“Nxa ukholwa ukuthi iBhayibhili lilizwi likaNkulunkulu eliya ebantwini, kutsho ukuthi uNkulunkulu ukhuluma lathi. . . . Nxa lokho okufundiswa esontweni yakho kusebenza empilweni yakho yonke, kutsho ukuthi ulimi olusetshenziswa [eBhayibhilini] kumele kube ngolusebenzisa nsuku zonke empilweni yakho.” La ngamazwi abhalwa yisifundiswa okuthiwa ngu-Alan S. Duthie ebhukwini laso okuthiwa yi-Bible Translations and How to Choose Between Them.

Abantu abathanda iLizwi likaNkulunkulu bayavumelana lamazwi esifundiswa lesi. Bakukholwa ngenhliziyo yonke ukuthi “yonke iMibhalo iphefumulelwe nguNkulunkulu futhi iyasiza ekufundiseni, lasekukhuzeni, lasekuqondiseni izinto kanye lasekulayeni ngokulunga.” (2 KuThimothi 3:16) IBhayibhili kalisibhuku lakudala nje kodwa “liyaphila njalo lilamandla” ngoba lisinika amacebo asitshengisa ukuthi singenzani nxa sisehlelwa zinhlupho zansuku zonke. (KumaHebheru 4:12) Kodwa ibhuku leli elingcwele kumele lilotshwe ngolimi olusetshenziswa nsuku zonke ukuze abantu abalibalayo balizwisise futhi benze elikutshoyo.

Abantu abathanda iLizwi likaNkulunkulu bayamukela ngazo zombili iNguqulo Yomhlaba Omutsha YeMibhalo YamaKhristu YesiGrikhi ehunyutshwe ngesiNdebele saseZimbabwe. OFakazi bakaJehova bethule iBhayibhili leli mhlaka 24 August 2018. Lihunyutshwe ngendlela eqondileyo langolimi olucacileyo oluzanceda abantu ababala isiNdebele ukuthi balizwisise ngcono iLizwi likaNkulunkulu. Kodwa ngubani owenze umsebenzi omkhulu kangaka?

Lanxa kuqala ukuba le-Nguqulo Yomhlaba Omutsha YeMibhalo YamaKhristu YesiGrikhi ehunyutshwe ngolimi lwesiNdebele, ibivele ikhona ngesiNgisi kusukela ngo-1950. Yethulwa ngalowomnyaka yiWatch Tower Bible and Tract Society. Inhlanganiso le isileminyaka idinda amaBhayibhili. INqabayokulinda ka-15 September 1950 yathi: “Amadoda akukhomithi yokuhumutsha athe afisa . . . ukuthi kungaziwa ukuthi yiwo enze umsebenzi lo njalo kawafuni ukuthi amabizo awo atshelwe abantu ngesikhathi esaphila loba esefile. Inguqulo le ihunyutshelwe ukuthi idumise ibizo likaNkulunkulu ophilayo futhi oweqiniso.”

INguqulo Yomhlaba Omutsha YeMibhalo Engcwele yesiNgisi eqalisela kuGenesisi isiya kuSambulo yethulwa ngo-1961. Lanxa kungazange kuvezwe ukuthi ngobani abahumutshi bayo, kasithandabuzi ukuthi babesebenza ngenhliziyo yonke futhi bezinikele kuNkulunkulu. Isandulelo se-Nguqulo Yomhlaba Omutsha YeMibhalo Engcwele eka-2013 sithi: “Umsebenzi wokuguqula kutsha iBhayibhili leli siwenze ngonanzelelo sikhumbula ukuthi lilomlayezo oqakatheke kakhulu lokuthi kufanele siwahloniphe kakhulu amazwi akulo. Silomlandu omkhulu wokuhumutsha umlayezo walo ngendlela eqondileyo. . . . Sizame ngamandla wonke ukunamathela kulokho okwakutshiwo yimibhalo yokuqala kodwa sikubeka ngamazwi acacileyo futhi alula ukuwabala.”

