Elizweni leCanada, ezindaweni lapho okulabantu abakhuluma isiFrench, inengi labantu abangakhulumiyo labangezwayo lisebenzisa uLimi lweZandla lweQuebec (lwaziwa ngokuthi yi-LSQ). * Abantu abasebenzisa ulimi lolu bangu-6 000. Lokhu kwenza amabhuku e-LSQ abe malutshwana kakhulu. Lanxa kunjalo oFakazi bakaJehova bazame ngamandla wonke ukuthi badinde amabhuku njalo bakhuphe lokunye okungasetshenziswa ngabantu abasebenzisa ulimi lolu ukuze babancede bazwisise iBhayibhili.

Indaba kaMarcel ingakusiza uzwisise ukuthi kungani kwenziwe imizamo le yokuhumutsha. Wazalwa ngo-1941 edolobheni leQuebec eCanada. Eleminyaka emibili wahlaselwa ngumkhuhlane okuthiwa yi-menengitis wahle wavaleka indlebe. Uthi: “Ngileminyaka engu-9 ngaqalisa ukungena isikolo soLimi Lwezandla futhi kulapho engafundela khona i-LSQ. Lanxa ayekhona sibili amabhuku amalutshwana ngolimi lolu, awaboFakazi wona ayengekho.”

Kungani kuqakathekile ukuba lamabhuku e-LSQ? UMarcel uphendula esithi: “Abantu abasebenzisa ulimi lwezandla bayafuna ukuthola ulwazi ngolimi abaluzwisisayo hatshi ukuthwala nzima ngolimi abangaluzwisisiyo. Ngabe amabhuku eLSQ awakho bekuzamele sithembele ezindimini ezikhulunywayo futhi lokhu bekuzakwenza sikhuthe okunengi.”

OFakazi bakaJehova bahumutsha ibhuku le-LSQ lakuqala ngo-2005 ukuze bancede abantu abasebenzisa ulimi lolu. Khathesi sekulewofisi yokuhumutsha eMontreal eQuebec. Kulabahumutshi abangu-7 abasenkonzweni yesikhathi sonke kanye labanye abedlula 12 abasebenza amalanga athile. Kulamaqembu amathathu okuhumutsha njalo asebenzisa amastudiyo amabili ukwenza amavidiyo e-LSQ.

Abantu abasebenzisa i-LSQ bayabonga kakhulu ngamabhuku enziwa ngoFakazi bakaJehova. UStéphan Jacques ongumqondisi wenhlanganiso ethiwa yi-des Sourds de l’Estrie * wathi: “Amabhuku abo enziwe kuhle kakhulu. Ulimi lwabo lwezandla lucacile sibili. Okunye okuhle yikuthi abantu abaphuma kumavidiyo abo bayabe begqoke kuhle.”

INqabayokulinda efundwa maviki wonke emihlanganweni yaboFakazi bakaJehova isikhona nge-LSQ. Isetshenziswa ngoFakazi bakaJehova abangu-220 kanye labanye abangena imihlangano le emabandleni angu-7 kanye lasemaqenjini asebenzisa i-LSQ eQuebec. * OFakazi benza lamavidiyo e-LSQ kanye lezingoma ezimnandi ezisekelwe eBhayibhilini.

UMarcel esikhulume ngaye ekuqaliseni uyathokoza kakhulu ngokuthi sekulamabhuku amanengi nge-LSQ. Uthanda kakhulu lawo enziwa ngoFakazi bakaJehova. Uthi: “Kuyisibusiso esikhulu ukubona amavidiyo amanengi e-LSQ ku-jw.org. Ngiyathaba kakhulu nxa ngibona izinto ezikhona ngolimi lwami!”