Mabasa o Vapostori 10:1-48
10 Mu Sezareya mainga no mwanarume waidanijwa kuti Korneriyo, mutungamiriri wo masoca* wo cikwata caidanijwa kuti cikwata co Itariya.*
2 Iyena wainamata Mwari no mbhuri yake yese, waiitira zvakanaka varombo no kuita mukumbiro jo kudeketera mukuvo wese kuna Mwari.
3 Pajaikhwedera kuita nguva ndhatu jo madeko,* Korneriyo wakava no civoniso co ngirozi ya Mwari yeciviya kwaari, yeciti: “Korneriyo!”
4 Iyena wakairingisa, ecithya, wovhunjisa kuti: “Mambo, munoda kuti ndiitenyi?” Iyona yakati kwaari: “Mwari wazwa mukumbiro jako no kuvona kubesa kwaunoita varombo.
5 Waro tumai vandhu vaende Jope, vaende kodanija mwanarume anozwi Simoni, anodanijwa kuti Pedhru.
6 Mwanarume uwu ari kugara pa nyumba ya Simoni, musukuti wo matovo, nyumba yake iri mumbhiripiri mo jombe.”
7 Ngirozi yakabhuyaya naye payakandopinda, iyena wakadanija vashandiri vake vaviri no musoca waithya Mwari pa vese vaimushandira,
8 wovavhunja zviro zvese, perapo wovatuma kuenda Jope.
9 Pa njiku yakatevera, pavaienderera mberi veciita hwendo no kucumaira mu dhorobha, Pedhru wakakhwira panyezuru po nyumba koita mukumbiro, pajaikhwedera kuita nguva gumi na mbiri jo masikati.*
10 Asi iyena wakazwa maningi njara, woda kuha. Pavainga vecinasirira zvokuha, iyena wakava no civoniso,
11 wakavona kudenga kwakafununguka no ciro cakaezana no jira rakakura, recideruswa ngo mativi marongomuna o rupiko hwaro.
12 Mukati maro mainga no mushovo wese wo zvinyama zvo makumbo marongomuna, zvinogwezva pasi pano no shiri jo mudenga.
13 Wakazwa izwi recimuvhunja kuti: “Pedhru, mukai, urayai, uhe!”
14 Pedhru wakadavira kuti: “Mambo, azviiti, ngokuti andizivi kumboha zviro zvinorambijwa no zvicizivi kucena mu kuzwirana no mutemo.”
15 Izwi riya rakabhuyazve naye hwocipiri, reciti: “Ucadanija zviro zvakaceneswa ndi Mwari kuti izviro zvakasvipiswa.”
16 Zvakaitikazve hwocitatu, perapo jira riya rakapindiswa kudenga ngo kukasika.
17 Pedhru paainga acarangarira zvaida kureva civoniso caakavonari, vandhu vakatumwaya ndi Korneriyo vakavhunjisa kuti ngokwapi kunowanika nyumba ya Simoni, voima pa musuvo.
18 Ivona vakadanija veno vo nyumba, vovhunjisa kuti dangani pano mundhu anozwi Simoni, anodanijwa kuti Pedhru.
19 Pedhru paainga acarangarira ngo pamusoro po civoniso ciya, mujimu mucena wakamuvhunja kuti: “Vonai! Vanarume vatatu vari kukupsaka.
20 Waro mukai, derukai* upinde navo, ucadokana-kana ciri cese, ngokuti ndini ndavatuma.”
21 Perapo Pedhru wakaderuka, wovhunja vandhu vaya kuti: “Ndiri pano, mundhu wamuri kupsakaro. Mazirenyi pano?”
22 Ivona vakati: “Korneriyo, mutungamiriri wo masoca, mundhu wakarurama ecithya Mwari, mundhu anoitihwa ucapupu hwakanaka ngo jinja rese ro Vajudha, wakavhunjwa ndi Mwari ecishandisa ngirozi kuti atume vandhu kuti vaviye kuzokudanija, uende kanyi kwake, azwe zvaunozonanga.”
23 Ngo kudaro, Pedhru wakavanghwinisa mumba, wovaashira.
Pa njiku yakatevera, iyena wakamuka wopinda navo, hama jimweni jo dhorobha ro Jope jakaendavo naye.
24 Pa njiku yakatevera, wakanghwina mu dhorobha ro Sezareya. Korneriyo wainga ecivavetera. Iyena wainga waunganija ukama hwake no shamwari jake jo phedo.
