Johani 18:1-40
18 Jesu paakapera kunanga zviro izvi, wakabuda no vajiji vake, wakaambuka mwombera umweni wo Bani ro Kedhroni, woenda kwainga no munda, wonghwina mu mundemo no vajiji vake.
2 Judha, waimutengesaya, waiizivavo ndau iyi, ngokuti Jesu no vajiji vake vaianja kuunganeyo.
3 Judha wakaendeyo no zvikwata zvo masoca no vangwariri vakatumwa ngo vapiri vakuru no vafarisi. Ivona vakaguma no mwenje,* zvibani* no mapanga.
4 Jesu eciziva zvese zvainga zvoda kuitika kwaari, wakaenda kumbeji kwavo, wovavhunjisa kuti: “Muri kupsaka ani?”
5 Ivona vakamudavira kuti: “Jesu wo Nazareta.” Iyena wakati kwavari: “Ndini.” Judha, mutengesi wake, waingavo wakaima navo.
6 Asi, Jesu paakananga kuti: “Ndini,” ivona vakafundurukira sure, vowa pasi.
7 Iyena wakavavhunjisazve kuti: “Muri kupsaka ani?” Ivona vakati: “Jesu wo Nazareta.”
8 Jesu wakavadavira kuti: “Ndapera kumuvhunja kare kuti ndini. Kudari mecindipsaka, regeranyi vandhu ava vapinde.”
9 Izvi zvakaitika kuti zvikwanirisike zvaainga akananga kuti: “Pa vaya vamakandipa, andizivi kuruza na umwe hake.”
10 Simoni Pedhru wainga ano banga. Iyena wakarivhomora, wotema muranda wo mupiri mukuru, womuceka njeve yake yo mukono muho. Zina ro muranda uwu rainga Markosi.
11 Jesu wakavhunja Pedhru kuti: “Dirai banga mu cinyede caro. Ndingaregera kumwa kopo yondakapuwa ndi Baba here?”
12 Masoca, mutungamiriri wo masoca no varindiri vo Vajudha vakabata Jesu, vomusunga.
13 Ivona vakatanga kuenda naye ka Anasi, vatezvara va Khaifasi, wainga mupiri mukuru mu gore rondhoro.
14 Khaifasi ndiyena wakavhunjaya Vajudha kuti zvaizovabesera kuti mundhu umwe afire vandhu.
15 Simoni Pedhru no mujiji umweni, vaitevera Jesu. Mujiji uwu waizivika ngo mupiri mukuru, iyena wakanghwina na Jesu mu ruvanje hwo mupiri mukuru,
16 asi Pedhru wakasara akaima ngo kunja ko musuvo. Ngo kudaro, mujiji umweni uwu, waizivikaya ngo mupiri mukuru, wakabuda kunja, wobhuya no mungwariri wo musuvo, perapo wonghwinisa Pedhru.
17 Muranda kaji* waingwarira musuvo, wakavhunjisa Pedhru kuti: “Imwimwi amuripivo umwe wo vajiji vo mundhu uwu?” Iyena wakati: “Andiripi.”
18 Varanda no varindiri vakabwakija muriro vokota ngokuti kwaitondhora. Pedhru waiimavo navo ecikota muriro.
19 Ngo kudaro, mutungamiriri wo vapiri wakavhunjisa Jesu ngo pamusoro po vajiji vake no zvaaijijisa.
20 Jesu wakamudavira kuti: “Ndakacumaera pamberi po vandhu vese. Ndaijijisa nguva jese mu masinagoga, mu themberi no ndau jese jaiitihwa musongano ngo Vajudha. Apana candaibhuira pa cifise-fise.
21 Muri kundivhunjisirenyi? Vhunjisanyi vakazwaya zvandakavavhunja. Ivona vanozviziva zvandakavavhunja.”
22 Jesu paakapera kunanga izvi, umwe wo varindiri wainga pondhopo, wakamutaka pama, womuvhunja kuti: “Ngenyi unodavira mutungamiriri wo vapiri ngo njira yakadari?”
