Lokho Abezesayensi Abangakwaziyo

KHALISA

Kukhanya abezesayensi sebehlole konke okumayelana lamazulu lomhlaba esikwaziyo. Lanxa kunjalo, kuleminye imibuzo eqakathekileyo abalokhe bengenelisi ukuyiphendula.

Abezesayensi bayakwazi yini ukuthi amazulu lomhlaba kanye lokuphila kwaqalisa njani? Hatshi. Abanye bathi abezesayensi abahlola amazulu lomhlaba yibo abangasinika impendulo. Isikhwicamfundo esithiwa nguMarcelo Gleiser esiseDartmouth College sithi: “Kasenelisi ukuchasisa ukuthi amazulu lomhlaba kwavela ngaphi.”

Imagazini ethiwa yi-Science News layo ithi: “Kunzima ukuchasisa ukuthi ukuphila kwaqalisa njani emhlabeni ngoba amadwala lokunye ebesingahlola kukho okwenzakala umhlaba uqalisa ukuba khona sekwatshabalala.” Kokubili lokhu kwenza sibone ukuthi abesayensi kabakayitholi impendulo yombuzo othi: Amazulu lomhlaba kanye lokuphila kwaqalisa njani?

Engxenye usuzibuza ukuthi nxa umhlaba wadalwa, ngubani owawudalayo. Mhlawumbe engqondweni yakho kuhle kwafika eminye imibuzo enjengale: ‘Nxa kuyikuthi kuloMdali olothando futhi ohlakaniphileyo, kungani evumela ukuthi abantu bakhe bahlupheke? Kungani evumela ukuthi kube lamasonto amanengi kangaka afundisa izinto ezingahambelaniyo? Kungani evumela ukuthi labo abamkhonzayo benze izinto ezinengi ezimbi kangaka?’

Isayensi kayenelisi ukuphendula imibuzo le kodwa lokho akutsho ukuthi ngeke uzithole impendulo ezisuthisayo. Abantu abanengi bazitholile eBhayibhilini.

Nxa ufuna ukuzwa ukuthi kuyini okwenza abezesayensi asebefunde iBhayibhili bakholwa ukuthi kuloMdali, yana ku-jw.org ufike ubhale ukuthi “okutshiwo ngabanye mayelana lemvelaphi yempilo.”

Isayensi kanye lalokho okutshiwo liBhayibhili kwenza bangathandabuzi ukuthi kulomdali

UGeorgiy N. Koidan, isikhwicamfundo esihlola amakhemikhali

“Umsebenzi wami ngowokuhlanganisa amakhemikhali ukuze kucine kuphume ama-molecule. Kuyabe kumele uhlele kusaselesikhathi ukuthi uzakwenza njani, ngoba ungavele utshiye okukodwa kuphela, akulanto ephumayo. Umsebenzi wami unzima sibili, kodwa ulula nxa uqathaniswa lendlela ama-cell asebenza ngayo ukuze enze ama-molecule. Lokhu kwenza ngingathandabuzi ukuthi kuloNkulunkulu owazi okunengi kakhulu ngamakhemikhali ukwedlula thina.”

“Ngesikhathi ngibala iBhayibhili ngananzelela ukuthi kalifanani lamanye amabhuku. Elikutshoyo kulokhu kusebenza lalamuhla lanxa laqeda ukubhalwa eminyakeni engaba ngu- 2 000 eyadlulayo. Okukulo kuyanceda kakhulu nxa abantu belungisa izingxabano, kungaba semsebenzini, emulini kumbe emphakathini. Lokhu kwenza ngananzelela ukuthi amacebo la kawaveli emuntwini nje kuphela, kodwa avela kulowo ophakemeyo kulabantu.”

UYan-Der Hsuuw, ingcitshi ehlola ngokubumbeka komntwana esasesiswini sikanina

“Nxa umntwana esabunjwa esiswini, wonke ama-cell kumele abambisane ukuze amanye aguquke abe yimithambo, imisipha, amathambo, igazi lokunye okutshiyeneyo kuze kucine sokungumuntu opheleleyo. Silokhu singazwisisi ukuthi kwenzakala njani ukuthi ama-cell abumbeke kuze kucine sokungumntwana. Ngokubona kwami, kulomuntu ohlakaniphileyo owadala izinto eziphilayo.”

“Indlela iHubo 139:15, 16 elichasisa ngayo ukubunjwa komntwana esiswini sikanina ihambelana lalokho osekutholwe ngabesayensi. Umlobi weHubo leli wayengasoze abhale into eqonde kangaka engazange atshelwe nguMdali.”