Jeremiya 37:1-21
37 Mambo Zedhekiya mwana wa Josiya wakatanga kutonga pa ndau ya Koniya* mwana wa Jehoyakimi, ngokuti Nebhukadhinezari* mambo wo Bhabhironi wakamugaja kuti ave mambo mu nyika yo Judha.
2 Asi iyena, vashandiri vake no vandhu vo mu nyika yondhoyo avazivi kuzwira masoko a Jehovha aakabhuya ecishandisa muporofeti Jeremiya.
3 Mambo Zedhekiya wakatuma Jehukari mwana wa Sheremiya pamwepo na Sofoniya mwana wa Maaseya mupiri, kuti vaende kuno muporofeti Jeremiya vamuvhunje kudari: “Tapota, tiitirevo mukumbiro kuna Jehovha Mwari wedu.”
4 Jeremiya waifamba akasujunuka pakati po vandhu, ngokuti ivona vainga vacito vamusunga.
5 Pa mukuvo wondhowo, masoca a Faro ainga abuda mu Ejipita. Vakaradhiya vaitendeneja Jerusarema pavakazwa masoko aya vakabuda mu Jerusarema.
6 Tevere Jehovha wakabhuya no muporofeti Jeremiya eciti:
7 “Jehovha Mwari wo Vaiziraeri anonanga kudari: ‘Vhunjanyi mambo wo Judha uwu wakamutumaya kuti muviye kopsaka ndhungamiriro kwandiri kudari: Vonai! Masoca a Faro ari kuviya komubesa anozohwirira ku nyika yawo ku Ejipita.
8 Vakaradhiya vanozoviyazve kuno, vozohwisana no dhorobha iri. Ivona vanozoritora voripisa ngo muriro.”
9 Jehovha anoti: “Mucajicengeja pacenyu meciti: ‘Vakaradhiya avazoviizve,” asi kunasa kunanga ivona vari kuviyazve.
10 Pikija nomaikwanisa kuuraya masoca ese o Vakaradhiya ari kuhwisana nemwi, vosara basi vanarume vapera kukhuvazika, ivona vaizomuka mu matende avo vopisa dhorobha iri ngo muriro.”’”
11 Masoca o Vakaradhiya paakabuda mu Jerusarema ngo ndava yo masoca a Faro,
12 Jeremiya wakabuda mu Jerusarema woenda mu nyika ya Bhenjamini kuti aashire ndhaka pakati po vandhu vake.
13 Asi paakaguma pa Musuvo wa Bhenjamini, mutungamiriri wo vangwariri waidaninjwa Irija mwana wa Sheremiya muzukuru wa Hananiya, wakabata muporofeti Jeremiya womuvhunja kudari: “Iwewe uri kutizira ku divi ro Vakaradhiya!”
14 Asi Jeremiya wakati: “Andizvopi! Inini andiripi kutizira ku divi ro Vakaradhiya.” Asi Irija aazivi kumuzwa. Ngo kudaro, wakasunga muporofeti Jeremiya womutora woenda naye ku vatungamiriri vamweni.
15 Vatungamiriri vakanyangajwira maningi Jeremiya. Ivona vakamutaka vomufungira mu nyumba yo mutari Jehonatani, iyo yainga yakacinjwa yoizwa kadheya.
16 Jeremiya wakadihwa mu kadheya yo pasi mu kwartu yo pasi, wogaremo njiku jakawanda.
17 Ngo kudaro, mambo Zedhekiya wakamudaninja mumba make omuvhunjisa ngo cifise-fise. Iyena wakamuvhunjisa kudari: “Uno masoko ari ese a Jehovha?” Jeremiya wakamudavira kudari: “Ndinawo!” Iyena wakaenderera mberi eciti: “Imwimwi munozodihwa mu nyara ja mambo wo Bhabhironi!”
18 Jeremiya wakavhunjazve mambo Zedhekiya kudari: “Ndakashaishenyi kwamuri, ku vashandiri venyu no ku vandhu ava kuti mundidire mu kadheya?
19 Waro vari kwapi vaporofeti vaiporofeta kwamuri veciti: ‘Mambo wo Bhabhironi aazoviyi koohwisa imwimwi no nyika iyi?
20 Wari ndapota, ndizwenyi mambo wangu. Ndabata murenje, ndiitirenyivo unyasha. Mucandihwirijazve ku nyumba yo mutari Jehonatani, ngokuti mukandihwirija ndinofireyo.”
21 Ngo kudaro, mambo Zedhekiya wakapa mupango kuti Jeremiya afungihwe pa Ruvanje wo Varindiri. Iyena waipuwa pau jakaita bhororindo njiku jese jaivha ku gwanja ro vabiki vo pau, mbhera pau jese jopera mudhorobha. Jeremiya wakaenderera mberi akafungihwa pa Ruvanje wo Varindiri.
Masoko o Pasi
^ Anodaninjwazve Johoyakini kana Jekoniya.
^ Gama ngo Gama: “Nebhukadhirezari.” Aya ndiwona matarihwe amweni.
