Mabasa o Vapostori 22:1-30
22 “Hama no majibaba, izwanyi kujijivirira kwandinoita pamberi penyu.”
2 Ivona pavakazwa kuti waibhuya navo ngo Cihebheru, ivona vakanyararisa maningi. Iyena wakananga kuti:
3 “Inini ndiri Mujudha wakabarihwa mu Tarso dhorobha ro Sirisiya, asi pandainga ndiri mu dhorobha iri, ndakajijiswa ndi Gamariyeri. Ndakajijiswa kubatisisa Mutemo wa Mosi pa zvese, ndova mushandiri wa Mwari inga zvamuri kuitari imwimwi mwese, nyamasi.
4 Ndaiteverera vandhu vaitevera Gwanja ro Cokwadi iri no kuvauraya no kuvasunga no kuvadira mukadheya; vanarume no vanakaji.
5 Mupiri mukuru no vakuru vese vakaunganari, vangatozviitira ucapupu. Ivona vakandipa karata kuti ndiyende najo ku hama jiri mu Dhamasko, inini ndainga ndiri mugwanja kuti ndiyende kotora vainga vakasungwa kondhoyo kuti vaviye kuzotambujwa mu Jerusarema.
6 “Asi pandainga mu gwanja kwenda ku Dhamasko, ainga aa masikati, ngo civhumbu, ndakatendenejwa ngo ruvheneko hukuru hwaivha kudenga,
7 ndakawa pasi, ndozwa izwi recindivhunja kuti: ‘Sauro, Sauro, uri kunditeverera ngo ndava yenyi?’
8 Inini ndakavhunjisa kuti: ‘Ndimwi ani?’ Iyena wakandidavira kuti: ‘Ndini Jesu wo Nazareta, wauri kutevereraro.’
9 Vanarume vandainga navo vakavona ruvheneko, asi avazivi kuzwa izwi raibhuyaya na inini.
10 Inini ndakavhunjisa kuti: ‘Waro ndoitenyi, Mambo?’ Mambo wakandidavira kuti: ‘Mukai, endai Dhamasko, kondhoyo unozovhunjwa zviro zvese zvawakagajwa kuti uzviite.’
11 Zvecivoneka kuti andicaikwanisa kuvona ciri cese ngo ndava yo kumonikira ko ruvheneko, ndakaguma mu Dhamasko ndecisesejwa ngo vanarume vandainga navo.
12 “Perapo, mwanarume umweni waidanijwa kuti Ananiya, waireremeja Mwari mukuzwirana no Mutemo, ecisimbwa ngo Vajudha vese vaigara kondhoyo,
13 wakaza kondiri. Iyena wakaima phedo na inini wondivhunja kuti: ‘Sauro, hama yangu, majiso ako ngaafunugukezve!’ Pa nguva yondhoyo kamare, ndakafunungura majiso angu, ndomuvona.
14 Iyena wakati: ‘Mwari wo majicekuru edu wakusana kuti uzive kuda kwake, uvone mururami no kuzwa izwi rinovha pa muromo pake,
15 ngokuti iwewe unozova capupu cake pakati po vandhu vese ngo pamusoro po zviro zvowavonari no zvawazwa.
16 Waro ngenyi uri kunonoka? Mukai ubhabhatijwe no kusuka zvishaishi zvako ngo kudanija zina rake.’
17 “Asi, pandakahwirira mu Jerusarema, ndeciita mukumbiro mu themberi, ndakavona citatijo
18 ndozwa Mambo vecindivhunja kuti: ‘Budai mu Jerusarema ngo kukasika, ngokuti avazotendi ucapupu hwako ngo pamusoro pangu.’
19 Inini ndakati: ‘Mambo, ivona vanonasa kuzviziva kuti ndaidira mukadheya no kutaka vandhu vaimutenda vainga mu masinagoga ese;
20 Estefano capupu cenyu paainga eciurawa, inini ndaingepovo ndecitendera zvavaiitaro no kungwarira nguvo jo vandhu vaimuuraya.’
21 Ngo kudaro, iyena wakandivhunja kuti: ‘Endai, ngokuti ndinozokutuma ku majinja ari ndhambo.’”
22 Ivona vakamupurukira mbhera paakananga masoko aya. Tevere vakamusa maizwi avo, veciti: “Urayanyi mundhu uwu, ngokuti aafaneri kupona!”
23 Zvecivoneka kuti vaindokhuwa vecikhandira nguvo javo no kumwaraja bukuta mudenga,
24 mutungamiriri wo masoca wakatuma masoca kuti aende kotora Pauro kuti aende naye kunogara masoca, wovavhunja kuti waidikana kumutaka kuti adure zvaiitisaro kuti vandhu vamukhuwire ngo njira yakadaro.
25 Asi pavainga vamusunga kuti vamutake, Pauro wakaima wovhunjisa mukuru wo masoca waiimepo kuti: “Imwimwi munotendehwa ngo mutemo kutaka mugari wo Roma, acina ndava?”
26 Mukuru wo masoca paakazvizwa, wakaenda ku mutungamiriri wo masoca, womuvhunja masoko aya, eciti: “Imwimwi muri kuda kumuitenyi? Mundhu uwu mugari wo Roma.”
27 Mutungamiriri wo masoca wakamukhwederera, womuvhunjisa kuti: “Ndivhunjei, iwewe uri Muroma?” Iyena wakadavira kuti: “Hina.”
28 Mutungamiriri wo masoca wakamuvhunja kuti: “Inini ndakapagari mare yakawanda kuti ndive Muroma.” Pauro wakadavira kuti: “Inini ndakabahwa ndiri Muroma.”
29 Pa nguva yondhoyo, vanarume vaida kumuvhunjisa no kumutambuja, vakafunduruka ngo kukasika. Mutungamiriri wo masoca wakathya maningi ngo kuziva kuti iyena wainga Muroma, nokuti wainga akamusunga.
30 Pa njiku yakazotevera, ecida kuziva kuti ngenyi wainga ecipumbhwa ngo Vajudha, iyena wakamusujunura wodanija vapiri vakuru no Sinedhriyo yese kuti vaungane. Iyena wakaviisa Pauro, womudira pakati po vandhu vese.
