Amosi 2:1-16
2 “Jehovha anonanga kudari:‘“Andizoregeri kuita zvandakaronga ngo pamusoro po Mowabhi, ngo kupanduka kwake katatu kana karongomuna,Ngokuti iyena wakapisa maphondo* a mambo wo Edhomi oita marota.
2 Ngo kudaro, ndinozotumira muriro ku Mowabhi,Muriro unozopisa mupfimbiji jakavangiswa jo Keriyoti;Panofa Mowabhi panozova no mbhere huru,*Kozozika kukhuwa* ko hondo, no kurira ko mbayapaya.
3 Ndinozovhisa mutongi ari pakati pakeNdomuuraya pamwepo no vatungamiriri vake vese.” Izvi ndizvona zvinonanga Jehovha.’
4 Jehovha anonanga kudari:‘Andizoregeri kuita zvandakaronga ngo pamusoro pa Judha, ngo kupanduka kwake katatu kana karongomuna,Ngokuti ivona vakaramba mutemo wa Jehovha;Avazivi kubatisisa mupango yake;Asi vakacengejwa ngo manyepo ondhoo akatevehwa ngo majicekuru avo.
5 Ngo kudaro, ndinozotumira muriro ku JudhaMuriro unozopisa mupfimbiji jakavangiswa jo Jerusarema.’
6 Jehovha anonanga kudari:‘Andizoregeri kuita zvandakaronga ngo pamusoro po Vaiziraeri, ngo kupanduka kwavo katatu kana karongomuna,Ngokuti vanotengesa varurami ngo sirivha,Vocinjanisa varombo ngo sandariya* mbiri.
7 Ivona vanocikacika musoro yo vandhu vanozvidodokesa, mu bukuta,Vanofunga makwanja o* vandhu vakapfava.
Baba no mwana wavo worume vanovatana no musikane umwewo,Vecisvipisa zina rangu rakacena.
8 Ivona vanovata phedo po artari jese vakafuka nguvo javanotorera vandhu inga pinyoro,*Vhinyu yavanomwa pa nyumba* yo zvimwari zvavo, vanoiwana pavanonga vecipagarisi vandhu.’
9 ‘Asi ndini ndakapeja Vaamori pambeji pavo,Vainga vakareba inga muti wo sedhro, vovanga inga muti wo mutondo;Ndakapeja mucero yavo no miji yavo.
10 Inini ndakamuvhisa mu nyika yo Ejipita,Ndoita kuti mufambe muzvipare ko makumarongomuna o makore,Kuti mutore nyika yo Vaamori.
11 Ndakasana vana vamweni venyu kuti vaite vaporofetiNdoita kuti majaha amweni enyu ave Vanaziri.
Nandi Vaiziraeri, ndiri kunyepa here?’ Izvi ndizvona zvinonanga Jehovha.
12 ‘Asi imwimwi makapa vhinyu Vanaziri,Movhunja Vaporofeti kudari: “Mucaporofeta.”
13 Ndinomuphwanya muri pa ndau yenyu,Inga kuphwanyiwa kunoitwa zviro zvakacikwa ngo ngoro* yakathwara mbeu.
14 Wiya anogogoma maningi, aazowani kokutizira,Wakavanga, anozopera simba,Pikija musoca, aazoponi.
15 Munyangi aazokwanisi kujijivirira,Wiya anogogoma maningi, aazokwanisi kutiza,Mupakiri wo haci, aazokwanisi kuponesa upenyu hwake.
16 Pikija musoca akava no simba maningi kupinda vamweni veseAnozotiza njiku yondhoyo acina nguvo.’ Izvi ndizvona zvinonanga Jehovha.”
Masoko o Pasi
^ Kana: “mafupa.”
^ Kana: “ciriro cikuru.”
^ Kana: “kumima.”
^ Kana: “magwada maviri.”
^ Kana: “njira jo.”
^ Kana: “cibatiso.”
^ Kana: “themberi.”
^ Kana: “kareta.”
