Jeremiya 46:1-28
46 Masoko a Jehovha akaashira Jeremiya ngo pamusoro po zviro zvaida kuitikira majinja nga aya:
2 Masoko ngo pamusoro po Ejipita, ngo pamusoro po masoca a Faro Neko mambo Ejipita paainga ari phedo no murambo Eufrate ku Karikemishi paakanyiswa ndi Nebhukadhinezari* mambo wo Bhabhironi mu gore ro cirongomuna ro kutonga ka Jehoyakimi mwana wa Josiya mambo wo Judha:
3 “Nasiriranyi muvhiko jenyu mudoko no mukuru,Endanyi ku hondo.
4 Imwimwi vapakiri vo haci, nasiriranyi haci mujikhwire.
Garanyi mu ndau jenyu, simiranyi kapaseti.
Pukutanyi mukhondo* yenyu, simiranyi nguvo jo simbi.
5 ‘Ngenyi ndinovavona vecithya?
Ivona vari kufundhya, masoca avo ano simba anyiswa.
Ivona vari kutiza vecithya, masoca avo ano simba nee aaripi kusota sure.
Vandhu vari kuthya mu ndau yese,’ izvi ndizvona zvinonanga Jehovha.
6 ‘Vaya vanogogoma maningi avakwanisi kutiza, nee masoca ano simba aakwanisi kupokonyoka.
Ivona vanokhugunywa vowa,Pavanonga vari kanjikazi phedo no mumbhiripiri mo Murambo Eufrate.’
7 Ndiyani ari kuviyaro inga Murambo wa Niro,Inga murambo jino kumwa ino mavimbi?
8 Ejipita ari kuviya inga Murambo wa Niro,Inga murambo jino kumwa ino mavimbi,Eciti: ‘Inini ndinozoenda ndofukija nyika.
Ndinozopeja madhorobha no vagari vawo.’
9 Imwimwi haci, gogomanyi!
Imwimwi ngoro,* gogomanyi ngo kukasika!
Masoca ano simba ngaatungamire,Imwimwi vandhu vo Kushi no vo Puti munoshandisaro muvhiko,Na imwimwivo vandhu vo Rudhi, munokungaro uta moushandisa.
10 “Njiku yondhoyo ngo ya Jehovha wo hondo Mambo Mukuru-kuru, njiku yo kuhwirijira kuti akhawise vavengi vake. Banga rinozouraya vandhu mbhera roguta. Rinozomwa sangi yavo mbhera ropeja nyota yaro. Ngokuti Jehovha wo hondo Mambo Mukuru-kuru, wanasirira mupiro mu nyika yo kanjikazi phedo no Murambo Eufrate.
11 Iwewe mbhandwe mwana wokaji wo Ejipita,Endai ku Giriyadhi koopsaka bharsamo.
Mutombo jako jese ajishandi,Ngokuti akuna mutombo unokurapa.
12 Majinja azwa zviro zvinopseruja ngo pamusoro pako,Kucema kwako kuri kuzika mu nyika yese.
Ngokuti masoca ano simba anokhugunyana,Iwona anowa pamwepo.”
13 Aya imasoko a Jehovha aakavhunja muporofeti Jeremiya ngo pamusoro po kuviya kwa Nebhukadhinezari* mambo wo Bhabhironi kuti ahwise nyika yo Ejipita.
14 “Mazivisenyi mu Ejipita, mazivisenyivo mu Migidhori.
Mazivisenyi mu Nofi no mu Tafinesi.
Meciti: ‘Garanyi mu ndau jenyu, nasiriranyi,Ngokuti banga rinozopeja zvese zvakamutendeneja.
15 Ngenyi vanarume venyu vano simba, vapera kuurawa?
Ivona avazivi kuenderera mberi vakavanga,Ngkuti Jehovha wavawisa pasi.
16 Vandhu vakawanda vanokhugunyika, vowa.
Ivona vanovhunjana ngo cavo kudari:
“Ngatende, ngatihwirire ngo kukasika ku vandhu vedu no ku nyika yedu,Ngokuti vandhu vakawanda vari kuuraiwa ngo banga.”’
