Nduyo 19:1-14
Ku mutungamiriri. Nduyo ya Dhavhidhi.
19 Matenga anozivisa rukujo hwa Mwari;Iwona anozivisa basa ro nyara jake.
2 Njiku no njiku, kuzivisa kwazvo kunobuda inga kumwa,Usiku no usiku, zvinokhombija uzivi hwa Mwari.
3 Apana anovereketa, apana masoko;Izwi razvo ariziki.
4 Asi kutindhira kwazvo, kwagumira nyika yese,Masoko azvo, aguma mbhera kumagumo o nyika.
Kumatenga, iyena wadira tende kuitira zuva;
5 Rinobuda inga mwanarume ari kubuda mu kwartu yake yo mucadho;Rodakara inga mwanarume ano simba ari kugogoma mu gwanja rake.
6 Rinobuda mbhera kumagumo okumatenga,Rotenderera mbhera kumagumo amweni;Apana cakavigika cinotama kupiswa ndirona.
7 Mutemo wa Jehovha wakakwana, iwona unopa simba.
Zviceukijo zva Jehovha zvinothembeka, zvinopa ungwaru mundhu acizivi kungwara.
8 Mupango ya Jehovha yakarurama, inoita kuti mwoyo udakare;Mupango ya Jehovha yakacena, inovhenekera majiso.
9 Kuthya Jehovha kwakacena, kunogara mbhera narini.
Matongero a Jehovha ngo ocokwadi, iwona akarurama mu mativi ese.
10 Iwona anodiwa maningi kupinda goridhi,Kupinda goridhi rakawanda maningi roceneswa,Iwona anotapira maningi kupinda uci, kupinda uci unodondha ucivha musakama.
11 Mushandiri wenyu wakangwajwa ndiwona;Kumateveja kunoviisa mupfupo wakakura maningi.
12 Ndiyani angaziva kuposa kwaanoita?
Ndiregererenyivo pa zvishaishi zvandinoita ndicikazvizivi.
13 Ngwariranyi mushandiri kuti atame kuita zviito zvo kuzvikuja;Mucavasiya kuti vandinyise.
Ngo kudaro, ndinozova ndakagondeka,Ndicina ndava yo zvishaishi zvakawanda.
14 Masoko anovha pa muromo wangu no kurangarijisisa ko mwoyo wanguNgazvimudakajise imwimwi Jehovha, Buwe rangu no muponesi wangu.
