Ekisodho 4:1-31
4 Asi Mosi wakadavira kudari: “Waro ndinozoitenyi kudari vakaramba kunditenda, votamazve kuzwa zvandinonga ndecinanga? Ngokuti ivona vanonga vecinanga kudari: ‘Azviitiki kuti Jehovha akugumire.’”
2 Jehovha wakamuvhunjisa kudari: “Cicinyi ciriwaro munyara mako?” Iyena wakadavira kudari: “Indonga.”
3 Mwari wakati: “Ikhandirei pasi.” Iyena wakaikhandira pasi yopinduka kuita nyoka. Asi Mosi wakaitiza.
4 Jehovha wakavhunja Mosi kudari: “Ibatei ngo mushe wayo.” Ngo kudaro, iyena wakaibata yopinduka kuita ndonga munyara make.
5 Mwari wakati: “Unodikana kuita izvi kuti vatende kuti Jehovha, Mwari wo majicekuru avo, Mwari wa Abhirahama, Mwari wa Izaki na Mwari wa Jakobe, wakakubudira.”
6 Jehovha wakamuvhunjazve kudari: “Ndapota, nghwinisai nyara yako mu rupiko* hwo nguvo yako.” Ngo kudaro, iyena wakanghwinisa nyara yake mu rupiko* hwo nguvo yake. Paakaibudisa wakavona nyara yake yakazara ngo mapere akacena inga cando!
7 Tevere iyena wakananga kudari: “Hwirijai nyara yako mu rupiko* hwo nguvo yako.” Ngo kudaro, iyena wakahwirija nyara yake mu rupiko* hwo nguvo yake. Paakaibudisa, wakavona kuti mapere aaingaya nawo apera! Yoezana no muviri wake wese.
8 Ngo kudaro, Mwari wakati: “Kudari ivona vakatama kukutenda kana vakatama kukupurutana* pa citatijo co kutanga, zvokadi kamare ivona vanozokupurutana* kudari ukavaitira citatijo cocipiri.
9 Kudari ukaita zvitatijo zviviri izvi, ivona votama kukutenda, vorambazve kuzwa zvaunonanga, unodikana kutora kumwa yo Murambo wa Niro woidururira kumutundhu. Kumwa yondhoyo inozopinduka yoita ngazi kumutundhuyo.”
10 Mosi wakavhunja Jehovha kudari: “Ndiregererenyivo Jehovha, inini andinasi kuvereketa ushoni. Kuvhira kareko na wari pamatangari kuvereketa na inini. Ngokuti ndinononoka maningi kuvereketa. Rurumi hwangu hunoremazve.”
11 Jehovha wakamudavira kudari: “Ndiyani wakarura muromo wo mundhu? Ndiyani wakarura mbeveve, ano mandondo, anovona ushoni, no bofu? Andinipi inini Jehovha?
12 Waro endai, inini ndinozova na iwewe paunonga wecivereketa. Ndinozokujijisa zvaunodikana kuvereketa.”
13 Asi iyena wakati: “Ndiregerenyivo Jehovha, ndapota. Tumanyi mundhu ari wese wamunoda kutuma.”
14 Tevere, Jehovha wakanyangajwa maningi ndi Mosi, womuvhunja kudari: “Unoti kudini ngo pamusoro po hama yako Aroni, Murevhi? Inini ndinozviziva kuti iyena anonasa kuvereketa ushoni. Iyena wari uno atori mugwanja eciviya kuzosongana na iwewe. Paanozokuvona iyena anozodakara* maningi.
15 Ngo kudaro, iwewe unodikana kumuvhunja zvaunodikana kuvereketa. Inini ndinozova na imwimwi pamunonga mecivereketa. Ndinozomujijisazve zvamunodikana kuita.
