Mazwi Akangwara 29:1-27
29 Mundhu anoenderera mberi akatindivara pasure po kupangihwa,Anozocangajwa ngo civhumbu, apana mutombo umweni.
2 Kudari vandhu vakanaka vakawanda,Vandhu vese vanodakara,
Asi vandhu vakashata vakatonga, vandhu vese vanogomera.
3 Mundhu anoda uzivi, anodakajisa baba wake,Asi mundhu anofamba no mahure, anorejareja upfumi hwake.
4 Mundhu anonasa kutonga shwiro, anogajanisa nyika yake,Asi mundhu anopsaka kufidhihwa,* anoimosha.
5 Mundhu anobata kumeso* mudoni wake, ari kujiteera murau* kuti abate makumbo ake.
6 Cishaishi co mundhu wakashata, ndiwona murau* kwaari,Asi mundhu wakanaka, anotamba ecikhuwa* ngo mudakaro.
7 Mundhu wakanaka, anoda kuti murombo agare ushoni,Asi mundhu wakashata, aana basa nazvo.
8 Vandhu vanobhumba, vanobwakija dhorobha rese,Asi vano uzivi, vanonyaraja ushungu.
9 Mundhu ano uzivi paanonesana no benji,Panova no kuzvikuja no kushorana, asi apana zvinotongwepo.
10 Vandhu vanouraya, vanonyenya mundhu acina ndava,Perapo vanopsaka kuuraya mundhu wakanaka.*
11 Benji, rinobudisa ushungu hwaro hwese,Asi mundhu wakangwara,
Anoenderera mberi akathiva no kujibata.
12 Kudari mutongi akapurutana* masoko okunyepa,Vashandiri vake vese vanova vakashata.
13 Murombo no mundhu anobzinyirira,* vese vakaezana,
Ngokuti Jehovha ndiyena anovaita kuti majiso avo,
Avone ruvheneko.*
14 Kudari mambo akatonga varombo acikakheti,Cigaro cake cinozondoramba ciripo.
15 Mushakwe no mbhangiro, zvinopa uzivi,Asi mwana anoregehwa eciita madiro ake,
Anopseruja mai wake.
16 Vandhu vakashata vakaengejeka,Zvishaishi zvinoengejekavo,
Asi vandhu vakanaka, vanozovona vandhu vakashata veciwa.
17 Pangirai mwana wako, iyena anozokuzoroja;Anozokudakajisa maningi.
18 Pacina ndhungamiriro jinovha kuna Mwari,Vandhu avangwaririki,
Asi vandhu vanozwira mutemo, vanodakara.
19 Mushandi, aajipangiri ngo magama basi,Ngokuti pikija ecitomazwisisa, iyena aazwiri.
20 Wakambovona mundhu anokasika kuvereketa?
Zvakareruka maningi kubesa benji, kupinda kubesa mundhu uwu.
21 Kudari mushandi akaenjwa kuvhira aciri mujaha,Anozopejisira ngo kuva mundhu acikabongi.
22 Mundhu anonyangajwa ngo kukasika, anobara mapope,Mundhu anogara ecida kunyangajwa, anoita zvishaishi zvakawanda.
23 Kujikuja ko mundhu, kunozomupseruja,Asi mundhu anojidodokesa, anozokujwa.
24 Mundhu anotamba no mbavha, anojinyenya ega,
Iyena kangaije angazwa kuti pari kudiwa ucapupu,*
Asi iyena aavereketi ciro.
25 Kuthya* mundhu, kunoendesa ku murau,*Asi mundhu anothemba Jehovha, anozojivirihwa.
26 Vandhu vazinji vanopsaka kwenda pamberi po* vatongi,Asi ndi Jehovha basi anotonga ngo njira yakarungama.
27 Mundhu wakashata, anonyenywa ngo mundhu wakanaka,Asi mundhu anofamba mu gwanja rakarungama,
Anonyenywa ngo mundhu wakashata.
Masoko o Pasi
^ Kana: “kudyekehwa.”
^ Kana: “Mundhu anofaeresa.”
^ Kana: “muravo.”
^ Kana: “muravo.”
^ Kana: “acimima.”
^ Kangaije: “Asi mundhu wakanaka, anopsaka kujivirira upenyu hwake.”
^ Kana: “wakapurukira.”
^ Kana: “anocikirira vamweni.”
^ Kana kuti, Iyena anovapa upenyu.
^ Kana: “kangaije anozwa mbhiko yo kutuka.”
^ Kana: “Kutetemera pamberi po.”
^ Kana: “muravo.”
^ Kangaije: “kupsaka kutendehwa ngo.”
