Jobe 2:1-13
2 Tevere, yakazoguma njiku yokuti vana va Mwari* wo cokwadi, vakaenda pamberi pa Jehovha. Sathana wainga aripovo kuti aimevo pamberi pa Jehovha.
2 Perapo Jehovha wakavhunjisa Sathana kudari: “Uri kuvha kwapi?” Sathana wakadavira Jehovha kudari: “Ndiri kuvha kofamba-famba mu nyika.”
3 Perapo Jehovha wakavhunjisa Sathana kudari: “Wavona here mushandiri wangu Jobe? Akuna mundhu umweni wakaezana na iyena pasi pese. Iyena imundhu wakarurama, nee aana ndava.* Anothya Mwari no kunyenya zvakashata. Pikija iwewe wecindivangirija kuti ndimuuraye pacina thangwe riri rese, asi iyena aciri kundobatisisa kugondeka kwake.”
4 Sathana wakapingura Jehovha kudari: “Ganda ngo ganda!* Mundhu anozopekeja zvese zvaanazvo kuti aponese upenyu hwake.
5 Asi tambanujanyi nyara jenyu, mukhuvaze nyama yake no maphondo* ake. Imwimwi munozovona kuti anozomutuka pamberi penyu kamare.”
6 Perapo Jehovha wakavhunja Sathana kudari: “Vonai! Iyena ari munyara mako! Asi iwewe audikani kumuuraya.”
7 Ngo kudaro, Sathana wakabuda pamberi pa Jehovha woenda kohwajisa Jobe ngo mapundu aihwaja* maningi kuvhira mu soka mbhera ku musoro.
8 Perapo Jobe wakatora cipande* kuti apare muviri wake akagara pa marota.
9 Pakupejisira mukaji wake wakamuvhunja kudari: “Ngenyi uri kundoramba wakagondeka? Tukai Mwari ufe!”
10 Asi Jobe wakamuvhunja kudari: “Iwewe unovereketa inga mwanakaji acina hwiru. Tinodikana kutendera zviro zvakanaka basi zvinovha kuna Mwari wo cokwadi, totama kutenderavo zviro zvakashata?” Mu zvese izvi Jobe apana caakashaisha ngo muromo wake.
11 Shamwari ndhatu ja Jobe jaidanijwa Erifazi Mutemani na Bhiridhadhi Mushuwa pomwe na Zofari Munaamati, ivona vakazwa ngo pamusoro po dambujiko rainga rakawira Jobe. Ngo kudaro, vakapangana kuti vaende kosongana pamwepo kuti vaende kocumba naye no kumuvangisa. Umwe na umwe wavo wakaviya ecivha ngo kumuzi kwake.
12 Ivona pavakamuvona ngo ndhambo, avazivi kumuziva. Ngo kudaro, vakacema* ngo izwi guru vecimwesa nguvo javo. Vokhandira mavhu mudenga no mu musoro mavo.
13 Perapo ivona vakagara pasi naye mukati mo njiku nomwe, usiku no masikati. Asi apana na umwe wakavereketa ciro ngokuti vainga vecivona kuti dambujiko ra Jobe rainga rakakura maningi.
Masoko o Pasi
^ Magama o kufananijira o Cihebheru ecida kunangira ngirozi ja Mwari.
^ Kana: “imundhu wakakwana pamberi pa Mwari.”
^ Kana: “Dovo ngo dovo.”
^ Kana: “mafupa.”
^ Kana: “ngo mota jaihwaja.”
^ Kana: “cikangavira.”
^ Kana: “vakarira.”
