Ekisodho 38:1-31
38 Iyena wakaita artari yo kupisira zvipo ngo matabwa o muti wakavanga.* Iyona yainga ino mativi marongomuna akaezana. Yaireba makovhadho* mashanu, yopambhama makovhadho mashanu, no makovhadho matatu o kukhwirira.
2 Tevere, iyena wakaita nyanga wojidira mu zvikina zvirongomuna zvo artari. Nyanga jayo no artariyo, zvainga zvakabatana zvoita ciro cimwe. Perapo iyena wakainama ngo utare.
3 Pasure pazvo, iyena wakaita mujiyo jese jinoshandiswa pa artari zvakadari inga mabhagedhi, mafoshoro, zvibasiya, magarfu, no cokujima muriro. Wakaita mujiyo jese ngo utare.
4 Iyena wakaitazve bandhi ro artari ngo utare. Bandhi iri rainga rakaita inga juya, rodihwa ngo pasi po bhande rayo ngo pakati no pakati po kukhwira ko artariyo.
5 Iyena wakaita zvibato* zvirongomuna zvo kudira mu zvikina zvirongomuna ngo phedo no bandhi ro utare kuti munghwiniswemo mupingo.
6 Perapo iyena wakaita mupingo jo matabwa o muti wakavanga,* woinama ngo utare.
7 Iyena wakanghwinisa mupingo jiya, mu zvibato* zvainga mu mativi maviri o artari, kuti ithwarike. Iyena wakaita artari iyi ngo matabwa. Mukati mayo mainga makashama.
8 Iyena wakaita basiya ro utare, no cigajikiro caro co utare. Wakaita zviro izvi ecishandisa supeya* jo vanakaji vainga vakarongwa kuti vashandire pa musuvo wo tende yo musongano.
9 Tevere iyena wakaita ruvanje hwo tabherinake. Ku ruvanje hwo divi ro kakusi, kwakagwimbwa jira rakaithwa ngo uruji hwakanaka no kukoswa. Ngo divi rondhoro, kwainga no makovhadho anokwana kuita 100.
10 Ihwona hwainga huno 20 o njiki no 20 o zvigajikiro zvajo zvo utare. Zvikorokotejero* zvo njiki no zvitengerebwe* zvajo zvokubatanija ndizvona, zvainga zvo sirivha.
11 Ngo divi ro kanjikazi kwainga kuno 100 ro makovhadho o jira rakagwimbwa. 20 o njiki jaro no 20 o zvigajikiro zvaro, zvainga zviri zvo utare. Zvikorokotejero* zvo njiki no zvitengerebwe* zvayo zvainga zviri zvo sirivha.
12 Asi jira raigwimbwa ngo divi ro kumavirira, rainga rino 50 o makovhadho. Ikona kwainga kuno 10 ro njiki no 10 ro zvigajikiro zvajo, no zvikorokotejero* zvonjikijo pomwe no zvitengerebwe* zvo kubatanija ndizvona. Zvikorokotejero zvo njiki no zvokubatanija ndizvona, zvainga zviri zvo sirivha.
13 Upambhi hwo divi raisota kumavhazuva, hwainga no 50 o makovhadho.
14 Ngo divi ro ku musuvo, kwainga kuno 15 o makovhadho o jira raigwimbwa, pomwe no njiki ndhatu no zvigajikiro zvitatu.
15 Ngo divi rimweni ro musuvo wo paruvanje, kwaingazve kuno 15 o makovhadho o jira raigwimbwa, pomwe no njiki ndhatu no zvigajikiro zvitatu.
16 Macira ese aitendeneja ruvanje, ainga o uruji hwakanaka no kukoswa.
17 Zvigajikiro zvo njiki zvainga zvo utare. Zvikorokotejero* zvo njiki no zvitengerebwe* zvajo zvo kubata ndizvona, zvainga zvo sirivha. Kumbhiri ko njiki kwainga kwakanamwa ngo sirivha. Njiki jese jo paruvanje jainga jino zvokubatanija ndizvona zvosirivha.
18 Jira ro pamusuvo wokunghwina ndiwona paruvanje, rainga rakaithwa ngo uruji hwo bhurumu, hwokupsukirikira, hwo kupsuka no hwakanaka no kukoswa. Irona rainga rino 20 o makovhadho o kupambhama, no makovhadho 5 o kureba. Kureba ko jira iri, kwaiezana no kureba ko macira o paruvanje.
19 Njiki murongomuna jaro no zvigajikiro zvajo zvirongomuna, zvainga zvo utare. Zvikorokotejero* zvajo zvainga zvo sirivha. Kumbhiri ko njiki no zvitengerebwe* zvo kubatanija ndizvona, zvainga zvakanamiwa ngo sirivha.
