Jobe 3:1-26
3 Pasure pa izvi, Jobe wakatanga kuvereketa ecituka njiku yo kubahwa kwake.
2 Jobe wakati:
3 “Njiku yondakabahwa ngainyunguruke,No usiku hwovakananga kuti: ‘Mwana wamitwa!’
4 Njikuyo ngaiite cidima.Mwari wo kumatenga ngaaivone icikabesi ciro;
Njikuyo aivhiri kuva no ruvheneko.
5 Cidima cikuru ngaciitore.*
Gore ro nvhura ngariwire pa nyezuru payo.
Ciri cese cinoitisa cidima, ngaciithyise.
6 Ngo pamusoro po usiku uhu, cidima cikuru ngaciufukije;Usiku uhu ngahutame kudakara pakati po njiku jese jo gore,Ahudikani kuverengwa pakati po njiku jo mweji.
7 Ndizvona! Usikuhwo ngahuite ngomwa;Akuna kukhuwa* ko kudakara kunodikana kuzika muusikuhwo.
8 Vaya vanotuka njiku, ngavatuke usikuhwo,Vaya vanokwanisa kuvhurumusa ngwena.*
9 Ndhondho jo usiku uhu, ngajiithwe cidima;Usiku uhu ngahuvetere biresi ruvheneko,
Ngahutame kuvona kubuda ko zuva.
10 Asi usiku uhu, ahuzivi kukwanisa kufunga musuvo wo ndani ya mai wangu;Nee ahuzivi kuviga matambujiko kuti meso angu atame kumavona.
11 Ngenyi andizivi kufa pondaibahwa?
Ngenyi andizivi kutamika pondaibuda mundani?
12 Ngenyi pakava no mavero akandisenga?Ngenyi pakava no mazamu akandimwisa?
13 Ndaizodari ndakarajikwa ndicina matambujiko;Ndaizodari ndakavata ndecizorora
14 Pamwepo no majimambo o nyika no vapangiri vavo,Vaya vakajivakira ndau jakaperari kuita mathere,
15 Ndaizodari ndakazorora no vana va mambo* vainga no goridhi,Vainga no nyumba jakazara ngo sirivha.
16 Ngenyi andizivi kuitwa ngo kusvojwa* pacina anozviziva,Inga mwana acizivi kumbovona ruvheneko?
17 Mu rufu, pikija vandhu vakashata avacatambujwi;Mondhomo vandhu vakaremba vanozorora.
18 Mondhomo vasungwi vakagara zvakanaka vari pamwepo;Akuna mundhu anovavangirija kubata basa.
19 Mondhomo, mudoko no mukuru vakaezana,Muranda aacatongwi ndi patarau wake.
20 Ngenyi Mwari anotendera kuti vaya vanotambujika vararame?*Ngenyi anopa upenyu vaya vakavora mwoyo?
21 Ngenyi vandhu vanoda kufa avafi?
Ivona vanokupsakisisa kupinda kupsaka upfumi hwakavigwa,
22 Ivona vanodakara maningi,Vanodakara povanowana guva.
23 Ngenyi Mwari anopa ruvheneko ku mundhu wasvejeka mu gwanja rake,Zvecivoneka kuti iyena wapera kumutendeneja ku mativi ese?
24 Kucema* ndikona kuha kwangu,Kugomera kwangu kuri kudururika inga kumwa.
25 Zvondaitetemera ndizvona zvandigumira,Zvondaithya zvandiitikira.
26 Andina runyararo, andizivi kugarisika, nee kuzorora,Matambujiko ari kundondiviira basi.”
Masoko o Pasi
^ Kana: “Munvhuriri wo rufu ngauitore.”
^ Kumima.
^ Gama ngo Gama: “Revhiyatani.”
^ Kana: “no vambzare; no vanoshanda pa banje ra mambo.”
^ Kana: “kurashwa.”
^ Vapone.
^ Kana: “Kurira.”
