Johani 8:12-59
8 12 Jesu wakavavhunjazve kuti: “Ndiri ruvheneko hwo nyika. Wiya anonditevera aazofambi mucidima, asi anozowana ruvheneko hwo upenyu.”
13 Ngo kudaro, Vafarisi vakati kwaari: “Uri kujiitira wega ucapupu; asi ucapupu hwako asipi hwokadi.”
14 Jesu wakavadavira kuti: “Pikija ndikajiitira ndega ucapupu, ucapupu hwangu ngo hwokadi, ngokuti ndinokuziva kwandakavha no kwandiri kwenda. Asi imwimwi amukuzivi kwandakavha no kwandiri kwenda.
15 Imwimwi munotonga mukuzwirana no murangariro wo vandhu;* asi inini anditongi mundhu ari wese.
16 Pikija ndecitonga, matongero angu ngo ocokwadi, ngokuti andiripi ndega, asi Baba vakandituma vana inini.
17 Cimwenizve, mu Mutemo wenyu makatahwa kuti: ‘Ucapupu hwo vandhu vaviri ngo hwocokwadi.’
18 Inini ndiri kujiitira ndega ucapupu. Baba vakandituma vanondiitiravo ucapupu.”
19 Perapo ivona vakati kwaari: “Vari kwapi Babako?” Jesu wakavadavira kuti: “Imwimwi amundizivi, amuvazivivo Babangu. Kudari nomaindiziva, maizozivavo Babangu.”
20 Iyena waivereketa izvi ari pandau yo kuvigira mare paainga ejijisa mu themberi. Asi apana wakamusunga ngokuti nguva yake yainga icito yakwana.
21 Ngo kudaro, iyena wakavavhunjazve kuti: “Ndiri kupinda, munozondipsanga. Imwimwi munozofira mu zvishaishi zvenyu. Kwandinoenda, imwimwi amukwanisi kugumeyo.”
22 Vajudha vakatanga kunanga kuti: “Ari kuda kujiuraya kani? Ngenyi iyena anonanga kuti: ‘Kwandinoenda imwimwi amukwanisi kugumeyo?’”
23 Iyena wakaenderera mberi ecivavhunja kuti: “Imwimwi muri vopasi pano; asi inini ndiri wo kudenga. Imwimwi munovha mu nyika ino; asi inini andivhi mu nyika ino.”
24 Ndizvona zvinondiitisa kuti ndimuvhunje kudari: Imwimwi munozofira mu zvishaishi zvenyu. Ngokuti, kudari mukatama kutenda kuti inini ndini wandakanangaya, imwimwi munozofira mu zvishaishi zvenyu.”
25 Ivona vakatanga kumuvhunjisa kuti: “Ndiwe ani?” Jesu wakavapingura kuti: “Ngenyi ndiri kundovereketa na imwimwi?
26 Ndino zviro zvakawanda zvandinoda kubhuya ngo pamusoro penyu. Pano shwiro jakawanda jandinodikana kuzotonga. Kunasa kunanga, Wiya wakandituma ngo wocokwadi, zvandakazwa ndiyena ndiri kuzvivhunja nyika.”
27 Ivona avazivi kuzwisisa kuti iyena waivavhunja ngo pamusoro pa Baba.
28 Jesu wakati: “Pamunozopera kupakaika Mwana wo mundhu pa mutanda, munozoziva kuti inini ndini wandakanangaya, kuti andiiti ciro ngo kuda kwangu; asi ndinovereketa zvandakajijiswa ndi Baba wangu.
29 Wiya wakandituma ana inini; iyena aazivi kundisiya ndega, ngokuti ndinoita zvinomudakajisa mukuvo wese.”
30 Paaibhuya zviro izvi, vandhu vazinji vaimutenda.
31 Jesu wakaenderera mberi ecivhunja Vajudha vaimutendaya kuti: “Kudari mukagara meciita zvandinonanga imwimwi muri vajiji vangu kamare,
32 munozoziva cokwadi. Cokwadi cinozomusujunura.”
33 Ivona vakamudavira kuti: “Itusu tiri mubarihwana wa Abhirahama, atizivi kumbova varanda vo mundhu ari wese. Waro ngenyi unonanga kuti: ‘Imwimwi munozosujunuhwa’?”
