2 Timoti 2:1-26
2 Asi iwewe mwana wangu, rambai wecivangiswa mu unyasha hucikaezaniswi huri muna Kristu Jesu.
2 Zvowakazwa ndecinanga pamberi po zvapupu zvakawanda, zvipei vanarume vakagondeka, vanozokwanisavo kujijisa vamweni.
3 Tambujikavo ngo zviro zvakashata inga musoca wakanaka wa Kristu Jesu.
4 Apana mundhu anoshanda inga musoca, anonghwinira mu shwiro jo kutengeserana jo mu upenyu, kuti adakajise wakamuita kuti ave musoca.
5 Pikija pa muphikizano, wiya anogogoma, aashiri mupocero wake kudari akatama kuteveja mutemo jo muphikizano.
6 Murimi anosurura ziya, ndiyena anodikana kutungamira kuha mucero jakona.
7 Nasai kurangarira ushoni zvandinokuvhunjari; Mambo anozokuita kuti uzwisise zviro zvese.
8 Ucakanganwa kuti Jesu Kristu wakamuswa ko vakafa, wainga mubarihwana wa Dhavhidhi, mu kuzwirana no masoko akanaka andinocumaera.
9 Inini ndiri kutambujika no kusungwa inga mushaishi ngo ndava yake. Asi, soko ra Mwari arizivi kusungwa.
10 Ngo ndava yazvo, ndinoenderera mberi ndecicungirira zviro zvese ngo pamusoro po vakasanwa, kuti vawanevo ruponeso huri muna Kristu Jesu pamwepo no rukujo hucikaperi.
11 Masoko aya anogondeka: Kudari takafa pamwepo na iyena, zvokadi tinozoponavo na iyena;
12 kudari tikaenderera mberi tecicungirira, tinozotonga pamwepo na iyena; kudari tikamuramba iyena anozotirambavo;
13 kudari tikatama kugondeka, iyena anoramba akagondeka, ngo kuti iyena aakwanisi kujiramba ega.
14 Rambai wecivaeujira zviro izvi, wecivajijisa* pamberi pa Mwari kuti vatame kuphikizana ngo pamusoro po magama, ngo kuti azvibesi ciro, asi zvinokhuvaza* vanozvipurutana.
15 Vangisirai kuti utendehwe ndi Mwari inga mundhu acina cinomupseruja, wecinasa kujijisa no kudurujira soko ro cokwadi.
16 Asi rambai masoko acina shwiro anoshatisa zviro zvakanaka, ngo kuti anoendesa mukushatisisa.
17 Masoko avo anondhandhanika inga kunyeka ko vonje.* Vamweni vavo ndi Imineu na Fireto.
18 Vanarume ava vakapauka mu cokwadi, vecinanga kuti rumuko hwakaitika kare, vari kupausa rutendo hwo vamweni.
19 Kusiyapo izvo, maambo akavanga a Mwari anoramba andoripo, ano cidhindho ici: “Jehovha anoziva vandhu vake,” na “wiya anodanija zina ra Jehovha* ngaasiye kuita zviro zvicizivi kurungama.”
20 Mu nyumba huru amuna mujiyo yo goridhi no sirivha basi, asi muno mujiyovo yo matabwa no yo dongo, imweni inoita basa rino nderemejo imweni inoita basa ricina nderemejo.
21 Ngo kudaro, kudari ari wese anoramba akaparajana no mujiyo unoita basa ricina nderemejo, anozova mujiyo unoita basa rino nderemejo, mujiyo wakaceneswa, unobesera mune wawo, wakanasirihwa kuti uite mabasa ese akanaka.
22 Ngo kudaro tizai zvido zvo muviri wo ujaha, asi psakai urungami, rutendo, rudo, runyararo pamwepo no vese vanodanija Mambo ngo mwoyo wakacena.
23 Cimwenizve, rambai mabhuyo o upenji no o kutama kuziva, ngokuti unozviziva kuti anomusa majivo.
24 Muranda wa Mambo aadikani kupipana, asi anodikana kuva wakapfava ku vandhu vese, anokwanisa kujijisa, anodikana kujibata paanonga eciitihwa zvakashata,
25 ecijijisa ngo kupfava kwese kuna vaya vacina mugariro yakanaka. Kangaije Mwari acazovaita kuti vakhauye, zvovaendesa ku uzivi hwo cokwadi.
26 Ngo njira iyi, ivona vanozokhauya no kujisujunura mu murau wa Dhiyabhu, ngokuti vakabathwa ndiyena kuti vaite kuda kwake.
Masoko o Pasi
^ Gama ngo Gama: “wecinasa kuvaitira ucapupu.”
^ Kana: “zvinoparaja; zvinophinduja.”
^ Kana: “bandhwa.”
^ Vonanyi Kudurujihwa ko Magama.
