Genesisi 4:1-26
4 Adhamu wakavata no mukaji wake Evha, womita mimba. Paakabara Khaini, iyena wakananga kudari: “Ndabara mwana worume ngo kubesehwa ndi Jehovha.”
2 Pakufamba ko nguva, Evha wakabarazve Abheri, munukuna wa Khaini.
Abheri wakava muhavisi, Khaini wakava murimi.
3 Sure ko njiku nganani, Khaini wakatora mucero jake kuti aite cipo kuna Jehovha.
4 Asi Abheri wakatora matangwe o mavhuta pomwe no mafuta awo. Ngo kudaro, Jehovha wakadakarira maningi zvipo zvaiithwa ndi Abheri.
5 Iyena aazivi kudakarira Khaini no mupiro jake. Ngo kudaro, Khaini wakanyangajwa maningi, wocamwa.
6 Ngo kudaro, Jehovha wakavhunjisa Khaini kudari: “Ngenyi iwewe wakanyangajwa no kucamwa?
7 Kudari ukaita zvakanaka, kureva kuti inini andizokudakariri? Asi kudari ukatama kuita zvakanaka, cishaishi cinondogara ciri pa musuvo wako. Icona ciri kuda maningi kukunyisa. Kureva kuti iwewe unozokwanisa kucinyisa?”
8 Sure kwazvo, Khaini wakavhunja munukuna wake, Abheri, kudari: “Ngatende kubani.” Pavainga vari kubani, Khaini wakataka munukuna wake, Abheri, womuuraya.
9 Tevere Jehovha wakavhunjisa Khaini kuti: “Ari kwapi munukuna wako, Abheri?” Khaini wakadavira kudari: “Andimuzivi, ndiri mungwariri wo munukuna wangu inini?”
10 Ngo kudaro, Mwari wakati: “Waitenyi? Izwai! Sangi yo munukuna wako iri kundikhuwira* yecivha mumavhu.
11 Wari iwewe watukwa no kugogomehwa pa mavhu akafunungura muromo wao, kuti aashire sangi yo munukuna wako kuvha mu nyara jako.
12 Ukamarima, iwona aazobari mbeu yawo. Unozopepa no kutiza pa nyika.”
13 Ngo kudaro, Khaini wakavhunja Jehovha kudari: “Kukhawiswa kwangu ngo ndava yo zvishaishi zvangu, kwakakura maningi zvokuti andikwanisi kukucijikira.
14 Nyamasi imwimwi mandigogomera munyika muno. Inini ndinozogara ndhambo na imwimwi. Ndinozopepa no kutiza pa nyika. Mundhu wese anondiwana, anozondiuraya.”
15 Ngo kudaro, Jehovha wakamuvhunja kudari: “Ngo thangwe iri, mundhu wese anouraya Khaini, anozohwirijihwa runomwe.”
Ngo kudaro, Jehovha wakadira Khaini citatijo, kuti patame kuwanika mundhu ari wese anomuuraya paanosongana naye.
16 Perapo Khaini wakafindara pamberi pa* Jehovha woenda kogara ku Nodhe,* ngo kumavhazuva ko Edheni.
17 Perapo, Khaini wakavata no mukaji wake, womita mimba wobara Enoki. Iyena wakavaka dhorobha woridura zina ro mwanake, Enoki.
18 Pakufamba ko nguva, Enoki wakabara Iradhe, Iradhe wakabara Mehujaeri, Mehujaeri, wakabara Metuzaeri, Metuzaeri wakabara Rameki.
19 Rameki wakarovora vakaji vaviri, wokutanga waidanijwa kuti Adha, wocipiri waidanijwa kuti Zira.
20 Pa kufamba ko nguva, Adha wakabara Jabhari. Jabhari ndiyena mundhu wakatanga kugara mutende ecirera zvinyama.
21 Munukuna wake waidanijwa kuti Jubhari, iyena ndiyena wakatanga kurija zvimadangari no mutoriro.
22 Zira, wakabaravo Tubhari-Khaini, wiya waiitaya mufumbo wese wo mujiyo jo utare no simbi. Hambzaji yake* wainga Naamaa.
23 Ngo kudaro, Rameki wakananga masoko aya ku vakaji vake, Adha na Zira:
“Izwanyi izwi rangu imwimwi vakaji va Rameki;Nasanyi kuteya njeve ku magama angu:
Ngokuti ndakauraya mundhu wainga andikhuvaza,Hina, mujaha wainga anditaka.
24 Kudari mundhu anouraya Khaini ecidikana kukhawiswa ka 7,Waro mundhu anouraya Rameki, anodikana kukhawiswa 77.”
25 Adhamu wakavatazve no mukaji wake, iyena wakabara mwana. Mukaji wake wakadura mwana uwu kuti ndi Seti,* ngokuti iyena wakati: “Mwari wandipa mwana* umweni pa ndau ya Abheri, ngokuti Khaini wakamuuraya.”
26 Seti wakabaravo mwana womudura zina ra Enosi. Mukuvo wondhowo, vandhu vakatanga kudanija zina ra Jehovha.
Masoko o Pasi
^ Kana: “kundimimira.”
^ Kana: “Khaini wakavanda.”
^ Kana: “nyika yo vandhu vasungwa.”
^ Kana: “hama yake yokaji.”
^ Kana: “wandigajira.” Zina ro Cihebheru ro kuti “Seti” rinoreva kuti “Kugajwa; Kudihwa,” kuda kureva kufakeya umweni.
^ Gama ngo Gama: “mbeu.” Kana kuti mubarihwana.