20 Mbhingu jese jo tabherinake no jaitendeneja ruvanje, jainga jo utare.
21 Mosi wakananga kuti kwaidikana kuverengwa zviro zvakashandiswa pa kuvaka tabherinake yo Ucapupu. Varevhi ndivona vaidikana kuva no basa iri, vecitungamirihwa ndi Itamari, mwana wa Aroni mupiri.
22 Bhezareri mwana wa Uri, wo mubarihwana wa Judha, wakaita zvese zvakananga Jehovha ecivhunja Mosi. Uri wainga ari mwana wa Huri.
23 Bhezareri waishanda na Oriyabhi mwana wa Izamaki wo vhumbo ra Dhani. Iyena wainga mundhu waikwanisa kuita mufumbo wese wo basa; kuruka no kusona ngo uruji hwo bhurumu, hwokupsukirikira, hwo kupsuka no uruji hwakanaka.
24 Mutengo wo goridhi rese rakashandiswa pa basa raiithwa pa ndau yakacena, wainga wakaezana no mutengo wo goridhi rese rainga rakaithwa mupiro wo kuzingwa. Goridhi iri, rainga ro 29 o matarenta,* no 730 o mashekeri.* Ivona vaidikana kushandisa buwe ro kupima sirivha rinoanja kushandiswa mundau yakacena.
25 Sirivha yakaviiswa nga vaya vainga vakataririswa, yainga yo 100 ro matarenta no 1.775 o mashekeri. Ivona vaidikana kushandisa buwe ro kupima sirivha rinoanja kushandiswa mundau yakacena.
26 Dimbu ro shekeri rakaashihwa rainga recivha ku vandhu vainga vakataririswa, rainga riri dimbu ro shekeri ro buwe raipima sirivha raianja kushandiswa pa ndau yakacena.* Mutengo wo vandhu vese vakataririswa, waikwana kuita 603.550 o vandhu vainga vano makore aitangira pa 20 kwenda kumbeji.
27 Zvigajikiro zvo pa ndau yakacena no zvigajikiro zvo njiki jaishandiswa pa kugwimba jira, zvakaithwa ngo mutengo wo 100 ro matarenta. 100 ro zvigajikiro, zvaiezana no 100 ro matarenta. Cigajikiro cimwe cakashandisa tarenta imwe.
28 Iyena wakaita zvikorokotejero* zvo njiki ecishandisa mutengo wo 1.775 o mashekeri, wonama kumbhiri ko njikijo ngo utare. Perapo wakajibatanija pamwepo ngo zvikorokotejero.
29 Utare hwakaithwa mupiro,* hwaikwana kuita 70 o matarenta no 2.400 o mashekeri.
30 Ngo zvipo izvi, iyena wakaita zvigajikiro zvo njiki jo tende yo musongano no artari yo utare, no bandhi ro utare, no mujiyo jese jo pa artari.
31 Wakaitazve ndizvona zvigajikiro zvo njiki jo paruvanje no mbhingu jese jo tende yaitendeneja ruvanje.
Masoko o Pasi
^ Mu Cihebheru i gama ro kuti shit·tah′. Vonanyi Kudurujihwa ko Magama pa gama ro kuti “shit·tah′.”
^ Kovhadho imwe inoezana no 44,5 yo masentimetro. Vonanyi Masoko Okuengejera B14.
^ Zviradhondo zvo goridhi.
^ Mu Cihebheru i gama ro kuti shit·tah′. Vonanyi Kudurujihwa ko Magama pa gama ro kuti “shit·tah′.”
^ Kana: “zviradhondo zvo goridhi.”
^ Kana kuti, simbi yakanasa kurojehwa yon’ganikira inga supeya.
^ Zvokungwinisira.
^ Kana: “zvibato; mapote.”
^ Zvokungwinisira.
^ Kana: “zvibato; mapote.”
^ Zvokungwinisira.
^ Kana: “zvibato; mapote.”
^ Zvokubatanija.
^ Kana: “zvibato; mapote.”
^ Zvokubatanija ndizvona.
^ Kana: “zvibato; mapote.”
^ Tarenta rimwe rairema kiru jinokwana kuita 34,2. Vonanyi Masoko Okuengejera B14.
^ Shekeri imwe yairema 11,4 g. Vonanyi Masoko Okuengejera B14.
^ Kana: “shekeri rakaceneswa.”
^ Kana: “zvokubatanija ndizvona.”
^ Kana: “mupiro wo kuzingwa.”