16 Ndiyena waunozoshandisa kuti uverekete no vandhu. Iyena anozoita muromo wako. Iwewe unozoita inga Mwari kwaari.*
17 Iwewe unozotora ndonga iri mu nyara mako woita ndiyona zvitatijo zvinoshamaisa.”
18 Ngo kudaro, Mosi wakaenda ka Jetro, vatezvara vake, wovavhunja kudari: “Ndapota inini ndiri kuda kwenda ku Ejipita, koovona hama jangu dangani jiciri penye.” Jetro wakavhunja Mosi kudari: “Endai! Fambai ushoni.”
19 Pasure pazvo, Mosi paainga ari ku Midhiyani, Jehovha wakamuvhunja kudari: “Endai! Hwirirai ku Ejipita. Ngokuti vandhu vese vaipsaka kukuuraya vapera kufa.”
20 Tevere, Mosi wakatora mukaji wake no vana vake wovapakija pa mbongoyo. Iyena wakatanga hwendo hwo kwenda ku Ejipita. Mosi wakatorazve ndonga yaakavhunjwaya ndi Mwari wo cokwadi kuti aitore.
21 Tevere, Jehovha wakavhunja Mosi kudari: “Ukambhera ngo kuguma ku Ejipita itai mushamaiso jese jandakakupa simba kuti ujiite pa mberi pa Faro. Asi inini ndinozoitisa kuti mwoyo wake utindivare. Iyena aazotenderi kupindisa vandhu vangu.
22 Iwewe unodikana kuvhunja Faro kudari: ‘Jehovha wananga kudari: “Iziraeri ndiyena mwana wangu. Dangwe rangu.
23 Inini ndiri kukuvhunja kuti upindise mwana wangu, kuti aende kondishandira. Asi kudari ukatama kumupindisa, inini ndinozouraya mwana wako. Dangwe rako.”’”
24 Pavainga vari mugwanja, voguma pa ndau yavaida kuvata, Jehovha wakasongana naye. Iyena waipsaka kumuuraya.*
25 Pejisire, Zipora wakatora buwe rakapinjira,* wosoka ndirona mwana wake. Perapo wakaitisa kuti ganda riya ripsase soka jake,* woti: “Indava yo kuti imwimwi mava mwamuna wangu ngo ngazi.”
26 Ngo kudaro, Mwari wakamuregera ecipinda. Pa nguva iyi, Zipora wakati: “Mwamunangu ngo ngazi” ngo pamusoro po kusokwa.
27 Tevere Jehovha wakavhunja Aroni kudari: “Endai kosongana na Mosi mu zvipare.” Ngo kudaro, iyena wakaenda kosongana naye pa dundhu ra Mwari wo cokwadi, womucungamija ngo bhejho.
28 Mosi wakavhunja Aroni zviro zvese zvaakavhunjwa ndi Jehovha, wiya wakamutumaya. Woita zvitatijo zvese zvinoshamaisa zvaakavhunjwa kuti aite.
29 Pasure pazvo, Mosi na Aroni vakaenda kounganija madhodha ese o Vaiziraeri.
30 Aroni wakavavhunja masoko ese akavhunjwa Mosi ndi Jehovha. Woita zvitatijo zvese zvinoshamaisa pamberi po vandhu vese.
31 Ngo kudaro, vandhu vese vakatenda. Pavakazwa kuti Jehovha wainga arangarira Vaiziraeri no kuzwazve kuti iyena ari kuvona matambujiko avo, ivona vakagwadama pasi, vosikimara.*
Masoko o Pasi
^ Mupiko.
^ Mupiko.
^ Mupiko.
^ Mupiko.
^ Kukupurukira.
^ Vanozokupurukira.
^ Gama ngo Gama: “mwoyo wake unozodakara.”
^ Kana: “iwewe unozoimirira Mwari.”
^ Kangaije pari kunangira kuuraya mwana wa Mosi.
^ Rakapita.
^ Kangaije ari kunangira soka jo ngirozi.
^ Kana: “vokhodomara.”