17 Faro mambo wo Ejipita anovereketa zviro zvakawandaAsi apana caanoita,Iyena aazivi kuita zviro pa nguva kwayo.’
18 Ndinopika no upenyu hwangu, izvi ndizvona zvinonanga Mambo, ano zina rokuti Jehovha wo hondo,‘Iyena* anozoviya inga dundhu ro Tabhori riri pakati po matundhu,Anozoviya inga dundhu ro Kameri riri phedo.
19 Rongejai muthwaro wako uende kuuranda,Iwewe mwana wokaji anogara mu Ejipita.
Ngokuti dhorobha ro Nofi* rinozova ciro cinothyisa;Irona rinozopiswa rosiiwa ricina vandhu.
20 Ejipita wakatojana no cin’gombe cokaji cakaseja,Asi ndhunga jinozoviya jecivha kanjikazi jomuruma.
21 Pikija no masoca aakatenga akaezana no zvivana zvo n’gombe,Asi iwona akamufuratira, otiza pamwepo.
Avazivi kuendera mberi vakavanga,Ngokuti njiku yo dambujiko ravo yaguma,Nguva yo kupanicwa kwavo yaguma.’
22 Kukhuwa kwake kwakaita inga nyoka iri kutiza,Ngokuti ivona vari kuviya kuzomuhwisa ngo simba vecishandisa bheura,*Inga vanarume vanotema mamuti.
23 Ivona vanozowisa mamuti o mugwasha rake’ izvi ndizvona zvinonanga Jehovha, ‘pikija recivoneka kuti aringhwiniki.
Ngokuti ivona vakawanda maningi kupindirija ndere, ivona avaverengeki.
24 Mwana wokaji wo Ejipita anopserujwa.
Iyena anozodihwa mu nyara jo vandhu vo kanjikazi.
25 “Jehovha wo hondo, Mwari wo Vaiziraeri anoti: ‘Wari inini ndinozokhawisa Amoni mwari wo ku No, ndinozokhawisa Faro, ndinozokhawisa Ejipita, zvimwari zvayo no majimambo ayo, hina, ndinozokhawisa Faro no vese vaya vanomuthemba.’
26 “‘Ndinozovadira mu nyara ja vaya vari kuvapsaka kuti vavauraye. Ndinozovadira mu nyara ja Nebhukadhinezari* Mambo wo Bhabhironi no vashandiri vake. Pasure pa izvi, nyika yo Ejipita inozogahwazve inga zvoyaaita kare,’ izvi ndizvona zvinonanga Jehovha.
27 Asi iwewe mushandiri wangu Jakobe, ucathya,Iwewe Iziraeri, ucathyisijihwa.
Ngokuti ndinozokuponesa ku ndau jo ndhamboNdinozoponesa mubarihwana ku nyika yowakaendeswa kuuranda.
Jakobe anohwirira ozova akagajana ano runyararo,Pacina mundhu anozovathyisijira.
28 Asi iwewe mushandiri wangu Jakobe ucathya,’ izvi ndizvona zvinonanga Jehovha, ‘ngokuti ndinewe.
Inini ndinozoparaja majinja ese ondakakundhandhanisira,Asi andizoparaji iwewe.
Ndinozokupangira mukuzwirana no zvaunofanera,Andizokusii ucizivi kupangihwa.’”
Masoko o Pasi
^ Gama ngo Gama: “Nebhukadhirezari.” Aya ndiwona matarihwe amweni.
^ Thurusi rinoshandiswa ku hondo.
^ Kana: “kareta.”
^ Gama ngo Gama: “Nebhukadhirezari.” Aya ndiwona matarihwe amweni.
^ Zvinoreva wiya waizonyisa Ejipita.
^ Kana: “Memifisi.”
^ Kana: “mureno.”
^ Gama ngo Gama: “Nebhukadhirezari.” Aya ndiwona matarihwe amweni.
