Okusesihlokweni lesi

•  Kutshoni ukuthandana lomunye umuntu?

•  Usukulungele yini ukuthandana lomunye umuntu?

 Abanye abantu bacabanga ukuthi izindaba zokukhomba lokukhombisana yikudlala nje. Kodwa “ukuthandana” esikhuluma ngakho esihlokweni lesi ngokwejaha lentombi abasafundana ukuze babone ukuthi bayafanelana yini ukuthi sebengatshada. Isikhathi lesi siqakathekile sibili, asosikhathi sokuphongukholisa ukuthandwa nje.

 Ngokuhamba kwesikhathi, abathandanayo laba kuyabe kumele benze isinqumo sokuthi bazatshada yini kumbe behlukane. Yikho nxa ungaqala ukuthandana lomuntu kumele ulindele ukuthi kungenzakala loba yikuphi kwalokhu.

 Okuqakathekileyo: Nxa ubona angani usukulungele ukuthandana lomunye umuntu kutsho ukuthi usukulungele lokutshada.

 Khumbula ukuthi nxa uthandana lomunye umuntu lingacina selitshadile, yikho kumele uzibuze ukuthi yibuphi ubuntu olabo obungenza ukuthi umtshado wenu uphumelele. Nanku ongacabanga ngakho:

•   Emulini. Indlela ophatha ngayo abangakini ikakhulu nxa ulezinto ezinengi ezikukhathazayo yiyo kanye indlela ozaphatha ngayo umuntu ozatshada laye.

   Isimiso esiseBhayibhilini: “Susani kini konke ukufukamela inzondo, lokuthukuthela, lolaka, lokuklabalala, lokuthethisa kanye lakho konke okulimazayo.”—Kwabase-Efesu 4:31.

   Zibuze: ‘Abangekhaya bayavuma yini ukuthi ngibaphatha kuhle lokuthi ngiyabahlonipha? Nxa kulalapho esingazwisisani khona, ngivuka ngolaka yini kumbe ngikhuluma labo ngomusa?’

•   Ukuqakathekisa okufunwa ngabanye. Nxa usutshadile kuzamele ucabange ngalokhu okufunwa ngomunye wakho ubusumenzela khona.

   Isimiso esiseBhayibhilini: “Umuntu ngamunye kangazifuneli okunceda yena kodwa kaqhubeke esenza okunceda abanye.”—1 KwabaseKhorinte 10:24.

   Zibuze: ‘Ngihlala ngifuna ukuthi izinto zenziwe ngendlela yami yini? Abanye bangibona ngingumuntu ozwisisayo yini? Ngitshengisa njani ukuthi ngiyakuqakathekisa okufunwa ngabanye?’

•   Ukuthobeka. Umuntu otshadileyo kumele azimisele ukuvuma amaphutha akhe futhi axolise ngenhliziyo yonke nxa ephambanisile.

   Isimiso esiseBhayibhilini: “Sonke siyaphambanisa izikhathi ezinengi.”—UJakhobe 3:2.

   Zibuze: ‘Ngiyawavuma yini amaphutha ami kumbe ngihlala ngicatsha ngomunwe? Ngiyaphangisa ukuzonda yini nxa abanye bengicebisa?’

•   Endabeni zemali. Nxa kuyikuthi uyakwazi ukusebenzisa kuhle imali uzenelisa ukubalekela ingxabano zemali nxa usutshadile.

   Isimiso esiseBhayibhilini: “Kambe ngubani phakathi kwenu ongathi efuna ukwakha umphotshongo angaqali ahlale phansi abale izindleko ukuze abone ukuthi izinto alazo ziyenela yini ukuthi awakhe awuqede?”—ULukha 14:28.

   Zibuze: ‘Ngiyisebenzisa kuhle yini imali kumbe ngihlala ngisezikweledeni? Indlela engiphila ngayo iyatshengisa yini ukuthi ngiyisebenzisa kuhle imali?’

•   Endabeni zokukhonza. Nxa unguFakazi kaJehova, kumele ube lohlelo oluhle lokutaditsha iBhayibhili njalo ungene imihlangano yebandla maviki wonke.

   Isimiso esiseBhayibhilini: “Bayathokoza abakunanzelelayo ukuthi bayamdinga uNkulunkulu.”—UMathewu 5:3.

   Zibuze: ‘Ngisebenza nzima yini ukuze ngihlale ngilokholo oluqinileyo? Ngiyazinika yini isikhathi eseneleyo sokwenza izinto eziphathelane lokukhonza kumbe ngiyavumela ukuthi ezinye izinto zingiphambanise?’

 Okuqakathekileyo: Akulamuntu ongafuna ukutshada lomuntu ongaqinanga ekukhonzeni. Yikho nxa ungasebenza nzima uqinisa ukholo lwakho uzamthola umuntu oqakathekisa ukukhonza njengawe.