IBhayibhili Linganginceda Yini Nxa Ngizithonisisa?
Impendulo EseBhayibhilini
Ye. IBhayibhili liyasinceda sibone okumele sikwenze ukuze silwisane lokuzithonisisa. (IHubo 32:1-5) Nxa singaphambanisa besesizisola ngesiyabe sikwenzile, uNkulunkulu uzasithethelela futhi asincedise ukuthi siphinde sibe ngabangane bakhe. (IHubo 86:5) IBhayibhili likwenza kucace ukuthi ukuzithonisisa kungasinceda ngezinye izikhathi. Ngokwesibonelo kungenza ukuthi silungise amaphutha esiyabe siwenzile besesizimisela ukungawaphindi. (IHubo 51:17; IZaga 14:9) IBhayibhili liyasixwayisa ngengozi yokuzithonisisa kakhulu ngoba lokhu kungenza sicabange ukuthi asincedi ngalutho lokuthi asiqakathekanga kuNkulunkulu. Ukuzizwa njalo kungasenza ‘sikhulelwe yikudana kakhulu.’—2 KwabaseKhorinte 2:7.
Kuyini okwenza abantu bazithonisise?
Zinengi izizatho ezingenza sizithonisise. Kungaba yikuzwisa umuntu esimthandayo ubuhlungu kumbe ukwehluleka ukwenza into eqondileyo. Ngezinye izikhathi singazithonisisa kodwa kungelalutho esiluphambanisileyo. Ngokwesibonelo nxa singahlela ukwenza eyinye into engaphezu kwamandla ethu, besesisehluleka ukuyenza singasala sisizwa ubuhlungu futhi sizisola. Yikho iBhayibhili lisikhuthaza ukuthi singazithwalisi nzima ngokuzama ukwenza okungaphezu kwamandla ethu.—UmTshumayeli 7:16.
Ngingalwisana njani lokuzithonisisa?
Kulokuthi uvumele ukuzithonisisa kukuqede amandla, yenza okwenelisayo ukuze ulungise izinto. Kuyini ongakwenza?
Vuma amaphutha akho. Thandaza kuJehova a uNkulunkulu umcele ukuthi akuthethelele. (IHubo 38:18; ULukha 11:4) UJehova uzawuphendula umthandazo wakho nxa ungaphenduka, uzisole ngenhliziyo yonke njalo ulwise ngamandla onke ukuthi ungaphindi ukwenza iphutha elifananayo. (2 ImiLando 33:13; IHubo 34:18) Phela yena ubona lokho esiyikho ngaphakathi okungeke kubonwe ngabantu. Nxa singavuma izono zethu futhi sitshiye okubi ebesikwenza, uJehova uyasithethelela ngoba ‘uthembekile futhi ulungile.’—1 UJohane 1:9; IZaga 28:13.
Nxa ungawonela omunye umuntu, kuyabe kumele uvume ukuthi uphambanisile ubusumxolisa. Lokhu kungadinga isibindi lokuzithoba ngoba ukuxolisa akulula. Kodwa ukuxolisa ngenhliziyo yonke kuyanceda kakhulu. Kukwethula umthwalo oyabe usemahlombe akho, kuphinde kwenze ukuthi kube lokuthula phakathi kwakho lomuntu oyabe umphambanisele.—UMathewu 3:8; 5:23, 24.
Cabangisisa ngamavesi akhuluma ngesihawu sikaJehova. Ngokwesibonelo, cabanga ngombhalo ka-1 Johane 3:19, 20. Evesini le, iBhayibhili lithi ‘inhliziyo zethu zingasisola,’ okutsho ukuthi singahlala sizithonisisa size sibone angani uJehova kasithandi. Kodwa ivesi le iqhubeka isithi “uNkulunkulu mkhulu kulezinhliziyo zethu.” Kutshoni khonokho? Kutsho ukuthi uyakwazi lokho esiyikho ngaphakathi njalo uyazwisisa lendlela esizizwa ngayo lalapho esisilela khona. Uyakwazi lokuthi sizalwa silesono, okuyiso esisidonsela ekwenzeni okubi. b (IHubo 51:5) Yikho kabalahli labo abazisola ngenhliziyo yonke ngeziphambeko zabo.—IHubo 32:5.
Ungahlali ucabanga ngokwenzakala kudala. IBhayibhili likhuluma ngamadoda labesifazana abake benza izinto ezimbi kodwa baphinda batshintsha. Omunye wabo nguSawuli waseThasu, owacina esaziwa ngokuthi ngumphostoli uPhawuli. EsasengumFarisi wayebahlukuluza okuzwayo abalandeli bakaJesu. (ImiSebenzi 8:3; 9:1, 2, 11) Kodwa wathi esenanzelele ukuthi ayekwenza kwakuyikuphikisana loNkulunkulu loMesiya kumbe uKhristu, waphenduka wasetshintsha waba ngumKhristu oyisibonelo. Kuliqiniso ukuthi uPhawuli wayezisola ngakwenza kudala kodwa kazange ahlale ecabanga ngakho. Wabona ukuthi uJehova wayemtshengise isihawu yikho wakhuthala emsebenzini wokutshumayela njalo wahlala ethe nhlo ethembeni lokuphila okungapheliyo.—KwabaseFiliphi 3:13, 14.
Amavesi akhuluma ngokuzithonisisa lokuthethelelwa
IHubo 51:17: “Inhliziyo edabukileyo futhi esebuhlungwini awusoze uyilahle, awu Nkulunkulu.”
Okutshiwo yivesi le: Nxa ungaphambanisa, ubusuzisola ngenhliziyo yonke uNkulunkulu kasoze akulahle ngoba ulesihawu.
IZaga 28:13: “Ofihla iziphambeko zakhe kasoze aphumelele, kodwa ozivumayo azitshiye uzatshengiswa isihawu.”
Okutshiwo yivesi le: Nxa singavuma izono zethu futhi sitshintshe izenzo zethu uNkulunkulu uzasithethelela.
UJeremiya 31:34: “Ngizabathethelela icala labo njalo angisoze ngibe ngisasikhumbula isono sabo.”
Okutshiwo yivesi le: Nxa uJehova esesithethelele, kasoze aphinde asikhumbuze amaphutha ethu ngoba ulesihawu seqiniso.
a UJehova libizo likaNkulunkulu.—U-Eksodusi 6:3.
b Ukuhlala sifuna ukwenza okubi kubangelwa yisono esasizuza njengelifa emuntwini wakuqala, u-Adamu. Yena lomkakhe u-Eva, bonela uNkulunkulu futhi lokho kwenza ukuthi babe lesono njalo badlulisela isono leso ebantwaneni babo.—UGenesisi 3:17-19; KwabaseRoma 5:12.
