Jeremiya 26:1-24
26 Pa nguva yaakatanga kutonga Jehoyakimi, mwana wa Josiya mambo wo Judha, soko ra Jehovha rakaguma reciti:
2 Izvi ndizvona zvinonanga Jehovha: ‘Garai wakaima pa ruvanje wo nyumba ya Jehovha ubhuye no vagari vese vo madhorobha o Judha vari kuviya kuzonamata pa nyumba ya Jehovha. Vavhunjei zvese zvandinozokuvhunja, ucadovhisa no gama rimwe haro.
3 Kangaije ivona vanozozwa vosiya gwanja ravo rakashata, inini ndocinja murangariro wangu ngo pamusoro po dambujiko randiri kuda kuvaviisira ngo ndava yo zviito zvavo zvakashata.
4 Vavhunjei kudari: “Izvi ndizvona zvinonanga Jehovha: ‘Kudari imwimwi mukatama kuzwira, kuzwira mutemo wangu wandakadira pamberi penyu,
5 no kutama kuzwa masoko o vashandiri vangu vaporofeti, vandiri kumutumira kuphinda no kuphinda, avo vamucikaripi kuzwira.
6 Ngo kudaro, inini ndinozoita kuti nyumba iyi iezane na Shiro, ndozoita kuti dhorobha iri rive muezaniso wo ciro catukwa ngo majinja ese o pa nyika.
7 Vapiri, vaporofeti no vandhu vese vakazwa Jeremiya ecinanga masoko aya pa nyumba ya Jehovha.
8 Jeremiya paakapera kunanga masoko ese aainga akavhunjwa ndi Jehovha kuti avhunje vandhu vese, ngo kudaro, vapiri, vaporofeti no vandhu vese vakamubata vonanga kudari: “Zvokadi iwewe unozofa.
9 Ngenyi iwewe wakaporofeta ngo zina ra Jehovha wecinanga kuti nyumba iyi inozoezana na Shiro, dhorobha iri rinozophwanywa rogara ricina vandhu’?” Vandhu vese vakatendeneja Jeremiya pa nyumba ya Jehovha.
10 Vatungamiriri vo Judha pavakazwa masoko aya, vakakhwira voenda ku nyumba ya mambo mbhera ku nyumba ya Jehovha, vogara pa manghwiniro wo musuwo mupsa wo nyumba ya Jehovha.
11 Vapiri no vaporofeti vakavhunja vatungamiriri no vandhu vese kudari: “Mwanarume uu anofanera kutongehwa kufa, ngokuti wakaporofeta zvakashata ngo pamusoro po dhorobha iri inga zvamaperari kuzwa ngo njeve jenyu kamare.”
12 Ngo kudaro, Jeremiya wakavhunja vatungamiriri vese no vandhu vese kudari: “Jehovha ndiyena wandituma kuti ndiporofete masoko ese akashata amazwari ngo pamusoro po nyumba iyi no dhorobha iri.
13 Ngo kudaro, cinjanyi makwanja enyu no zviito zvenyu, zwiranyi izwi ra Jehovha Mwari wenyu, Jehovha aazomuviisiri dambujiko raakananga kuti waizomuviisira.
14 Asi inini ndiri mu nyara jenyu. Ndiitirenyi zvakanaka kana zvakarungama mu mavonero enyu.
15 Asi zivanyi izvi, kudari imwimwi mukandiuraya, dhorobha iri no vagari varo, kubatanijavo na imwimwi, munozova no ndava yo sangi yo mundhu acina ndava. Ngokuti Jehovha ndiyena wakandituma kuti ndinange masoko ese aya pamberi penyu.”
16 Ngo kudaro, vatungamiriri no vandhu vese, vakavhunja vapiri no vaporofeti kudari: “Mwanarume uu aadikani kutongehwa kufa, ngokuti iyena wakativhunja masoko ngo zina ra Jehovha Mwari wedu.”
17 Kusiyapo izvo, vakuru vamweni vo munyikemo vakamuka vovhunja vandhu vese vaingepo kudari:
18 Mikeya wo Moresheti waiporofeta mu njiku ja Ezekiya mambo wo Judha wakavhunja vandhu vese vo Judha kudari: ‘Izvi ndizvona zvinonanga Jehovha wo hondo:
Ziyoni rinozorimwa inga munda,Jerusarema rinozoita mathere,Dundhu ro Nyumba, rinozoita inga zvimatundhu zvakazara ngo mamuti.”’
19 Kureva kuti Ezekiya mambo wo Judha no vandhu vese vo Judha vakamuuraya? Icokwadi kuti Ezekiya wakathya Jehovha wodeketerera unyasha hwa Jehovha. Izvo zvakaita kuti Jehovha atame kuviisa dambujiko raainga akananga kuti waizovaviisira. Ngo kudaro, itusu taaphedo no kuda kujiviisira dambujiko rakakura.
20 Kwaingavo no mwanarume umweni waiporofeta ngo zina ra Jehovha waidaninjwa Urija. Iyena wainga mwana wa Shemaya waivha ku Kiriyati-jearimi, iyena waiporofeta zvakashata ngo pamusoro po dhorobha iri no nyika iyi ngo masoko akaezana no a Jeremiya.
21 Mambo Jehoyakimi, masoca ake ese ano simba pamwepo no vatungamiriri vakazwa masoko ake. Mambo wakasunga kumuuraya. Urija paakazwa izvi wakathya wotiza kwenda ku Ejipita.
22 Mambo Jehoyakimi wakatumira Erinatani mwana wa Akibhori pamwepo no vanarume vamweni kuti vaende ku Ejipita.
23 Ivona vakaviisa Urija kuvha ku Ejipita vomuendesa kuna mambo Jehoyakimi. Mambo wakamuuraya ngo banga perepo wokhandira mutembo wake mu makuva anovigihwa varombo.”
24 Asi Ahikami mwana wa Shafani wakabesera Jeremiya. Jeremiya aazivi kupuwa mu nyara jo vandhu kuti vamuuraye.