Sikhuluma nje, iNguqulo Yomhlaba Omutsha egcweleyo kumbe eyingxenye isitholakala ngezindimi ezingu XXX emhlabeni wonke. Sekudindwe amaBhayibhili la edlula XXXXXXX futhi abalwa ngabantu abanengi. Kuyini abakutholileyo?

UJesu wafundisa abafundi bakhe ukuthi bathandaze bathi: “Baba wethu osezulwini, kalingcweliswe ibizo lakho.” (UMathewu 6:9) EBhayibhilini ibizo likaNkulunkulu elithi Jehova litholakala okwezikhathi ezingaba ngu-7 000. (U-Eksodusi 3:15; IHubo 83:18) Kodwa ngokuya kwesikhathi amaJuda amanengi ayengasalisebenzisi ibizo likaNkulunkulu futhi umkhuba lo wacina ungena lasebandleni lamaKhristu ngemva kokufa kwabaphostoli bakaJesu. (ImiSebenzi 20:29, 30; 1 KuThimothi 4:1) Amadoda ayesebenza ukukopa iMibhalo YesiGrikhi aqalisa ukukhipha ibizo likaNkulunkulu elithi Jehova afaka ibala lesiGrikhi elitsho ukuthi “Nkulunkulu” lelinye elitsho ukuthi “Nkosi.”

IKhomithi Yokuhumutsha INguqulo Yomhlaba Omutsha ilibuyisele ibizo likaJehova eMibhalweni YamaKhristu YesiGrikhi. * Ibizo leli litholakala ka-237 eMibhalweni le. Abahumutshi kabazange bafake ibizo likaNkulunkulu loba ngaphi lapho abafuna khona, kodwa babeqala bachwayisise okuzwayo. Ngokwesibonelo, uLukha 4:18 ulamazwi athethwe ku-Isaya 61:1. EMibhalweni YesiHebheru yokuqala, ibizo likaJehova lalikhona evesini le eku-Isaya. Yikho kuLukha 4:18 iNguqulo Yomhlaba Omutsha ihunyutshwe kanje: “Umoya kaJehova uphezu kwami ngoba ungigcobile ukuze ngitshumayele izindaba ezinhle kubayanga.”

Ukubuyisela ibizo likaNkulunkulu kunceda ababalayo ukuthi benelise ukubona umehluko okhona phakathi kukaJehova uNkulunkulu leNdodana yakhe ezelwe yodwa, uJesu Khristu. Ngokwesibonelo, emaBhayibhilini amanengi uMathewu 22:44 uthi: “INkosi yathi eNkosini yami.” (King James Version) Pho ngubani okhuluma lomunye lapha? Ivesi le ilamazwi athethwe kuHubo 110:1 futhi eMibhalweni YesiHebheru yokuqala ibizo likaNkulunkulu likhona evesini le. Ngakho kuMathewu 22:44 iNguqulo Yomhlaba Omutsha yona ithi: “UJehova wathi eNkosini yami.” Kuqakatheke ngani ukwazi umehluko okhona phakathi kukaJehova uNkulunkulu leNdodana yakhe? (UMakho 13:32; UJohane 8:17, 18; 14:28) Kungenza sisindiswe. Yikho ImiSebenzi 2:21 isithi: “Wonke umuntu obiza ibizo likaJehova uzasindiswa.”

Abahumutshi basebenza nzima ukuze bahumutshe iMibhalo YesiGrikhi yokuqala ngendlela eqondileyo kodwa elula njalo elolimi oselusetshenziswa khathesi. Ngokwesibonelo, bawahumutshe ngonanzelelo amabala esiGrikhi ayisenzo. Lamuhla izindimi ezinengi zilamabala ayisenzo achaza ukuthi okukhulunywa ngakho kwenzakale ngenkathi edlulileyo, eyakhathesi loba ezayo. AwesiGrikhi wona atshengisa lokuthi isenzo ngesesikhatshana, ngesiphelileyo loba ngesiqhubekayo. Ngokwesibonelo, kuMathewu 6:33 ibala lesiGrikhi elitsho ukuthi “funa” liyisenzo esiqhubekayo. Yikho ukuze kucace lokho uJesu ayekutsho ivesi le ihunyutshwe kanje: “Ngakho qhubekani lifuna kuqala uMbuso kanye lokulunga kwakhe, kuzakuthi-ke zonke lezi ezinye izinto lazo liziphiwe.” UMathewu 7:7 laye uhunyutshwe kanje: “Qhubekani licela, lizaphiwa; qhubekani lidinga, lizathola; qhubekani liqoqoda, lizavulelwa.”​—KwabaseRoma 1:32; 6:2; KwabaseGalathiya 5:15.

