Mateu 7:1-29
7 “Mucadotonga* kuti mutame kutongwa;
2 matongero amunoita, munozotongwavo ndiwona, mapimire amunoita, vanozomupimavo ndiwona.
3 Ngenyi unosota cimuti ciri mu jiso ro hama yako, ucikavoni zimuti riri mu jiso rako?
4 Ungavhunjisa kudini hama yako kuti: ‘Imai ndikuvhise cimuti ciri mu jiso rako,’ kuveni iwewe uno zimuti mu jiso rako?
5 Iwe mucengejeri! Tangai wavhisa zimuti riri mu jiso rako, perepo unozokwanisa kuvona ushoni mavhisire aungaita cimuti ciri mu jiso ro hama yako.
6 “Mucadopa imbhwa zviro zvakacena, mucadokhandirira nghumba maperora* enyu, kuti jitame kumacika-cika, perapo josika joviya kuzomuruma.
7 “Endereranyi mberi mecikumbira, munozopuwa; endereranyi mberi mecipsaka, munozowana; endereranyi mberi mecigogoja, munozofunungurihwa;
8 ngokuti wese anokumbira anopuwa, wese anopsaka anowana, wese anogogoja, anozofunungurihwa.
9 Pakati penyu, ndiyani anokumbihwa pau ngo mwanake, womupa buwe?
10 Akamukumbira hove, munozomupa nyoka?
11 Nee imwimwi vashaishi, munopekeja zvakanaka vana venyu. Ngo kudaro, Baba wenyu vo kumatenga vanozopekejavo zvakanaka maningi kuna vaya vanovakumbira.
12 “Zvese zvamunoda kuti vandhu vamuitire, ngo zvamunodikanavo kuvaitira. Izvi ngo zvinonangwaya ngo Mutemo no Vaporofeti.
13 “Nghwinanyi ngo musuvo mudoko, ngokuti musuvo wakapambhama wokura, igwanja rinoendesa kooparajwa, ndirona rinotevehwa ngo vazinji;
14 kuveni musuvo mudoko no gwanja doko, rinoendesa ku upenyu, vashoma ngo vanoriwana.
15 “Bhasopanyi vaporofeti vo kunyepa vanoviya komuri vakasimira dovo ro mavhuta, kuveni ngo mukati vari mapumbhi anokhuvaza.
16 Munozovaziva ngo mucero yavo. Vandhu vangakava uvha pa munanga, kana kukava makuyu pa bumburu here?
17 Mukufananavo, muti wese wakanaka unobara mucero jakanaka, asi muti wese wakashata unobara mucero jicikashandi.
18 Muti wakanaka aungabari mucero jicikashandi, muti wakashata aungabarivo mucero jakanaka.
19 Muti wese ucingabari mucero jakanaka, unotemwa wokhandihwa pa muriro.
20 Ngo kudaro, vandhu vakadaro munozovaziva ngo mucero javo.
21 “Asipi vese vanoti kwandiri: ‘Mambo, Mambo,’ vanozonghwina mu Umambo hwo kudenga, asi vanozonghwinemo basi ndi vaya vanoita kuda ka Babangu vari kumatenga.
22 Mu njikuyo vazinji vanozoti: ‘Mambo, Mambo, atizivi kuporofita ngo zina renyu, togogomera madhimoni ngo zina renyu no kuita mushamaiso jakawanda ngo zina renyu?’
23 Perapo ndinozovavhunja kuti: ‘Andimuzivi! Ivhanyi pano, imwimwi vaiti vo zvakashata!’
24 “Asi, wiya anozwa zvandinonanga wozviita, anozoezana no mundhu wakangwara wakavaka nyumba yake pa buwe.
25 Nvura yakana, usore* hwakazara, mbhepo yakavhunguza yozungunyisa nyumba, asi iyona aizivi kuwa ngokuti yakavakwa pa buwe.
26 Kusiyapo izvo, wiya anozwa zvandinonanga wotama kuzviita, anozoezana no rethe rakavaka nyumba yaro pa musanga.
27 Nvura yakana, usore* hwakazara, mbhepo yakavhunguza yozungunyisa nyumba, asi iyona yakawa, yopera kuphwanyika yese.”
28 Jesu paakapera kunanga izvi, mbungano yakakahamara ngo majijisiro ake,
29 ngokuti iyena waivajijisa zvaivha kuna Mwari kuciripi inga zvaiithwa ngo vatari vavo.
Masoko o Pasi
^ Gama ngo Gama: “regeranyi kutonga.”
^ Mapuwe o mutengo mukuru.
^ Kana: “ushau.”
^ Kana: “ushau.”
