Jeremiya 35:1-19
-
Varekabhi vanokhombija muezaniso wakanaka wo kuzwira (1-19)
35 Mu njiku jo utongi hwa Jehoyakimi, mwana wa Josiya mambo wo Judha, Jehovha wakavhunja Jeremiya kuti:
2 “Endai kovona mbhuri yo Varekabhi, bhuyai navo uvaviise ku nyumba ya Jehovha mu imwe yo sara jo kuhira. Vapei vhinyu kuti vamwe.”
3 Ngo kudaro, ndakatora Jaazaniya mwana wa Jeremiya muzukuru wa Abhaziniya. Ndotorazve no hama jake no vana vake vese pamwepo no vandhu vese vo nyumba yo Varekabhi
4 ndonghwina navo mu nyumba ya Jehovha. Inini ndakavatora ndonghwina navo mu sara yo kuhira yo vana va Hanaa. Hanaa wainga mwana wa Igidhariya mushandiri wa Mwari wo cokwadi. Sara iyi yo kuhira yaigara ngo pamutivi po sara yo kuhira yo vana va mambo yainga panyezuru po sara yo kuhira ya Maaseya mwana wa Sharumi mungwariri wo musuvo.
5 Ngo kudaro, ndakadira kopo jakazara ngo vhinyu no mujiyo jo kumwira jakazara ngo vhinyu pamberi po vanarume vo nyumba yo Varekabhi, ndovavhunja kudari: “Imwanyi vhinyu.”
6 Asi ivona vakadavira kudari: “Atimwi vhinyu, ngokuti Jonadhabhi* mwana wa Rekabhi cekuru vedu, wakativhunja kudari: ‘Amuvhiri kumwa vhinyu, imwimwi pamwepo no vana venyu.
7 Mucadovaka nyumba nee kusima mbeu, mucadosima muuvha nee kutenga munda wo muuvha. Kusiyapo izvo, garanyi mumatende mukuwo wese kuti mupone mukuwo wakareba mu nyika yamunogara inga vandhu vo nyikanja.’
8 Ngo kudaro, itusu tinoenderera mberi tecizwira zvakanangwa ndi Jonadhabhi mwana wa Rekabhi cekuru vedu teciita zvese zvavakativhunja. Itusu, vakaji vedu, vana vedu vorume no vana vedu vokaji atizivi kumbomwa vhinyu.
9 Cimwenizve, itusu ativaki nyumba kuti tigare nee atina muuvha, munda nee mbeu.
10 Tiri kuenderera mberi tecigara mumatende tecizwira zvese zvatakavhunjwa ndi Jonadhabhi cekuru vedu.
11 Asi Nebhukadhinezari* Mambo wo Bhabhironi paakaviya kohwisa nyika yedu, itusu takati: ‘Viyanyi, ngatende ku Jerusarema kuti tipone pa kuhwiswa ngo masoca o Vakaradhiya no masoca o Vasiriya.’ Wari itusu tiri kugara ku Jerusarema.”
12 Ngo kudaro, Jehovha wakavhunja Jeremiya kuti:
13 “Jehovha wo hondo Mwari wo Iziraeri wakati: ‘Endai uvhunje vandhu vo Judha no vagari vo Jerusarema kudari: “Imwimwi amuzivi kungwajwa kuphinda no kuphinda kuti muzwire masoko?” Izvi ndizvona zvinonanga Jehovha.
14 “Jonadhabhi mwana wa Rekabhi wakavhunja mubarihwana wake kuti utame kumwa vhinyu. Mubarihwana wake wakazwira masoko ake okutama kumwa vhinyu mbhera na nyamasi. Ngo kuita kudaro vari kuzwira masoko a cekuru wavo. Inini ndinobhuya na imwimwi kuphinda no kuphinda,* asi imwimwi amundizwiri.
15 Inini ndaienderera mberi ndecivatumira vashandiri vangu vese, vaporofeti; inini ndaivatumira kuphinda no kuphinda* ndeciti: ‘Ndapota, umwe na umwe ngaasiye gwanja rake rakashata woita zviro zvakanaka. Mucanamata zvimwari zvimweni nee amuvhiri kuzvishandira. Mukaita kudaro, imwimwi munozoenderera mberi mecigara mu nyika yandakapa imwimwi no majicekuru enyu.’ Asi imwimwi amuzivi kundizwira nee amuzivi kuteya njeve.
16 Mubarihwana wa Jonadhabhi mwana wa Rekabhi unozwira mupango wovakavhunjwa ndi cekuru wavo, asi vandhu ava avandizwiri.”’”
17 “Ngo kudaro, Jehovha Mwari wo hondo, Mwari wo Iziraeri anonanga kudari: ‘Ndiri kuviisira vandhu vo Judha no vagari vese vo Jerusarema matambujiko ese andainga ndakavangwanja. Ngokuti inini ndakavavhunja asi ivona avazivi kuzwira, inini ndakaenderera mberi ndecivadaninja asi ivona avazivi kudavira.’”
18 Jeremiya vakavhunja vandhu vo nyumba yo Varekabhi kudari: “Jehovha wo hondo, Mwari wo Iziraeri anonanga kudari: ‘Zvecivoneka kuti makazwira mupango wa Jonadhabhi cekuru wenyu, Mecienderera mberi mecizwira mupango yake yese no kunasa kuita zvamakavhunjwa ndiyena,
19 Jehovha wo hondo, Mwari wo Iziraeri anonanga kudari: “Mukuwo wese kunozova no mundhu wo jinja ra Jonadhabhi mwana wa Rekabhi kuti andishandire.”’”
Masoko o Pasi
^ Gama ngo Gama: “Jonadhabhi ikugurisihwa ko zina rokuti Jehonadhabhi.”
^ Gama ngo Gama: “Nebhukadhirezari.” Aya ndiwona matarihwe amweni.
^ Gama ngo Gama: “inini ndinomuka mangwanani ese ndecibhuya na imwimwi.”
^ Gama ngo Gama: “ndaimukisa ndecimutumira vaporofeti njiku jese.”
