Jobe 24:1-25
24 “Ngenyi Mwari Womasimba Ese aagaji nguva?
Ngenyi vaya vanoziva, avazivi nguva yakona?
2 Variyo vandhu vanocinja zvivaringo zvo muganwa.Vanotora mushambi voenda koidira kumahavo avo.
3 Vanotora mbongoyo yo ndherera*Vanotora mwombe yorume yo noni,
Inga cibatiso co zviro zvaakafiyari.
4 Vanovangirija varombo kuti vabude mugwanja.Vaya vacina vajiviriri, vanodikana kufindara* ngo ndava yo kuvathya.
5 Varombo, vanoenda musora kopsaka zvokuha inga mbongoyo yo musora.Mubani, ivona vanoenda kopsaka zvokuha kuti vapekeje vana vavo.
6 Vanodikana kuvhisa mbeu mu maminda o vamweni.Vanodikana kubojera zviya zvakasara mu maminda o muuvha wo mundhu wakashata.
7 Vanopeja usiku hwese vari mitu, vacina zvokusimira.Avana cokufuka munguva yo kutondhora.
8 Vanocururika ngo nvhura yo mumatundhu.Perapo vokumbatira mapuwe ngokuti apana pokuvanda.
9 Ndherera* inovhiswa paditi ra mai wayo.Nguvo jo murombo jinotohwa inga cibatiso ngo ndava yo magava.
10 Vanovangirijwa kuti vafambe vari mitu, vacina nguvo,No kuvangirijwa kuthwara zvapera kukotohwa, vecifa ngo njara.
11 Zuva parinonga reciha muti,Ivona vanoshanda ngo simba mu maminda ano matundhu no mupfimbiji.
Vanocikacika uvha mu zvokusvinira vhinyu,
Kuveni vari kufa ngo nyota.
12 Vaya vari kufa, varikwenda mberi vecigomera mu dhorobha.Vaya vakhuvazika maningi, vari kudeketera kuti vabeswe.Asi Mwari aazvivoni inga zviro zvakashata.
13 Variyo vanopandukira ruvheneko;Avana basa no mabasa avo,Avateveri makwanja avo.
14 Bhandidhu rinomuka mambakwaeja,Rinouraya mundhu acina mujiviriri kubatanija no murombo.Cousiku, rinoenda koba.
15 Majiso o mundhu anoita upombo,Anovetera kuti zuva rivire,
Iyena anonanga kudari: ‘Apana anozondivona!’
Perapo wofukija kumeso kwake.
16 Cousiku, ivona vanophwanya musuvo jo nyumba.Comasikati, vanogara vakajifungira.
Ivona vanonyenya ruvheneko.
17 Ivona vanothya mangwananiInga zvinoita vamweni vanothya cidima.
Varoveja zvinothisaya vandhu mucidima.
18 Ngo kukasika, ivona vanozotohwa ngo kumwa.
Ndau yavo inozotukwa.
Ivona avazohwiririzve ku munda javo jo muuvha.
19 Kutama kuna ko nvhura no kupisa,Kunotora cando capera kunyunguruka.
Ngo kudaro, Guva* rinotoravo vandhu vanoshaisha.
20 Mai wavo vanozovakanganwa,
Honye jinozovabusa.
Apana mundhu anozovarangarirazve.
Kutama kururama kunozowiswa inga muti.
21 Ivona vanotambuja shenje,*Vanotambuja noni.
22 Mwari anozoshandisa simba rake kuti auraye vano simba.Pikija vecizvikuja, avazivi zvinozoitika no upenyu hwavo mangwana.
23 Mwari anotendera kuti ivona vajithembe, vagare vacikathyi.Asi majiso ake anovona zvese zvavanoita.
24 Ivona vanokujwa pamukuvo mushomani, perapo vongara-ngara.
Vanododokeswa, vounganijwa inga zvinoitwa vamweni.Vanotemwa inga musonjoti wo* mbeu.
25 Waro ndiyani angavonesa kuti inini ndiri kunyepaKana kuphikiza magama angu?”
Masoko o Pasi
^ Kana: “mwana wakafihwa ndi baba.”
^ kana: “kuvanda.”
^ Mwana wakafihwa ngo vabari.
^ Kana: “Sheori.” Kana kuti, kufa kunoita vandhu vese. Vonanyi Kudurujihwa ko Magama.
^ Kana: “mwanakaji acikabari.”
^ Kana: “bumbu ro.”
