Eyinye inkosikazi yathola ukuthi umkayo wayebukela iphonografi. Indoda le yaxolisa yathembisa umkayo ukuthi yayingasoze iphinde ikwenze lokho. Kodwa kungakayi ngaphi yaphinda yaqalisa futhi.

 Ulalo yini uhlupho lokubukela iphonografi? Nxa kunjalo kumele unanzelele ukuthi okwenzayo kumlimaza njani umkakho lokuthi ungenzani ukuze uwutshiye kokuphela umkhuba lo. a

Okusesihlokweni lesi

•  Okumele ukwazi

•  Ongakwenza

•  Nxa umkakho ebukela iphonografi

 Ukubukela iphonografi kungawuchitha umtshado ngoba kwenza omunye aphatheke kubi futhi angamthembi umkakhe. b

 Inkosikazi elomkayo obukela iphonografi ingazizwa ngalindlela:

•   Ilahliwe. Owesifazana okuthiwa nguSarah uthi, “Sonke isikhathi nxa umkami ebukele iphonografi kuyabe kungani ufebile.”

•   Ingancedi ngalutho. Omunye owesifazana uthi okwakusenziwa ngumkakhe kwakumenza “abe lenhloni futhi azibone emubi.”

•   Iyabe ingasamthembi umkayo. Owesifazana okuthiwa nguHelen uthi, “Akuselanto leyodwa umkami ayenzayo engiyithembayo.”

•   Iyakhathazeka. Owesifazana okuthiwa nguCatherine yena uthi, “Ukucabanga ukuthi umkami wayesenzani kwakungiqeda amandla.”

 Ongacabanga ngakho: IBhayibhili litshela amadoda ukuthi athande omkawo. (Kwabase-Efesu 5:25) Kambe singathi indoda eyenza umkayo azwe ubuhlungu ngalindlela iyamthanda yini?

 Akulula ukuyekela ukubukela iphonografi. Owesifazana okuthiwa nguStacey uthi, “Umkami wenelisa ukuyekela ukubhema igwayi, imbanje lokunatha utshwala kodwa kumthwalise nzima ukutshiyana lephonografi.”

 Nxa uphakathi kwesimo lesi, amacebo alandelayo angakunceda utshiyane lomkhuba lo.

•   Zwisisa ukuthi yindaba ukubukela iphonografi kukubi. Ukubukela iphonografi kwenza umuntu angabi lendaba labanye abantu kodwa agijimise izifiso zakhe. Lokhu kwenza kungabi lothando lokuthembana emulini. Phela izinto lezi yizo ezenza abatshadileyo bathokoze. Kanti njalo ukuba lomkhuba lo kutshengisa ukuthi umuntu kamhloniphi uJehova uNkulunkulu onguye owaqalisa umtshado.

   Isimiso esiseBhayibhilini: “Umtshado kumele uhlonitshwe.”—KumaHebheru 13:4.

•   Ungacatshi ngomunwe. Ungaqali ukuthi, ‘Ngabe umkami ubengithanda okuzwayo, bengingasoze ngibukele iphonografi.’ Ukusola umkakho akuqondanga futhi kwenza ube lesizatho sokubuyela emkhutsheni wakho nxa angenza into ekudanisayo.

   Isimiso esiseBhayibhilini: “Lowo lalowo ulingwa ngokudonswa langokuhugwa yisifiso sakhe.”—UJakhobe 1:14.

•   Tshela umkakho iqiniso. Indoda okuthiwa nguKevin ithi: “Nsuku zonke ngihlala ngibuza umkami ukuthi kukhona yini engikubukelileyo abona angani kungangibisela ekubukeleni iphonografi. Ukuhlala sixoxa ngalindlela kwenza angacabangi ukuthi kulento engimfihlela yona.”

   Isimiso esiseBhayibhilini: “Sifisa ukuthembeka kukho konke.”—KumaHebheru 13:18.

•   Hlala uvule amehlo. Ungaphinda ubuyele emkhutsheni lo lanxa sokuleminyaka wawutshiya. UKevin esike sakhuluma ngaye uthi: “Kwadlula iminyaka engu-10 ngingabukelanga iphonografi ngahle ngazitshela ukuthi uhlupho lwami lwaseluphelile. Kodwa uhlupho lwalusasekhona, ithuba yilo nje elalingakaveli.”

   Isimiso esiseBhayibhilini: “Lowo ocabanga ukuthi umile kananzelele angawi.”—1 KwabaseKhorinte 10:12.

•   Zibambe nxa ungahlangana lesilingo. Lanxa ngezinye izikhathi ungafikelwa yizifiso ezimbi, ungakhetha ukwenza kumbe ukungenzi lokho okufisayo. Isifiso sokwenza okubi sidlula masinyane nxa ungazijayeza ukucabanga ezinye izinto.

   Isimiso esiseBhayibhilini: “Ngamunye wenu kumele akwazi ukuthi angawukhuza njani umzimba wakhe ukuze uhlale ungcwele njalo usamukeleka, angabuswa zinkanuko zemacansini ezilobuhwaba.”—1 KwabaseThesalonika 4:4, 5.

•   Ungazifaki esimeni esizakwenza kube lula ukuthi uphinde ubukele iphonografi. Ibhuku elithiwa Willpower’s Not Enough lithi: ‘Ukuzifaka esimeni esingakulinga ukuthi ucine wenze okungayisikho kufanana lokuklwebha umentshisi, okuyabe sokusele nje yikuthela ipharafini encane ukuze umlilo ubhebhe okuzwayo.’

   Isimiso esiseBhayibhilini: “Akungabi lalutho olubi olungibusayo.”—IHubo 119:133.

•   Ungalahli ithemba. Kungathatha isikhathi eside sibili kumbe iminyaka ukuthi uphinde umthembe umkakho. Kodwa abatshadileyo abanengi benelisile ukuphinda bathembe omkabo.

   Isimiso esiseBhayibhilini: “Uthando luyabekezela.”—1 KwabaseKhorinte 13:4.