Mabasa o Vapostori 26:1-32
26 Agripa wakavhunja Pauro kuti: “Iwewe unotendehwa kujiinikira.” Perapo Pauro wakatambanuja nyara jake, wonanga kuti:
2 “Mambo Agripa, ngo pamusoro po zviro zvandiri kupumbhwari ngo Vajudha, ndiri kudakara ngokuti ndiri kujijivirira pamberi penyu njiku ya nyamasi,
3 maningi-ningi ngokuti munonasa kuziva zvirovejeso zvo Vajudha no kutama kuzwana kuri pakati pavo. Ngo kudaro, ndiri kumukumbira kuti mundipurukire ngo kusengerera.
4 “Zvokadi, upenyu hwandainga nahwo kuvhira pa udoko hwangu pakati po vandhu vangu no mu Jerusarema, hunonasa kuzivika ngo Vajudha vese
5 vaindiziva kuvhira kare. Kudari ivona vakada, vangamuvhunja kuti inini ndiri wo manamatiro o Vafarisi. Manamatiro aya anobatisisa maningi zvitendwa zvao kupinda Vajudha vamweni.
6 Asi wari, ndiri kutongwa ngo ndava yo vetero yakagondeswa majicekuru edu ndi Mwari;
7 cigondiso ici ngo caivetehwavo ngo gumi ro mavhumbo no mavhumbo maviri kuti acivone cecikwanirisika ngo kuita basa rakacena ngo mwoyo wese usiku no masikati. Mambo, inini ndiri kupumbhwa ngo Vajudha ngo ndava yo vetero iyi.
8 “Ngenyi imwimwi amutendi kuti Mwari anokwanisa kumusa vandhu vakafa?
9 Inini ndainga mundhu wairangarira kuti ndaidikana kuhwisa zina ra Jesu wo Nazareta.
10 Ndizvona kamare zvandakaita ku Jerusarema, ndakadira mu kadheya vashandiri vakawanda va Mwari, ngokuti ndakavhunjwa ngo vapiri vakuru. Ivona pavaida kuurawa, inini ndaizvitendera.
11 Mu masinagoga ese inini ndaivapanica kuti varambe zvavaitenda. Zvecivoneka kuti ndainga ndino ushungu maningi na ivona, ndakavateverera mbhera kumadhorobha ari ndhambo.
12 “Njiku imweni, ndainga ndecienda ku Dhamasko ngokuti ndainga ndatumwa ngo vapiri vakuru kuti ndiende kotambuja vajiji kondhoyo.
13 Amambo, ainga masikati, ndakavona ruvheneko hwaipindirija kubwaka ko zuva, hwaivha kudenga, hwakanditendeneja pamwepo no vandhu vandainga navo.
14 Tese patakawa pasi, ndakazwa izwi recindivhunja ngo ndimi yo Cihebheru kuti: ‘Sauro, Sauro, uri kunditeverera ngo ndava yenyi? Uri kujitambuja ngo kuenderera mberi wecithaura ndonga yakapinjira.’*
15 Asi inini ndakavhunjisa kuti: ‘Ndimwi ani?’ Iyena wakati: ‘Ndini Jesu, wauri kutevereraro.
16 Asi mukai uime. Inini ndakubudira kuti ndikukhete kuti uve mushandiri wangu no kuita ucapupu ku zviro zvawakavona no zvandinozokutatija ngo pamusoro pangu.
17 Inini ndinozokuponesa pakati po vandhu ava no majinja aunozowana kwandinokutumira
18 kuti ufunungure majiso avo, uvatendeuje kuvha ku cidima kuti vaviye ku ruvheneko no kuvavhisa mu simba ra Sathana kuti vaviye ka Mwari, kuti varegerehwe zvishaishi zvavo, vowana utaka pakati po vakaceneswa ngo kunditenda.’
19 “Waro Amambo Agripa, inini andizivi kuramba kuzwira civoniso co kudenga,
20 asi ndakatangira kuna vaya vari mu Dhamasko perapo ndoenda kwavainga mu Jerusarema, pomwe no vese vari mu ndharaundha yo Judheya no vo kumajinja ndakavavhunja masoko okuti vaidikana kukhauya vahwirire kuna Mwari ngo kuita mabasa aivonesa kukhauya kwavo.
21 Izvi ndizvona zvakaitisa kuti Vajudha vandisunge mu themberi no kueja kundiuraya.
22 Zvecivoneka kuti Mwari ari kundibesera, mbhera na nyamasi ndiciri kuita ucapupu ku vadoko no vakuru. Ndinonanga basi zvainga zvakatahwa ngo vaporofeti pomwe na Mosi kuti zvaizoitika
23 veciti: Kristu waizotambujika. Zvecivoneka kuti iyena waizova wokutanga kumuswa ko vakafa, iyena waizozivisa ruvheneko ku Vajudha no vo kumajinja amweni.”
24 Pauro paainga ecijiinikira, Festo wakamima* ngo izwi guru eciti: “Iwewe uri kupenga Pauro! Uzivi hwako huri kukupengesa!”
25 Asi Pauro wakati: Andiripi kupenga Amambo Festo, asi ndiri kuvereketa zvokadi no zvino musoro.
26 Zvokadi ngo zvokuti, imwimwi mambo muri kubhuyari na inini ndakasujunuka, munonasa kuzviziva zviro izvi; ndakakhohwa kuti apana ciro cakaitika camucizivi kuvona. Ngokuti apana cakaitihwa pacifise-fise.
27 Imwimwi Mambo Agripa munotenda zvakatahwa ngo Vaporofeti? Ndinozviziva kuti munotenda.”
28 Asi Agripa wakavhunja Pauro kuti: “Pa nguva shomani, wadondikhohwesa kuti ndive Mukristu.”
29 Pauro wakadavira kudari: “Inini ndinokumbira kuna Mwari, kudari zvikaitika pa nguva doko kana pa nguva yakareba, kuciripi imwimwi basi, asi ku vese vaya vari kundizwari nyamasi kuti vaezane na inini, asi vacina njinga.”
30 Perapo mambo wakamuka, govhernadhori na Bherenise no vandhu vaaigara pasi navo vakamukavo.
31 Asi pavainga vecipinda, vaivhunjana ngo cavo kuti: “Mwanarume uwu apana caari kuita cingamuuraisa kana kuti kumudirisa mu kadheya.”
32 Agripa wakavhunja Festo kuti: “Kudari mwanarume uwu naacizivi kukumbira kwenda ka Sezari, waizodeno asujunuhwa.”
