Jobe 16:1-22
16 Jobe wakadavira kudari:
2 “Ndakazwa zviro zvizinji zvakatojana na izvi.
Kunja ko kundinyaraja imwimwi muri kuengejera matambujiko angu basi!
3 Masoko acina shwiro amuri kuvereketari anozopera rini?
Zvicinyi zvinomuitisa kuti muverekete kudaro?
4 Inini ndaizovereketavo ngo njira yondhoyo.
Kudari zviri kuitikari na inini no zvaiitikavo na imwimwi,Inini ndaizomuvhunjavo masoko anohwajaNdojunguja musoro wangu ndakamusota.
5 Asi inini andicaizoitepi zvondhozvo.Ndaizomuvangisa ngo masoko anovha mukanwa mangu,
Masoko anovha pa muromo wangu aizomutondhoja.
6 Ndikavereketa, kuhwajihwa kwangu akuiti nane,Asi ndikatama kuvereketa,
Kuhwajihwa kwangu kunoita nane mbhera papi?
7 Asi wari iyena wandiita kuti ndipere simba;Wauraya vese vo pamuzi pangu.
8 Inini wari ndiri kutambujikavo munyara jake, vandhu vese vecizvivona,Inini wari ndaondoroka maningi,
Zvovoneka inga ndino ndava.
9 Ushungu hwake hwandivhavhura, wova no bundu na inini.
Iyena anogedesa-gedesa meno ngo pamusoro pangu.
Vavengi vangu vandizvukira meso.
10 Ivona vanofunungura muromo kuti vandivhavhure,Vanonditaka vecindituka;Ivona vanobatana pamwepo vakawanda kuti vanditambuje.
11 Mwari anondiendesa munyara jo vana vadokoIyena anondikhandira munyara jo vakashata.
12 Inini ndainga ndakagarisika, asi iyena wakandicangaja;Iyena wakandibata ngo sure ko musipa wondikwiya-kwiya,Perapo wondifura ngo mupasha jake.
13 Vandhu vake vanofura ngo uta, vakanditendeneja;Ivona vanobovora shingamo* jangu vacina no pena;Vophwanyira pasi dundira rangu.
14 Inini ndakaita inga biravira riri kundophwanyiwa;Ndecigogomehwa inga musoca.
15 Ndakasona saku kuti ndifukije ganda* rangu,Ndakafushira kureremejwa kwangu mu bukuta.
16 Meso angu apsuka ngo kucema,*Iwona azara ngo cidima cikuru,*
17 Asi nyara jangu ajizivi kumbokhuvaza mundhu ari weseMukumbiro wangu wakacena.
18 Iwewe mavhu! Ucafukija sangi yangu.
Kukhuwa kwangu ngakutame ndau yokuzororera!
19 Wari uno, capupu cangu ciri kudenga;Wiya anondiitira ucapupu ari kumusoro-soro.
20 Shamwari jangu, jiri kundishoraMeso angu eciderera musoji pamberi pa Mwari.
21 Ngapawanike mundhu anotonga pakati po mundhu na Mwari,Inga zvinoitika pakati po mundhu no mudoni wake.
22 Makore asara mashoma,Inini ndinozopinda asi andicazoviizve.
Masoko o Pasi
^ Kana: “ndhengero.”
^ Kana: “dovo.”
^ Kana: “kurira.”
^ Kana: “ngo munhvuriri wo rufu.”
