Genesisi 35:1-29
35 Pasure pazvo, Mwari wakavhunja Jakobe kuti: “Mukai, endai ku Bheteri ugareyo, uvakireyo artari ya Mwari wo cokwadi, wakakubudiraya wecitiza Izau nevanji wako.”
2 Perapo, Jakobe wakavhunja vandhu vo pamuzi pake no vese vaainga navo kuti: “Svejanyi zvimwari zvo nyikanja zviri pakati penyu, jicenesenyi no kucinja nguvo jenyu.
3 Ngatimuke tiende ku Bheteri. Kondhoyo ndinozovakireyo artari ya Mwari wo cokwadi. Iyena waindidavira pa njiku yandainga ndakasuruvara.* Ndiyena waingaya na inini kuri kwese kondaienda.”
4 Ngo kudaro, ivona vakapekeja Jakobe zvimwari zvese zvonyikanja zvovainga nazvo no biriku* jese jovaisimira. Jakobe wakazvicira pasi, pasi po miti mukuru wainga phedo no Shekemi.
5 Pavaifamba, Mwari wakaita kuti vandhu vo mumadhorobha movaipindaro ndimona vathye, kuti vatame kuteverera vana va Jakobe.
6 Pa kufamba ko nguva, Jakobe wakaguma Ruzi, kana kuti Bheteri, mu nyika yo Khanani, iyena no vandhu vese vaainga navo.
7 Iyena wakavakirepo artari, wodanija ndauyo kuti Eri-bheteri.* Ngokuti Mwari wo cokwadi wakajivonesa kwaari paaitizaya hama yake.
8 Pa kufamba ko nguva, Dhebhora mushandi* wa Rabheka wakatamika, wovigwa mumbhiripiri mo mutundhu wo Bheteri, pasi po miti mukuru. Miti uwu wakaudura zina rokuti Aroni-bhakuti.*
9 Mwari wakabudirazve Jakobe paaivha Padhani-arami, womukomborera.
10 Mwari wakamuvhunja kuti: “Zina rako ndiwe Jakobe. Aucazodanijwizve Jakobe, zina rako rinozova Iziraeri.” Iyena wakatanga kumudanija Iziraeri.
11 Mwari wakamuvhunjazve kuti: “Ndini Mwari wo Masimba Ese. Barai vana vawande maningi. Iwewe unozova baba wo majinja akawanda maningi, majimambo anozovha kouri.
12 Nyika yondakapaya Abhirahama na Izaki, ndinozoipa iwewe no mubarihwana wako.”
13 Perapo, Mwari wakapinda kuvha pa ndau yaakabhuyaya naye.
14 Ngo kudaro, Jakobe wakaimisa buwe ro cirangarijo pa ndau yaakabhuyaya naye, woridururira zvipo zvo vhinyu no mafuta.
15 Jakobe wakaenderera mberi ecidanija ndau yaakabhuyaya na Mwari kuti Bheteri.
16 Pasure pazvo, ivona vakavha ku Bheteri. Pavainga vaciri ndhambo no Efrati, nyoka ya Rakeri yakatanga kuruma,* iyena waihwajihwa maningi.
17 Asi paainga acahwajihwa kuti abare, mubeseri* wake wakamuvhunja kuti: “Ucathya, mwana wako uwu anozobahwa ushoni.”
18 Pa mukuvo wo kupejisira wo upenyu hwake (ngokuti waida kufa), wakamudura kuti Bheni-oni,* asi baba wake vakamudanija kuti Bhenjamini.*
19 Ngo kudaro, Rakeri wakatamika wovigwa mu gwanja ro kuenda Efrati, kana kuti Bheterehema.
20 Jakobe wakaimisa buwe panyezuru po guva rake. Iri ndirona buwe ro guva ra Rakeri mbhera na nyamasi.
21 Pasure pazvo, Iziraeri wakapinda, woimisa tende yake paakapindirija cirindo* cinodanijwa kuti Edheri.
22 Vhaza imweni, Iziraeri paainga wogara munyikemo, Rubheni wakavatana na Bhiriha mukaji umweni wa babake, Iziraeri wakazvizwa.
Ngo kudaro, Jakobe wainga no vana vanokwana kuita 12.
23 Vana vaakabara Jakobe na Reya nga ava: Rubheni wainga wo dangwe, tevere Simiyoni, Revhi, Judha, Isakari na Zebhuroni.
24 Vana vaakabara na Rakeri ndi Josefa na Bhenjamini.
25 Vana vaakabara na Bhiriha, mushandiri wa Rakeri, vainga Dhani na Naftari.
26 Vana vaakabara na Ziripa, mushandiri wa Reya, vainga Gadhi na Azeri. Ava ndivona vana va Jakobe, vaakabara ari mu nyika yo Padhani-arami.
27 Pa kufamba ko nguva, Jakobe wakazoguma Mamure kwaingaya na Izaki babake, ku Kiriyati-aribha, kana kuti Hebheroni. Ndikona Abhirahama na Izaki kovaingaya vandhu vo nyikanja.
28 Izaki wakava no makore anokwana kuita 180.
29 Perapo Izaki wakafa, woenda kovigwa ngo mavigihwe akaithwa vandhu vake, pasure po kuva no makore akawanda no anodakajisa. Iyena wakavigwa ngo vana vake, Izau na Jakobe.
Masoko o Pasi
^ Kana: “ndakacamwa.”
^ Kana: “mbhete jo munjeve.”
^ Zina iri rinoreva kuti “Mwari wo Bheteri.”
^ Kana kuti, makayaya.
^ Zina iri rinoreva kuti “Miti wo Ciriro.”
^ Kana: “kusurungumwa.”
^ Kana: “mucingi; nyamukuta.”
^ Zina iri rinoreva kuti “Mwana wo Ciriro Cangu.”
^ Zina iri rinoreva kuti “Mwana wo Mukono Muho.”
^ Cinyumba cinoshandiswa kuda kuvona zviri ndhambo.