Siyathokoza ukuthi sesileMibhalo YamaKhristu YesiGrikhi ngolimi lwesiNdebele saseZimbabwe. Kodwa kulesinye isipho esizasithola ngesikhathi esizayo. Sekuhlelwe ukuthi kuhunyutshwe lonke iBhayibhili ngesiNdebele. Pho lizabe lihunyutshwe ngendlela eqondileyo lecacileyo yini njengelesiNgisi?

Lizabe linjalo sibili ngoba umsebenzi wokuhumutsha iBhayibhili ukhangelwa liQula Elibusayo laboFakazi bakaJehova. IQula Elibusayo labona kungcono ukuthi umsebenzi wokuhumutsha iBhayibhili wenziwe liqembu hatshi ngumuntu oyedwa. (IZaga 11:14) Yikho kwabunjwa amaqembu okuhumutsha emazweni atshiyeneyo emhlabeni wonke. Kwabunjwa loHlangothi Olusekela Umsebenzi Wokuhumutsha ukuze luncedise amaqembu la futhi luphendule imibuzo yabahumutshi. Luyabaphathisa ukuze iNguqulo Yomhlaba Omutsha yolimi ngalunye ihambelane leyesiNgisi. Uhlangothi lolu lusemawofisini amakhulu aboFakazi bakaJehova. Kwaphinda kwasungulwa lohlelo lwamakhompiyutha oluthiwa yiWatchtower Translation System ukuze luncedise abahumutshi beBhayibhili. Uhlelo lolu lutshengisa abahumutshi ukuthi ibala ngalinye lesiHebheru lelesiGrikhi lihunyutshwe njani ngesiNgisi, besekubasiza ukuthi bakhethe kuhle amabala okumele bawasebenzise. Kodwa lokho akutsho ukuthi amakhompiyutha yiwo asehumutsha. Wona nje enza umsebenzi ube lula ngoba anceda abahumutshi ukuthi benelise ukuhumutsha iNguqulo Yomhlaba Omutsha ngendlela eqondileyo lecacileyo njengeyesiNgisi.

Siyakucela ukuthi uyihlolisise iNguqulo Yomhlaba Omutsha YeMibhalo YamaKhristu YesiGrikhi. OFakazi bakaJehova abahlala endaweni okuyo bangakuphathela yona nxa ufuna. Kanti njalo ungayibala ku-inthanethi kumbe ku-JW Library. Okuphakathi kuzakusiza kakhulu. Ngokwesibonelo, iBhayibhili leli libhalwe ngamabala akhanyayo okulula ukuwabala, njalo ekuqaliseni kwebhuku ngalinye kulengxenye ethi Okumunyethweyo ekutshengisa ukuthi ibhuku lelo lilani futhi ekunceda ukuthi wenelise ukuwathola masinyane amavesi owajayeleyo. Kulamabala angaphansi, leNgcazelo Yamabala AseBhayibhilini kanye loLuhlu Lwamabala AseBhayibhilini. Nxa usulibala iBhayibhili leli, ungasebenzisa le-Bhukwana Elisincedisa Ukufunda ILizwi LikaNkulunkulu elilamamephu kanye lokunye okungakunceda. Okunye ozakukholisa yikuthi iBhayibhili leli libhalwe wona kanye amazwi kaNkulunkulu ngolimi esilukhuluma nsuku zonke.

INgcazelo Yamabala: Lapha yikho esichasiselwa khona amabala asetshenziswe eBhayibhilini