23 Jesu wakamudavira kuti: “Kudari ndavereketa zviro zvakashata, ndivhunjei zvandabhuyaro; asi kudari ndavereketa zviro zvakanaka, waro uri kunditakirenyi?”
24 Jesu akasungwa, Anasi wakamuendesa ka Khaifasi wainga mupiri mukuru.
25 Simoni Pedhru wainga akaima ecikota muriro. Ivona vakati kwaari: “Iwewe auripivo umwe wo vajiji vake here?” Iyena wakaramba eciti: “Andiripi.”
26 Umwe wo varanda vo mupiri mukuru, waiita ukama no mwanarume wakacekwaya njeve ndi Pedhru, wakamuvhunjisa kuti: “Andizivi kukuvona na iyena mu munda?”
27 Asi Pedhru wakarambazve, pa mukuvo wondhowo jongwe rakarira.
28 Ivona vakatora Jesu kuvha ka Khaifasi, voenda naye ku nyumba ya govhernadhori. Ainga mangwanani matete. Asi ivona avazivi kunghwina mu nyumba ya govhernadhori, kuti vatame kusvipiswa ngokuti vainga vecienda koha Phasika.
29 Pirato wakabuda kuti asongane navo, wovavhunja kuti: “Muri kumupumbha ngo ndava yenyi mundhu uwu?”
30 Ivona vakamudavira kuti: “Kudari mundhu uwu acina ndava, aticaizomuviisa kwamuri.”
31 Ngo kudaro, Pirato wakati kwavari: “Mutorenyi mu mutonge mwega, mukuzwirana no mutemo wenyu.” Vajudha vakamuvhunja kuti: “Itusu atitendehwi kuuraya mundhu ari wese.”
32 Izvi zvakaitika kuti zvikwanirisike zvakananga Jesu ecitatija mafire aaida kuzoita.
33 Ngo kudaro, Pirato wakanghwinazve mu nyumba ya govhernadhori, wakadanija Jesu, womuvhunjisa kuti: “Ndiwe Mambo wo Vajudha?”
34 Jesu wakadavira kuti: “Uri kundivhunjisa kudaro ngo mavonero ako, kana kuti aripo wakuvhunja zviri zvese ngo pamusoro pangu?”
35 Pirato wakamudavira kuti: “Unorangarira kuti ndiri Mujudha kani? Ndakakupuwa ngo vandhu vo jinja rako no vapiri vakuru. Wakaitenyi?”
36 Jesu wakamudavira kuti: “Umambo hwangu ahuiti divi ro nyika ino. Umambo hwangu no hwaiita divi ro nyika ino, vabeseri vangu vaizohwa kuti nditame kuendeswa ku Vajudha. Zvokadi ngo zvokuti, Umambo hwangu ahuvhi mu nyika ino.”
37 Ngo kudaro, Pirato wakamuvhunjisa kuti: “Waro, iwewe uri mambo?” Jesu wakamudavira kuti: “Ndimwi muri kutozvinanga kuti ndiri mambo. Ngokuti ndizvona zvandakabarihwa no kuviya pa nyika, kuti ndiite ucapupu hwo cokwadi. Mundhu wese ari ku divi ro cokwadi, anozwa izwi rangu.”
38 Pirato wakamuvhunjisa kuti: “Cokwadi icinyi?”
Paakapera kunanga zviro izvi, wakabudazve kuti aende kosongana no Vajudha, wovavhunja kuti: “Andizivi kuwana ndava pa mundhu uwu.
39 Asi imwimwi muno cirovejeso cokuti ndibudise mundhu umwe pa mukuvo wo Phasika. Waro, munoda kuti ndimubudisire Mambo wo Vajudha?”
40 Ivona vakakhuwazve veciti: “Mucabudisa mundhu uwu. Budisanyi Bharabhasi.” Bharabhasi wainga mbavha.
