U-Ed lomkakhe uJennie baqalisa ukutshumayela ngefoni ngo-2010. a UJennie uthi: “Ngangingakukholisi ngitsho ukutshumayela ngefoni. Ngatshela umkami ngathi: ‘Angisoze ngikwenze futhi!’” U-Ed laye wayezizwa ngendlela efananayo. Uthi: “Ngangikuzonda ukufonelwa ngabantu abathengisayo yikho lami ngangibona angani ngiyabe ngihlupha abantu nxa ngizama ukubatshumayeza ngefoni.”

 Kwathi sekuqalise umkhuhlane we-Covid 19, oFakazi bakaJehova bama ukutshumayela endlini ngendlu. Lanxa kunjalo, baqhubeka bewulalela umthetho kaJesu wokutshumayela izindaba ezinhle. Babetshumayela besebenzisa izincwadi lamafoni. (UMathewu 24:14; 28:19, 20) Ngalesosikhathi imihlangano yebandla leyokuya ekutshumayeleni yayisenziwa ngezempucuko. Ngemva komunye waleyomihlangano u-Ed waphinda wazama ukutshumayela ngefoni lanxa kwakulokhe kunzima kuye. Wezwa njani engakafoneli umuntu wokuqala? Uthi: “Uvalo lwangitshaya lwangeqa ngaze ngathandaza. Ngemva kwalokho ngafona. Yikho engakhuluma khona loTyrone.” b

 UTyrone lomkakhe u-Edith bahlala emaphandleni eKentucky, e-U.S.A. UTyrone uleminyaka engu-83 njalo kasaboni kuhle. Lanxa kunjalo, wavuma ukufunda iBhayibhili lo-Ed. Babefunda besebenzisa ifoni futhi wayebala amabhuku ethu esebenzisa okuthile okukhulisa amabala (magnifying glass).

 Ngemva kwesikhathi esingaba yinyanga, uTyrone lo-Edith baqalisa ukungena imihlangano ebandleni elisendaweni abahlala kuyo. Njengoba bengela-inthanethi, babeyingena ngefoni. Kuyini okwenza u-Edith wafuna ukufunda iBhayibhili?

 Ngesikhathi befunda loTyrone, u-Ed loJennie babejayele ukuzwa u-Edith encedisa umkakhe ukuthola impendulo kanye lokuvula amavesi. Lanxa wayemncedisa, u-Edith yena wayengaphenduli loba abale ivesi. UJennie uthi: “Ilizwi lika-Edith lalizwakala ukuthi ngelomuntu odanileyo kodwa mina lomkami sasingakwazi ukuthi kuyini okwakumenza abe njalo.”

 Ngelinye ilanga uJennie wacabanga ukuthi akhulume lo-Edith. Kwathi kuvuleka ithuba wacela ifoni ku-Ed, wasesithi: “Tyrone ngiyamuzwa umkakho ekhulumela phansi ekuncedisa, ngicela nxa kuvuma ake asibalele ivesi kumbe atsho akucabangayo.”

 Ngemva kokuthula okwesikhatshana, u-Edith waphendula ngelizwi elipholileyo wathi: “Bengivele ngifuna ukukhuluma lawe. Lami ngingomunye waboFakazi kodwa sengileminyaka engu-40 ngingafezi inkonzo.”

 UJennie wamangala wasesithi: “Ungudadewethu!” Bobabili baqalisa ukukhala.

 Ngemva kwalokho u-Ed wahle wanika u-Edith ibhukwana elithi Buyela KuJehova. Emavikini alandelayo, u-Ed loJennie bananzelela ukuthi sekulotshintsho ku-Edith. U-Ed uthi: “Kuqala ilizwi lakhe lalizwakala ukuthi udanile kodwa khathesi kwasekuzwakala ukuthi wayesengcono sibili.” U-Edith wathuthuka kuhle kakhulu njalo khathesi uyathokoza ukuthi usengummemezeli wezindaba ezinhle. Umkakhe wabhabhathizwa waba nguFakazi kaJehova ngoJuly 2022.

 Nxa u-Ed ecabanga ngendlela ayekubona ngayo ukutshumayela ngefoni kuqala, engqondweni yakhe kuphinda kufike ingxoxo aba layo loTyrone. Ngemva kokumbalela uJohane 6:44, wamchasisela ukuthi uJehova nguye odonsela abantu eqinisweni. UTyrone wavumelana laye wasesithi: “Ngangivele ngilindele ifoni yenu.” UJennie laye uyathokoza ngokuthi yena lomkakhe baba lesibindi sokutshumayela ngefoni. Uthi: “UJehova uyasibusisa sibili nxa singazama ukumenzela okunengi.”