Ngesikhathi lesi somkhuhlane weCOVID-19, abafowethu labodadewethu bafunde izindlela ezintsha zokutshela abantu izindaba eziduduzayo eziseBhayibhilini. Esikhundleni sokutshumayela obala loba ukulanda abantu emizini yabo, bebetshumayela ikakhulu ngamafoni langezincwadi. a Abantu abanengi bayakukholisa ukutshunyayezwa ngezindlela lezi futhi kuyazicacela ukuthi uJehova uwubusisile umsebenzi lo. (IZaga 16:3, 4) Ngokwesibonelo, ake sixoxe ngokunye okwenzakala kwesinye isihlenge.

 Kungakabi lomkhuhlane weCOVID-19, uHelen wayehlala evakatshela omunye umama emcela ukuthi afunde laye iBhayibhili kodwa umama lo wayesala. Lanxa kunjalo, kuthe kuzavuka kuqalisa i-lockdown, uHelen wamnika iBhayibhili kanye lebhuku elithi IBhayibhili Lisifundisani? UHelen waphinda wamcela umama lo ukuthi afunde laye iBhayibhili wasemchasisela ukuthi babezafunda ngefoni. Umama lo wavuma ukufunda. Wasikholisa kakhulu isifundo sakhe okokuthi wacina esecela uHelen ukuthi bafunde nsuku zonke. Waqalisa lokungena imihlangano yethu yebandla ngefoni. Okuthokozisa kakhulu yikuthi usesebenzisa lokho akufundayo eBhayibhilini njalo usexoxela labanye.

 Kwelinye ibandla oFakazi babhalela amapholisa izincwadi ukuze bawatshumayeze njalo bawabonge ngomsebenzi omuhle awenzayo. Amapholisa amangala ethola izincwadi lezi, omunye wawo waze watshela umdala webandla okuthiwa nguJefferson wathi: “Ngangicabanga ukuthi oFakazi bakaJehova bayawazonda amapholisa.” UJefferson wamchasisela ukuthi oFakazi abawazondi amapholisa. Athaba amapholisa ngokuthola izincwadi ezikhuluma kuhle ngawo aze azinamathisela emnyango wenkamba yawo. Elinye ipholisa lathi: “Engxenye izincwadi lezi zizanceda labanye ukuthi babe lombono omuhle ngathi.”

 U-Edna lo-Ednalyn bangamaphayona esikhathi sonke. b Ngenxa yokuthi kabala inthanethi lapho abahlala khona, babengenelisi ukungena imihlangano yebandla ngefoni. Ngakho bafonela umakhelwane wabo ongasoFakazi bacela ukusebenzisa i-Wi-Fi yakhe besebembhadala okuyimadlana okuthile. Umama wakhona waba lomusa wabavumela ukuthi bayisebenzise mahala. U-Edna lo-Ednalyn bamnxusa ukuthi laye angene imihlangano wavuma. Khathesi umakhelwane lo lomntanakhe kanye labazukulu ababili sebefunda iBhayibhili njalo bayangena lemihlangano yaboFakazi.

 Abafowethu labodadewethu abasesihlengeni lesi banxusa omakhelwane babo lalabo abasebenza labo ukuthi balalele inkulumo kazulu wonke eyayizakhulunywa kusetshenziswa ezempucuko. U-Ellaine osebenza esibhedlela esikuleyondawo, waqalisa edonda ukunxusa asebenza labo. Wayecabanga ukuthi abanye odokotela kababathandi oFakazi. Lanxa kunjalo, wabathumela amameseji odokotela asebenza labo ebanxusa ngomusa. Ayebadondela kakhulu ukubanxusa ngeyinye indoda lomkayo ababengodokotela khonapho. Ngemva kokucabangisisa langokuthandaza ngakho, u-Ellaine wacina ebafakela labo imeseji yokubanxusa. Unkosikazi wakhona waphendula wathi: “Usufuna ngingene itshetshi yakho?” U-Ellaine wamtshela ukuthi umhlangano lo awungenwa ngoFakazi kuphela kodwa wonke nje umuntu ukhululekile ukuwungena. Ngelanga elilandelayo, u-Ellaine wamangala ebona udokotela lo lomkakhe bejoyina umhlangano ungakaqalisi! Uthi: “Umhlangano usasephakathi, unkosikazi wakhona wangifakela imeseji esithi: ‘Ngiyaqala ukungena umhlangano waboFakazi bakaJehova. Bekumnandi sibili. Ngikholisile. Ngiyabonga ngokunginxusa.’”

 U-Ellaine wanxusa odokotela abangu-20 njalo wathaba ngoba abangu-16 bakhona bawungena umhlangano lo. Wakhuluma amazwi atshiwo ngumphostoli uPhawuli wathi: “Kuyangithokozisa ukuthi ‘ngaqunga isibindi’ ngatshela engisebenza labo ‘izindaba ezinhle eziphathelane’ loNkulunkulu.”—1 KwabaseThesalonika 2:2.

 Isikhathi somkhuhlane weCOVID-19 besinzima ebantwini bonke. Kodwa abafowethu labodadewethu abahlala esihlengeni lesi lakwamanye amazwe benelisile ukuhlala bethokoza njalo bengakhathazeki kakhulu. Okubancedileyo yikuthi bebesenza okusemandleni abo ukuthi bancede abanye njalo babaduduze.—ImiSebenzi 20:35.