25 Pedhru paainga ecinghwina, Korneriyo wakaenda komutandamija, wowira pamberi po soka jake no kumugwadamira.
26 Asi Pedhru wakamumusa, womuvhunja kuti: “Mukai; inini ndiri mundhuvo.”
27 Paainga ecibhuya naye, wakanghwina, wokhanda* vandhu vakawanda vakaungana.
28 Pedhru wakati kwavari: “Imwimwi munonasa kuzviziva kuti azvitendehwi kuti Mujudha ashamwarijane kana kukhwederera mundhu aciripi Mujudha, asi Mwari wakanditatija kuti andidikani kudanija mundhu kuti wakasvipiswa.
29 Ngo kudaro, pamandidanija, ndaviya ngo kukasika. Waro mandidanijirenyi?”
30 Korneriyo wakati: “Joita njiku murongomuna kuvhira pandakapera kuita mukumbiro mumba mangu pa nguva jino, nguva ndhatu jo madeko.* Ngo civhumbu, kumbeji kwangu kwakaima mundhu wakasimira nguvo jinomonikira,
31 wonanga kuti: ‘Korneriyo, Mwari wazwa mukumbiro wako, iyena warangarira zvakanaka zvaunoitira varombo.
32 Ngo kudaro, tumai vandhu vaende ku dhorobha ro Jope kodanija Simoni anozivika ngo zina ro kuti Pedhru. Mwanarume uwu ari pamuzi pa Simoni musukuti wo matovo, phedo no jombe.’
33 Ndakamutuma mundhu ngo kukasika kuti aende komudanija, imwimwi manasa ngo kuviya kuno. Waro itusu tese tiri pano, pamberi pa Mwari, kuti tizwe zviro zvese zvamakavhunjwa ndi Jehovha* kuti munange.”
34 Ngo kudaro, Pedhru wakatanga kuvereketa, eciti: “Wari ndiri kunasa kuzwisisa kuti Mwari aakheti,
35 asi iyena anoashira vandhu vanomuthya no vanoita zvakanaka vo majinja ese.
36 Iyena watumira soko rake ku vana vo Iziraeri ecivazivisa masoko akanaka o runyararo, ecishandisa Jesu Kristu. Jesu ndiyena Mambo o vandhu vese.
37 Imwimwi munomaziva masoko aibhuiwa mu Judheya mwese, kutangira Garireya pasure po rubhabhatijo waicumaehwa ndi Johani:
38 Ngo pamusoro pa Jesu wakavha Nazareta no kuzojwa ndi Mwari ngo mujimu mucena no simba. Iyena wakafamba mu ndharaundha eciita zvakanaka no kurapa vandhu vese vainga vakabatwa ndi Dhiyabhu, ngokuti Mwari wainga na iyena.
39 Itusu tinoita ucapupu wo zviro zvese zvakaitika mu nyika yo Vajudha no mu Jerusarema. Asi ivona vakamuuraya ngo kumukohomera pa mutanda.*
40 Mwari wakamumusa pa njiku yo citatu, womuita kuti avoneke.
41 Iyena aazivi kuvoneka ngo vandhu vese, asi wakavoneka ndisu basi vandhu vainga vakasanwa ndi Mwari, vanoha no kumwa naye pasure pokumuswa ko vakafa.
42 Iyena wakativhunja kuti ticumaere vandhu no kuvaiitira ucapupu hwakaperera hwokuti ndiyena wakagajwa ndi Mwari kuti ave mutongi wo vapenye no vakafa.
43 Vaporofeti vese vaiita ucapupu hwake hwokuti mundhu wese anomutenda anoregerehwa zvishaishi ngo ndava yo zina rake.”
44 Pedhru paainga acabhuya ngo pamusoro po masoko aya, mujimu mucena wakaderukira ku vandhu vese vaizwa soko.
45 Vatendi vokusokwa vainga vakaza na Pedhru, vaikahamara, ngokuti cipo co mwoyo wese co mujimu mucena caidururihwavo ku vandhu vo majinja.
46 Ngokuti vaivazwa vecibhuya ndumi jo nyika jimweni vecikuja Mwari. Kuperapo, Pedhru wakananga kuti:
47 “Vandhu ava vaashira mujimu mucena inga ndisu, aripo ariwese angavarambija kuti vatame kubhabhatijwa here?”
48 Ngo kudaro, iyena wakaita kuti vaende kobhabhatijwa ngo zina ra Jesu Kristu. Ivona vakamukumbira kuti vagare naye ku mazuva manganani.
Masoko o Pasi
^ Waivonerera zana ro masoca.
^ Ici cainga cikwata co mazana matandhatu (600) o masoca o Ciroma.
^ Gama ngo Gama: “nguva yocipfumbamwe.”
^ Gama ngo Gama: “nguva yocitandhatu.”
^ Kana: “bzukai.”
^ Kana: “wowana.”
^ Gama ngo Gama: “nguva yocipfumbamwe.”
^ Vonanyi Kudurujihwa ko Magama.
^ Kana: “muti.”
