Obunye ubunzima osakhulayo angahlangana labo yikubona abazali bakhe bedivosa. Manje kuyini okungamnceda?

Okusesihlokweni lesi

•  Izinto ezintathu okungamelanga uzenze

•  Izinto ezintathu okumele uzenze

•  Zwana ukuthi abentanga yakho bathini

 Izinto ezintathu okungamelanga uzenze

 1. Ukuzisola

 “Umama wangitshela ukuthi yena lobaba baqalisa ukungazwanani ngemva kokuzalwa kwami. Lokhu kwangenza ngazitshela ukuthi yimi engabangela ukuthi abazali bami bacine bedivosa.”—UDiana.

 Hlala ukhumbula ukuthi: Ukudivosa kwabo akulani lawe. Okwenza badivose yikuthi abahlalisananga kuhle futhi ayisuwe olubangeleyo uhlupho lolo. Ngeke wenelise ukulungisa inhlupho zabo, bona yibo okumele bazilungise.

 2. Ungabambi isikhwili

 “Ngimzondele kakhulu ubaba ngenxa yokungathembeki kumama. Ngicabanga ukuthi kuzangithatha isikhathi ukuthi ngiphinde ngimthembe.”—URianna.

 Hlala ukhumbula ukuthi: Ungabe uzondile futhi udanile ngenxa yalokho okwenzakale kubazali bakho, futhi kuyazwisiseka. Kodwa ukuhlala uzondile kungakulimaza. Kungaphambanisa indlela ocabanga ngayo, ozizwa ngayo lempilakahle yakho. Yikho elinye ibhuku lathi ukubamba isikhwili kufanana lokunatha itshefu ubusizitshela ukuthi kuzalimala omunye umuntu. a

 3. Ungacabangi ukuthi lawe nxa ungatshada uzadivosa

 “Ngiyesaba ukuthi ngizakwenza njengobaba. Ngihlala ngizitshela ukuthi lami ngingatshada ngibe labantwana, ngizacina ngidivosile njengabazali bami.”—UJessica.

 Hlala ukhumbula ukuthi: Nxa abazali bakho sebedivosile, akutsho ukuthi lawe uzacina uyitshiyile imuli yakho. Kodwa lokhu okwenzakale ebazalini bakho kungakufundisa izifundo eziqakathekileyo. Ngokwesibonelo, kungakunceda ukuthi ukhethe kuhle umuntu ozatshada laye. Kungaphinda kukuncede ubone ubuntu okumele ubuthuthukise kumbe ube labo ukuze ube yindoda enhle kumbe umfazi omuhle.

 Izinto ezintathu okumele uzenze

 1. Ungafeli ngaphakathi. Abantu abajayele ukufihla indlela abazizwa ngayo bacina besenza imikhuba emibi enjengokudakwa lokusebenzisa kubi izidakamizwa. Ukuze ungacini usenza izinto lezi, zama okulandelayo:

 Xoxa labazali bakho. Nxa umzali wakho ehlala ekutshela ngenhlupho zabo kumbe efuna usekele yena, mchasisele kuhle ukuthi lokho kukwenza uzizwe njani. Nxa kunzima ukuthi ukhulume laye, ungabhala incwadi.

 Xoxa lomngane ongamthemba. Ukuba lomuntu ongaxoxa laye akulalele futhi akuzwisise kungakwenza uzizwe wethulwe umthwalo osindayo. IBhayibhili lithi: “Umngane oqotho ulothando ngazo zonke izikhathi, njalo ungumfowenu ozalelwe ukukusiza ngezikhathi zobunzima.”—IZaga 17:17.

 Khuluma loMdali wakho. UJehova uNkulunkulu “olalela imithandazo” uhlala ezimisele ukukulalela. (IHubo 65:2) IBhayibhili lithi ‘uphosele kuye konke okukukhathazayo ngoba yena ulendaba lawe.’—1 UPhetro 5:7.

•   Ngubani phakathi kwabazali bakho ongenelisa ukuxoxa laye ungazondanga futhi upholile?

•   Nguphi umngane ongamthemba kungaba ngoyintanga yakho kumbe osekhulile ongakunceda ukuthi uqinisele ebunzimeni lobu?

•   Kuyini ongafisa ukukutshela uJehova emithandazweni yakho?

 2. Vumelana lezimo

 Nxa abazali bakho bangadivosa kungenzeka ukuthi ucine utshintshe indawo ohlala kuyo, isikolo ohamba kuso labangane olabo. Kungenzeka lokuthi lemali eliphila ngayo iyabe isincane. Lokhu kungenza ukuthi uhlale udanile futhi ukhathazekile ngoba impilo iyabe ingasatsheleli njengakuqala. Kuyini okungakunceda ukuthi ulwamukele utshintsho lolu? Ungazihluphi ngosekudlulile, yamukela isimo osukuso.

•   Yiluphi utshintsho olukhulu osekumele ulwenze ngenxa yokuthi abazali bakho sebedivosile?

•   Kuyini ongakwenza ukuze ulwamukele utshintsho lolu?

 3. Nanzelela ubuntu obuhle olabo

 Lanxa kubuhlungu kakhulu ukubona abazali bakho bedivosa, kungakunceda ukuthi ubone ubuntu obuhle olabo. Kungaphinda kukuncede ukuthi ube lobunye ubuntu obungelabo. Abazali bakaJeremy badivosa eleminyaka engu-13. Uthi: “Ukudivosa kwabazali bami kwangenza ngabona ukuthi sekumele ngincedise umama lomnawami ngoba yimi engangimkhulu.”

•   Yibuphi ubuntu obuhle osulabo ngenxa yokudivosa kwabazali bakho?

•   Yibuphi ubuntu ofuna ukubuthuthukisa?