34 Jesu wakavadavira kuti: “Ndinomuvhunja zvokadi kuti, wese anoita cishaishi ndiyena muranda wo cishaishi.
35 Kusiyapo izvi, muranda aagari pamuzi kwenda no kwenda, asi mwana ndiyena anogarepo kwenda no kwenda.
36 Kudari Mwana akamusujunura, munozova makasujunukadi kamare.
37 Ndinozviziva kuti imwimwi muri mubarihwana wa Abhirahama. Asi imwimwi munopsaka kundiuraya ngokuti amutendi masoko angu.*
38 Ndinobhuya zviro zvandakavona pandainga na Baba wangu, asi imwimwi munobhuya zviro zvamakazwa ndi baba wenyu.”
39 Ivona vakamupingura kuti: “Baba wedu ndi Abhirahama.” Jesu wakati kwavari: “Kudari nomainga vana va Abhirahama, maizoita mabasa a Abhirahama.
40 Asi wari imwimwi muri kupsaka kuuraya inini, mundhu wakamuvhunja cokwadi candakazwa ndi Mwari. Abhirahama aazivi kumboita zvakadaro.
41 Muri kuita mabasa a baba wenyu.” Ivona vakati kwaari: “Itusu atiripi vana vo uhure;* tina Baba umwe basi, Mwari.”
42 Jesu wakati kwavari: “Nokwainga kuti Mwari ndi Baba wenyu, maizondida, ngokuti ndakavha ka Mwari, ndoviya pasi pano. Andizivi kuviya ngo kuda kwangu asi ndakaviya ngo kuda ka Wiya wakandituma.
43 Ngenyi amuzwisisi zvandiri kunangari? Ngokuti amukwanisi kuzwa masoko angu.
44 Imwimwi munovha ka baba wenyu Dhiyabhu, munoda kuita kuda ka baba wenyu. Iyena wainga muurayi kuvhira pa kutanga, aazivi kugara mu cokwadi ngokuti aadi cokwadi. Paanovereketa manyepo anoita kuda kwake ngokuti iyena ndiyena munyepi. Ndiyenazve baba wo kunyepa.
45 Asi imwimwi amunditendi ngokuti ndiri kumuvhunja cokwadi.
46 Ndiyani angakwanisa kunanga pambhene kuti inini ndino cishaishi? Kudari ndecivereketa cokwadi, waro ngenyi amunditendi?
47 Wiya anovha kuna Mwari anozwa masoko a Mwari. Ndizvona zvinomuitisa kuti mutame kuzwa, ngokuti amuvhi ka Mwari.”
48 Vajudha vakamudavira kuti: “Atizivi kunanga kuti, ‘Iwewe uri Musamariya, no kutizve uno dhimoni’?”
49 Jesu wakavadavira kuti: “Andina dhimoni inini, asi ndiri kukuja Baba wangu, imwimwi mondishora.
50 Asi inini andiripi kupsaka kukujwa kwangu; ndi Mwari anoda kuti ndikujwe. Ndiyenazve anotonga.
51 Ndinomuvhunja zvokadi kuti, kudari ari wese akazwira masoko angu, iyena aazofi.”
52 Vajudha vakati kwaari: “Wari taakuziva kuti iwewe uno dhimoni. Abhirahama wakafa, vaporofeti vakafavo, asi iwewe unoti: ‘Ari wese akazwira masoko angu, iyena aazofi.’
53 Iwewe uri mukuru kupinda baba wedu Abhirahama vakafaya? Vaporofeti vakafavo. Unojiita ani iwewe?”
54 Jesu wakadavira kuti: “Kudari ndecijikuja ndega, kujikuja kwangu akushandi. Ndi Babangu vanondikuja, vamunonangaya kuti nga Mwari wenyu.
55 Imwimwi amuvazivi, asi inini ndinovaziva. Kudari ndikananga kuti andivazivi, ndinozova munyepi, inga ndimwi. Asi inini ndinovaziva no kuita zvavanonanga.
56 Baba wenyu Abhirahama vakadakara maningi vecivetera kuvona njiku yangu, ivona vakaivona vodakara.”
57 Vajudha vakamuvhuja kuti: “Iwewe auna makumashanu o makore. Waro wakazomuvonesa kudini Abhirahama?”
58 Jesu wakavadavira kuti: “Ndinomuvhunja zvokadi kuti Abhirahama acito abahwa, inini ndainga ndaavepo kare.”
59 Ivona vakaboja mapuwe kuti vamufure, asi Jesu wakafindara, wobuda mu themberi.
Masoko o Pasi
^ Gama ngo Gama: “no nyama.”
^ Kana: “masoko angu aabudiriri mukati mwenyu.”
^ Mu Cigiriki, por·nei′a. Vonanyi Kudurujihwa ko Magama.
