Jeremiya 28:1-17
-
Jeremiya no muporofeti wo kunyepa Hananiya (1-17)
28 Mu gore rondhoro pa nguva yakatanga kutonga Zedhekiya mambo wo Judha, pa mweji wo cishanu wo gore ro cirongomuna, muporofeti Hananiya mwana wa Azuri waivha ku Gibhiyoni, wakandivhunja masoko aya pa nyumba ya Jehovha pamberi po vapiri no po vandhu vese:
2 “Izvi ndizvona zvinonanga Jehovha wo hondo Mwari wo Vaiziraeri, ‘ndinozogura kanga ya mambo wo Bhabhironi.
3 Mukati mo makore maviri ndinozoviisazve mu ndau iyi mujiyo jese jo nyumba ya Jehovha, jakatohwa ndi Nebhukadhinezari mambo wo Bhabhironi, jaakavhisa mu ndau iyi woenda najo ku Bhabhironi.’”
4 “‘Ndinozoviisa Jekoniya mwana wa Jehoyakimi, mambo wo Judha no vandhu vese vo Judha vakaendeswa kuuranda ku Bhabhironi,’ izvi ndizvona zvinonanga Jehovha, ‘ngokuti ndinozogura kanga ya mambo wo Bhabhironi.’”
5 Ngo kudaro, muporofeti Jeremiya wakadavira muporofeti Hananiya pamberi po vapiri no pamberi po vandhu vese vainga vakaima pa nyumba ya Jehovha.
6 Muporofeti Jeremiya wakati: “Ameni!* Jehovha ngaazviite! Jehovha ngaakwanirise masoko owanangaro, ngo kuviisazve pa ndau iyi mujiyo jo nyumba ya Jehovha no vandhu vese vakaendeswa kuuranda ku Bhabhironi.
7 Ngo kudaro, ndapota, izwai masoko andinoda kuvhunja* iwewe no vandhu vese.
8 Kuvhira kare no kare, vaporofeti vakaporofeta inini na iwewe ticito tabahwa, vaiporofeta kuti ku nyika zinji no ku umambo huno simba, kwaizova no hondo, dambujiko no ndhendha.
9 Kudari muporofeti akazivisa runyararo, masoko ake okwanirisika, vandhu vaizoziva kuti iyena watumwadi ndi Jehovha kamare.”
10 Ngo kudaro, muporofeti Hananiya wakavhisa kanga pa musipa po muporofeti Jeremiya woigura.
11 Hananiya wakananga kudari pamberi po vandhu vese: “Izvi ndizvona zvinonanga Jehovha. ‘Ngo maitiro aya, ndinozogura kanga ya Nebhukadhinezari mambo wo Bhabhironi, ndinozoivhisa pamusipa po majinja ese mukati mo makore maviri.’” Muporofeti Jeremiya wakabata gwanja rake, opinda.
12 Muporofeti Hananiya paakapera kugura kanga, woivhisa mu musipa mo muporofeti Jeremiya, Jehovha wakavhunja Jeremiya kudari:
13 “Endai, vhunjai muporofeti Hananiya kudari: ‘Izvi ndizvona zvinonanga Jehovha: “Iwewe wagura kanga yakaithwa ngo matabwa, pa ndau po kanga yo matabwa, iwewe unozoita kanga yo simbi.”
14 Ngokuti izvi ndizvona zvinonga Jehovha wo hondo Mwari wo Vaiziraeri: “Ndinozodira kanga yo simbi mu musipa mo majinja ese kuti Vazoshandire Nebhukadhinezari mambo wo Bhabhironi. Ivona vanodikana kuzomushandira, pikija zvinyama zvo musora zvinozomushandira.”’”
15 Ngo kudaro, muporofeti Jeremiya wakaenda koovhunja muporofeti Hananiya kudari: “Izwai ndapota Hananiya, Jehovha aazivi kukutuma, asi pikija zvakadaro, iwewe uri kuita kuti vandhu ava vathembe zviro zvo kunyepa.
16 Ngo kudaro, izvi ndizvona zvinonanga Jehovha ‘ndinokuvhisa mu nyika. Gore rino iwewe unozofa, ngokuti waita kuti vandhu ava, vapandukire Jehovha.’”
17 Mugore rondhoro, muporofeti Hananiya wakafa mu mweji wo cinomwe.
