Emhlabeni wonke izigidi zabantu zinanza iKhisimusi ngenxa yezizathu ezehlukeneyo. Abanye bayabe befuna ukuzikholisela nje belabangane lezihlobo. Kanti njalo kwabanye yisikhathi sokucabangisisa ngoNkulunkulu kumbe ukusebenzisa isikhathi leso benceda abayanga kanye labaswelayo. Akuthandabuzwa ukuthi izenzo lezi zinhle kakhulu. Kodwa uhlupho yikuthi abantu abalizwisisi iqiniso eliphathelane lekhefu leli.

Okokuqala, abanengi abananza iKhisimusi bakholwa ukuthi bayabe bekhumbula ilanga lokuzalwa kukaJesu. Kodwa abezembali abanengi bayavumelana ukuthi ilanga lokuzalwa kwakhe kalaziwa. Ibhuku elithi The Christian Book of Why lithi “amaKhristu okuqala kazange azihluphe ngelanga lokuzalwa kukaJesu” ngoba ayefuna ukuthi “angazihlanganisi ngitsho lakancane lemikhuba yabahedeni.” Okunye esikunanzelelayo yikuthi iBhayibhili alikhulumi ngokuthi uJesu wananza ilanga lakhe lokuzalwa kumbe elomunye umuntu nje. Akwenzayo yena yikulaya abalandeli bakhe ukuthi bakhumbule ukufa kwakhe.​—ULukha 22:19.

Okwesibili, izifundiswa ezinengi ziyavuma ukuthi okunengi okwenziwa ngeKhisimusi kuvela emikhutsheni eyayisenziwa ngabangayisiwo maKhristu kanye leyabahedeni. Lokhu kugoqela uSanta Claus, kanye lokusebenzisa isihlahla seKhisimusi, ukuphanana izipho, ukutshisa amakhandlela, ukucecisa ngamaluba langamahlamvu kanye lokuhlabela. Ibhuku elithi The Externals of the Catholic Church lakhuluma ngemikhuba le lathi: “Nxa sinika abanye izipho ngeKhisimusi kumbe sisemukela ezivela kubo, sicecisa ngamaluba ezindlini zethu lasemansontweni, bangaki phakathi kwethu abakwaziyo ukuthi singabe sinanza imikhuba yabahedeni?”

Kodwa wena ungabe uzibuza ukuthi kambe kubi ngani ukwenza izinto lezi. Asikhangeleni umcijo wesithathu ozasinika impendulo. UNkulunkulu kafuni ukuthi sihlanganise imikhuba yabahedeni lokukhonza kweqiniso. Ko-Israyeli wasendulo uJehova uNkulunkulu wasebenzisa umphrofethi wakhe u-Amosi ukuthi atshele izinceku zakhe ezasezihlamuka amazwi la athi: “Ngiyayizonda, ngiyayeyisa imikhosi yokholo lwenu . . . Sukani lomsindo wezingoma zenu!”​—U-Amosi 5:21, 23.

Kungani uNkulunkulu wakhuluma amazwi ahlaba kangaka? Khangela okwasekusenziwa ngabantu basendulo ababengaphansi kombuso wako-Israyeli owawusenyakatho. UJerobhowami, inkosi yabo yokuqala, wabeka amathole egolide edolobheni laseDani laseBhetheli wasekhuthaza abantu ukuthi bakhonze wona kulokuthi bakhonze uJehova uNkulunkulu ethempelini elaliseJerusalema. Inkosi le yasungula lemikhosi ethile yasibeka abaphristi ukuthi bancede abantu ukuthi bayinanze.​—1 AmaKhosi 12:26-33.

Abako-Israyeli laba babezitshela ukuthi benza okuhle ngoba babesithi bakhonza uNkulunkulu njalo bayamthokozisa. Okwakhulunywa ngumphrofethi kaNkulunkulu u-Amosi kanye labanye abaphrofethi bakhe kutshengisa ngokucacileyo ukuthi imikhuba le yayingamthokozisi uNkulunkulu. Esebenzisa umphrofethi wakhe uMalaki, uNkulunkulu wathi: “Mina uJehova kangiguquki.” (UMalaki 3:6) Lokhu kutshengisa ukuthi kakuthandi ngitsho lakancane ukuthi abantu bananze iKhisimusi.

Abanengi sebayihlola imicijo esikhulume ngayo njalo sebakhetha ukuthi bengasayinanzi iKhisimusi. Bayathokoza kakhulu njalo bayasuthiseka ngoba loba ngasiphi isikhathi somnyaka bayathola isikhathi sokuba labangane lezihlobo zabo, njalo bancede abayanga labaswelayo.