Ukuthi ingqondo ikuhluza njani ukuthi okuhle yikuphi akwaziwa. IBhayibhili lalo alikutsho ukuthi lokhu kwenzakala njani kodwa elisitshela khona yikuthi uNkulunkulu wasidala silobuntu obufanana lobakhe yikho lathi sithanda okuhle. (UGenesisi 1:27; UmTshumayeli 3:11) Imizimba yethu wayibumba ngendlela emangalisayo. Ngenxa yalokho umhubi wasendulo wathi: “Ngiyakudumisa [Nkulunkulu] ngokuthi ngabunjwa ngesimanga esesabekayo.”—AmaHubo 139:14.

Inengi lamuhla lilombono ongaqondanga ngobuhle okubangelwa yilokho abakubona kuma-TV lakumamagazini. Ibhuku elithi Body Image elikhuluma ngokubukeka komzimba, nxa libika ngokuhlola okwenziwa emazweni ase-Europe lithi abanye “bacabanga ukuthi ukuma komzimba yikho okuqakatheke kakhulu njalo okungenza umuntu athokoze.” Umcabango onjalo wenza abantu bakhohlwe into eyisiqokoqela, inhliziyo.—1 USamuyeli 16:7.

Indaba yokuma komzimba ikhulunyelwa kakhulu kwabesifazane njalo isuka ihlanganiswe lendaba zemacansini. Umbiko we-American Psychological Association (APA) oka-2007 uthi “kuma-TV, ku-inthanethi, izingoma lakwezinye izindawo kukhuthazwa abesifazane ukuthi bakhange kwezemacansini.” IBhayibhili lisitshela ukuthi singayivumeli imikhuba enjalo futhi lisinika lezizatho ezinhle zokwenza lokhu.—KwabaseKholose 3:5, 6.

“Ubuhle benu kabungaveli ekuziceciseni kwangaphandle . . . , kodwa kumele bube ngobangaphakathi kwenu, ubuhle obungapheliyo bomoya omnene lothuleyo, oligugu elikhulu emehlweni kaNkulunkulu.”—1 UPhetro 3:3, 4.

Nxa kukhulunywa ngendaba yokubukeka abanye bathi, “Nxa umuhle zigqaje ngakho!” Ezindaweni lapho umcabango lo ojayeleke khona uthola abasakhulayo abangamankazana “sebefuna ukubukwa ngabantu ngendlela abakhangeleka ngayo,” kubika i-APA. Umcabango onjalo uyabalimaza abanye. Indaba le isiluhlupho  emphakathini lakwezempilakahle, i-APA ize ithi “lokhu kulempumela eminengi ebuhlungu.” Lokhu “kwenza umuntu angazithandi . . . , azeyise, kuphazamise indlela adla ngayo kanti njalo kumenza ahlale ekhathazekile.”

“Xotsha ukukhathazeka enhliziyweni yakho ulahlele kude izinhlupheko zomzimba wakho, ngoba ubutsha lamadlabuzane kuyize.”—UmTshumayeli 11:10.

IBhayibhili lithi ubuhle buhambelana lokwenza ‘okufaneleyo.’ (1 KuThimothi 2:9) Abathobekileyo kabatshoni becabanga ngobuhle babo loba bebukisa ngabo. Esikhundleni salokho bacabanga ngendlela okungaphatha ngayo abanye, lokhu kwenza ukuthi bahlonitshwe njalo bamukelwe nguNkulunkulu. (UMikha 6:8) Abanjalo bathola abangane beqiniso lalabo abangatshada labo abangakhangeli ukubukeka komzimba kuphela kodwa abafuna umtshado othokozisayo lozahlala isikhathi eside.

Kulezizatho ezinhle ezenza iBhayibhili lisikhuthaze ukuthi sikhangele ubuhle ‘bangaphakathi.’ (1 UPhetro 3:3, 4) Ubuhle bangaphakathi abuphelelwa yisikhathi kodwa buqhubeka busakheka. IZaga 16:31 zithi: “Izinwele ezimhlophe zingumqhele wobukhulu, zizuzwa ngempilo elungileyo.” Labo abavuma ukuqondiswa liBhayibhili kungelani lokuthi banganani bathola ukuthokoza ngenxa yobuhle obungapheliyo bangaphakathi, isithunzi lokusuthiseka.

“Ukubukeka kuyakhohlisa, lobuhle buyaphela; kodwa umfazi owesaba uJehova kadunyiswe.”—IZaga 31:30.