Johani 11:1-57
11 Mwanarume umweni waidanijwa Razaro, waihwaja. Iyena waigara ku Bhetaniya no hambzaji jake mbiri, jinozwi Mariya na Marita.
2 Mariya uwu, ndiyena wakadururaya mafuta anonuhira mu soka ja Mambo no kujipukuta ngo vhuji rake; Razaro waihwajari wainga hama yake.
3 Majiyaya ake akatumira masoko kuna Jesu, okuti: “Mambo, shamwari yenyu yamunodaya maningi iri kuhwaja.”
4 Asi Jesu paakazvizwa wakati: “Kuhwaja uku akumuiti kuti afe, asi kunoita kuti Mwari akujwe. Mwana wa Mwari anozokujwa ngo pamusoro po ndhendha iyi.”
5 Jesu waida Marita, Mariya pamwepo na Razaro.
6 Asi paakazwa kuti Razaro waihwaja, wakagara njiku mbiri ku ndau kwaaingaro.
7 Perapo, vakavhunja vajiji vake kuti: “Ngatihwirirezve Judheya.”
8 Vajiji vakamuvhunja kuti: “Rabhi, pa mukuvo waperari Vajudha vaida kumufura ngo mapuwe, muri kuda kuendeyozve?”
9 Jesu wakadavira kuti: “Ruvheneko hwo masikati ahuiti nguva gumi na mbiri kani? Kudari mundhu ecifamba mu ruvheneko hwo masikati, aakhugunywi ngo ciri cese, ngokuti anovona ruvheneko hwo nyika.
10 Asi kudari mundhu ari wese akafamba no usiku, anokhugunywa, ngokuti aana ruvheneko.”
11 Paakapera kunanga zviro izvi, wakaengejera eciti: “Razaro shamwari yedu yavata. Asi inini ndinoendeyo komumusa.”
12 Vajiji vake vakamuvhunja kuti: “Mambo, kudari akavata, anozoita nane.”
13 Jesu wainga ecibhuya ngo pamusoro po kufa kwake. Asi ivona vainga vecirangarira kuti ari kunangira kuvata kokuzorora.
14 Jesu wakazovavhunja pambhene eciti: “Razaro wafa.
15 Zvadakaja ngokuti ndainga ndiciko. Zvandinoenda koita kondhono, zvinozovangisa rutendo hwenyu. Ngatendeyo.”
16 Tomasi waidanijwaya kuti, Manyambiri, wakavhunja vajiji vamweni kuti: “Ngatende tese, kuti tife naye.”
17 Jesu paakaguma, wakakhanda* Razaro waano njiku murongomuna ari muguva.*
18 Bhetaniya rainga phedo no Jerusarema pa mumango unokhwedera kuita makiromita matatu.
19 Vajudha vazinji vakaenda ka Marita na Mariya kuti vaende kokhuza* ngo pamusoro po rufu hwo hama yavo.
20 Marita paakazwa kuti Jesu ari kuviya, iyena wakaenda komutandamija;* asi Mariya wakasara ari pamuzi.
21 Marita wakavhunja Jesu kuti: “Mambo, kudari nomainga pano hama yangu aicaizofepi.
22 Pikija wari ndinozviziva kuti zvese zvamunokumbira kuna Mwari, Iyena anozomupa.”
23 Jesu wakamuvhunja kuti: “Hama yako inozomuka.”
24 Marita wakadavira kuti: “Ndinozviziva kuti anozomuka pa rumuko hwo njiku yo kupejisira.”
25 Jesu wakamuvhunja kuti: “Ndini rumuko no upenyu. Mundhu anonditenda, pikija akafa, anozovazve no upenyu;
26 mundhu wese anorarama* ecinditenda, aacazofi. Unozvitenda izvi?”
27 Iyena wakati: “Hina Mambo, ndinotenda kuti imwimwi ndimwi Kristu Mwana wa Mwari, wakaviya pa nyika.”
28 Paakapera kunanga izvi, iyena wakaenda kodanija Mariya, womuvhunja vari vega vovaviri kuti: “Mujijisi ari pano, ari kukudanija.”
29 Paakazwa izvi, Mariya wakamuka ngo kukasika woenda kuna Jesu.
30 Jesu wainga acito anghwina mu mutundhumo, asi wainga aciri pa ndau yaakasonganaya na Marita.
31 Vajudha vaingaya vakaviya kuzokhuza kuna Mariya, pavakamuvona ecimuka ngo kukasika, ivona vakamutevera, ngokuti vairangarira kuti ari kwenda kocemera* kuguva.*
32 Mariya paakaguma kwainga na Jesu, womuvona, wakagwadama pamberi po soka jake, womuvhunja kuti: “Mambo, kudari nomainga pano hama yangu aicaizofepi.”
