemthanda uNkulunkulu futhi bethandana njalo bazasebenza ndawonye ngokuthula ukuze bagcwalise inhloso kaNkulunkulu yokuthi banakekele umhlaba, ikhaya labo.—IHubo 115:16.

Ngesikhathi uMbuso kaNkulunkulu usubusa umhlaba, uMdali uzaqondisa ngokupheleleyo ezomkhathi ukuze zingabi yingozi ebantwini. (IHubo 24:1, 2) Ngesikhathi uJesu esemhlabeni watshengisa ukuthi uNkulunkulu wayemnike amandla amakhulu kanganani lapho ethulisa isiphepho esesabekayo kalula nje. (UMakho 4:39, 41) Nxa uKhristu esebusa kuyabe kungaselasizatho sokwesaba umonakalo wemvelo. UMbuso kaNkulunkulu uzakwenza ukuthi kube lokuthula okwakuvele kukhona phakathi kwabantu lezinyamazana, futhi abantu abasoze baphinde baphambanise umhlaba.—UHoseya 2:18.

Umuntu wonke uzabe eqine saka. Akulamuntu ozagula, aguge kumbe afe. (U-Isaya 35:5, 6) Abantu bazakholisa ukuphila emhlabeni omuhle lohlanzekileyo onjengesivande sase-Edeni lapho okwakuhlala khona imuli yokuqala. Emhlabeni omutsha, umhlabathi uzathela ukudla okunengi njalo ukudla kuzakuba yithaphutshiye, njengoba nje kwakunjalo e-Edeni. (UGenesisi 2:9) Wonke umuntu ePharadayisi uzakudla loba yini ayifunayo njengesizwe sikaNkulunkulu sakudala u-Israyeli.—ULevi 26:4, 5.

Nxa uhulumende kaNkulunkulu usubusa umhlaba wonke, bonke abantu bazakuba lokuthula futhi baphathane kuhle. Kuyabe kungaselazimpi, kungaselabantu abasebenzisa kubi amandla njalo abantu bayabe bengasathwali nzima ukuthola izinto abazidingayo. IBhayibhili lithi: “Umuntu wonke uzahlala ngaphansi kwesihlahla sakhe sevini langaphansi kwesihlahla sakhe somkhiwa, njalo kakho ozabenza besabe.”—UMikha 4:3, 4.

Imuli ngayinye izabe ilekhaya layo njalo kayisoze yesabe ukuthi kulomuntu ozayithathela lona. Kanti njalo yonke imisebenzi esizabe siyenza izabe isithokozisa. IBhayibhili lithi labo abazaphila emhlabeni omutsha “kabayikusebenzela ize.”—U-Isaya 65:21-23.

IBhayibhili lithi: “Umhlaba uzakuba usugcwele ulwazi lukaJehova.” (U-Isaya 11:9) Abantu abazabuswa nguMbuso kaNkulunkulu bazafunda ngenhlakanipho emangalisayo yoMdali wabo uJehova langezinto ezinhle azidalileyo. Abasoze basebenzise ulwazi lwabo ukuthi benze izikhali kumbe ukuthi balimaze abanye abantu. (U-Isaya 2:4) Kodwa bazafunda ukuhlalisana labanye ngokuthula lokuthi bawunakekele njani umhlaba.—IHubo 37:11.

UNkulunkulu wawenza ngesineke esikhulu umhlaba ukuze sikholise ukuphila kuwo usuku ngalunye. Ufuna abantu baphile kuwo kuze kube nini lanini. (IHubo 37:29; U-Isaya 45:18) “Uzakuginya kokuphela ukufa” ukuze agcwalise inhloso yakhe. (U-Isaya 25:8) IBhayibhili lithembisa lisithi: “Ukufa ngeke kusabakhona, loba ukulila loba ukukhala loba ubuhlungu, ngeke kusabakhona.” (ISambulo 21:4) UNkulunkulu uzanika labo azabasindisa nxa esetshabalalisa umumo lo omubi kanye lalabo azabavusa emhlabeni omutsha ithuba lokuthi baphile kuze kube nini lanini.—UJohane 5:28, 29; ImiSebenzi 24:15.

 Khathesi amamiliyoni abantu aselungiselela ukuphila ebuswa nguMbuso kaNkulunkulu osuseduze. Lanxa abantu laba belesono sebeqalisile ukuzama ukuba ngabantu uNkulunkulu afuna baphile emhlabeni omutsha. Bakwenza njani lokhu? Ngokufunda ngoJehova uNkulunkulu langalowo amthumayo uJesu Khristu.—UJohane 17:3.

Funda okunengi ngokuthi ungenzani ukuze usinde nxa ukuphela kufika njalo uphile emhlabeni omutsha osuseduze. Funda iBhayibhili mahala laboFakazi bakaJehova usebenzisa ibhuku elithi Ungathokoza Kuze Kube Nini Lanini!