Nduyo 107:1-43
107 Bonganyi Jehovha ngokuti iyena wakanaka;Rudo hwake hucikacinji ahuna magumo.
2 Ngavanange izvi vaya vakaponeswa ndi Jehovha,Vese vaya vaakaponesa mu nyara jo muvengi,
3 Vese vaya vaakaunganija pa nyika,Kuvhira kumavhazuva mbhera kumavirira,Kuvhira kanjikazi mbhera kakusi.
4 Ivona vakaherereka mu bani vari mucipare;Avazivi kuwana gwanja raivaendesa ku dhorobha ravaizogara.
5 Ivona vainga no njara no nyota;Vainga vaaphedo no kufa ngo ndava yo kuremba.
6 Ivona vaienderera mberi vecideketerera Jehovha pavaitambujika;Iyena wakavaponesa pa nyatwa javo.
7 Iyena wakaita kuti vafambe ngo mu gwanja rakanakaKuti vagume ku dhorobha ravaidikana kwenda kogara.
8 Vandhu ngavabonge Jehovha ngo ndava yo rudo hwake hucikacinjiNgo ndava yo zviito zvake zvinoshamaisa zvaakaita kuti abesere vana vo vandhu.
9 Ngokuti iyena wakapekeja kumwa mundhu wainga no nyotaWogutisa wainga no njara ngo zviro zvakanaka.
10 Vamweni vaipona mu cidima cakakura maningi,Ivona vainga vakasungwa ngo matambujiko no magaragajero.
11 Ngokuti vainga vakapandukira soko ra Mwari;Ngokuti ivona avazivi kureremeja zano ro Mukuru-Kuru.
12 Ngo kudaro, iyena wakadodokesa mwoyo yavo wovaviisira matambujiko;Ivona vakakhugunyika votama mundhu wokubeswa ndiyena.
13 Ivona vakadaninja Jehovha kuti vabeswe pa matambujiko avo;Iyena wakavaponesa pa nyatwa javo.
14 Iyena wakavabudisa mu cidima cakakura,Wogura magaragajero avo.
15 Vandhu ngavabonge Jehovha ngo ndava yo rudo hwake hucikacinjiNgo ndava yo zviito zvake zvinoshamaisa zvaakaita kuti abesere vana vo vandhu.
16 Ngokuti iyena wakawisa musuvo jo utareWogura mugogo yo simbi.
17 Ivona vainga vacina uzivi, kunja kwa izvi vaitambujikaNgo ndava yo zvishaishi zvavo no kuposa kwavo.
18 Ivona vakaruza cido cokuha mushovo wese wo zvokuha;Ivona vainga vaaphedo maningi no kuda kufa.*
19 Ivona vaidaninja Jehovha kuti vabeswe pa matambujiko avo;Iyena waivaponesa pa nyatwa javo.
20 Iyena waitumira soko rake wovarapaNo kuvaponesa mu rindi rovainga vakawira.
21 Vandhu ngavabonge Jehovha ngo ndava yo rudo hwake hucikacinjiNgo ndava yo zviito zvake zvinoshamaisa zvaakaita kuti abesere vana vo vandhu.
22 Vandhu ngavaite mupiro jo kubongaNo kuzivisa mabasa ake vecikhuwa ngo kudakara.
23 Vaya vanoita hwendo mu jombe ngo piketi,No vaya vanoita nyagoso mu kumwa yakawanda,
24 Vakavona mabasa a JehovhaNo zviito zvake zvinoshamaisa mu jombe;
25 Ivona vakavona kuvhunguza ko mbhepo ngo ndava yo soko ra Mwari,Irona raimusa mavimbi o mu jombe.
26 Iwona aikhwira kwenda nyezuruEciwazve kwenda mu jombe.
Paanosongana no ngozi, cicunge cawo cinopera.
27 Iwona anothethereka inga mundhu wakarejera,Ngokuti uzivi hwawo hwese unopera.
28 Ngo kudaro, iwona anodeketerera Jehovha paanotambujika.Iyena wakavaponesa pa nyatwa javo.
29 Anonyaraja mbhepo;Anoita kuti mavimbi o mu jombe agajane.
30 Ivona vanodakara mavimbi paanogajana,Iyena anovatungamirira mbhera ku ndau yavanoda kuguma.
31 Vandhu ngavabonge Jehovha ngo ndava yo rudo hwake hucikacinjiNgo ndava yo zviito zvake zvinoshamaisa zvaakaita kuti abesere vana vo vandhu.
32 Ngavamukuje pakati po vandhu,No kumusimba pakati po vakuru.
33 Iyena anocinja murambo joita baniWocinja ndau jinobuda kumwa joita nyika yakaoma,
34 Anocinja mavhu ano ndimo omaita mavhu ano munyu acina ndimo,Ngo ndava yo ushati unoizwa ngo vaya vanogara mondhomo.
35 Iyena anocinja bani woriita makandhwa akazara ngo njanga.Wocinja nyika yakavoma woiita ndau inobuda kumwa.
36 Iyena anoita kuti vandhu vano njara vagare mondhomo,Kuti vavake dhorobha ravangagara.
37 Ivona vano minda no muuvhaInobara mucero jakawanda.
38 Iyena anovakomborera, ivona vowanda maningi;Aaregeri kuti n’gombe javo jipunguke.
39 Ivona vanovazve vashoma no kudodokeswa,Ngo ndava yo kuneswa, dambujiko no bonezi.
40 Iyena anopseruja vandhu vanoreremejwaWovaita kuti vambeye mu bani vacikavoni gwanja.
41 Asi anojivirira murombo kuti atame kuneswaWoita kuti mbhuri yake ive yakawanda maningi inga mushambi.
42 Vaya vakarungama vanovona izvi vodakara;Asi vese vacizivi kururama vanofunga muromo.
43 Mundhu wakangwara, anozovona zviro izviWozorangarijisisa ngo pamusoro po zviito zvo rudo hucikacinji hwa Jehovha.
Masoko o Pasi
^ Gama ngo Gama: “Ivona vainga vaaphedo no musuvo jo rufu.”