33 Jesu paakavona Mariya ecicema* pamwepo no Vajudha vaiviya kwaari vecicema,* iyena wakasuruvara wohwajihwa maningi.
34 Iyena wakavavhunjisa kuti: “Makamuviga kwapi?” Ivona vakadavira kuti: “Mambo, izanyi kuzovona.”
35 Jesu wakatanga kucema.*
36 Ngo kuvona izvi, Vajudha vakatanga kunanga izvi: “Vonayi madire aaimuita!”
37 Asi vamweni vavo vainanga kuti: “Andiyepi waifununguraya meso o mapofu uwu! Waro ngenyi wakakonehwa kuponesa Razaro?”
38 Jesu paainga akasuruvara, ecihwajihwa mu mwoyo, iyena wakaenda kuguva.* Rainga guva ro bako rakafungwa ngo buwe.
39 Jesu wakati: “Vhisanyi buwero.” Marita hambzaji ya Razaro, wakati: “Mambo, wonuha wari, ngokuti joita njiku murongomuna.”
40 Jesu wakati: “Andizivi kukuvhunja kuti kudari ukatenda, unozovona ukuru hwa Mwari?”
41 Ngo kudaro, ivona vakavhisa buwe riya. Perapo, Jesu wakasota kudenga wonanga kuti: “Baba, ndinomubonga ngokuti munondizwa.
42 Ndinozviziva kuti imwimwi munondizwa mukuvo wese, asi ndabhuya izvi ngo ndava yo mbungano iri pano wari, kuti izive kuti ndimwi makandituma.”
43 Paakapera kunanga izvi, iyena wakakhuwa ngo izwi guru eciti: “Razaro, budai kunja!”
44 Mundhu waingaya akafa wakabuda kunja akapombehwa nguvo mu nyara no mumurenje. Iyena wainga akafukijwa mu meso make ngo nguvo jimweni. Jesu wakati kwavari: “Musujunurenyi, mukapeja, muregerenyi apinde.”
45 Ngo kudaro, Vajudha vazinji vainga vakaviya ka Mariya, pavakavona zvakaithwa ndi Jesu, vakamutenda.
46 Asi vamweni vavo vakaenda ku Vafarisi, vovavhunja zvainga zvaithwa ndi Jesu.
47 Vapiri vakuru no Vafarisi vakaungana mu Sinedhriyo, vonanga kuti: “Toitenyi wari? Ngokuti mundhu uwu ari kuita mushamaiso yakawanda maningi.
48 Tikambhera ngo kumusiya eciita izvi, vese vanopera kumutenda. Varoma vanozoviya votora ndau* yedu no jinja redu.”
49 Asi umwe wavo, Khaifasi, wainga mupiri mukuru mu gore rondhoro, wakati kwavari: “Apana camunoziva.
50 Amutorangariri kuti kufa ko mundhu umwe kunozoita kuti mubesereke kuciripi kuti jinja rese riparajwe.”
51 Iyena aazivi kunanga izvi ngo kuda kwake, asi zvecivoneka kuti wainga mupiri mukuru mu gore rondhoro, iyena wakaporofeta kuti Jesu waizofira Vajudha.
52 Aacaizofirepi Vajudha basi, iyena waizounganijavo pamwepo vana va Mwari vainga vakaparajana kuti vaite cikwata cimwe.
53 Kuvhira pa njiku yondhoyo, ivona vakazwirana kuti vamuuraye.
54 Ngo kudaro, Jesu aazivi kuzofambazve pambhene pakati po Vajudha, asi wakavheyo woenda ku ndharaundha iri phedo no zvipare ku dhorobha rinodanijwa kuti Efraimi, wogara kondhoyo no vajiji vake.
55 Phasika yo Vajudha yainga yecikhwedera. Vandhu vazinji vaivha mu ndharaundha, vakaenda ku Jerusarema Phasika icito yatanga kuti vajicenese mukuzwirana no Mutemo.
56 Ivona vaipsaka Jesu, vecivhunjana vakaima mu themberi kuti: “Munovona kudini? Kureva kuti iyena aacazovii ku mutambo?”
57 Asi vapiri vakuru no Vafarisi vainga vakananga kuti ari wese anoziva kuna Jesu, waidikana kuvavhunja, kuti vaende komusunga.
Masoko o Pasi
^ wakawana.
^ Kana: “guva rinoceukijwa.”
^ Kana: “kunyaraja.”
^ kokhinga.
^ anopona.
^ Kana: “koririra.”
^ Kana: “guva rinoceukijwa.”
^ Kana: “ecirira.”
^ Kana: “vecirira.”
^ Kana: “kurira.”
^ Kana: “guva rinoceukijwa.”
^ Kana kuti: “themberi.”
