Nduyo 9:1-20
Ku mutungamiriri. Inobhuya ngo pamusoro pa Muti-rabheni.* Nduyo ya Dhavhidhi.
א [Arefi]
9 Jehovha inini ndinozomusimba ngo mwoyo wangu wese;Ndinozozivisa mabasa enyu ese anoshamaisa.
2 Ndinozotamba no kudakara ngo ndava yenyu;Ndinozoimba kuti ndisimbe zina renyu, imwimwi Mwari Mukuru-Kuru.
ב [Bheti]
3 Vavengi vangu vakazohwirira,Ivona vanozokhugunyika, vongara-ngara pamberi penyu.
4 Ngokuti imwimwi munoinikira kururama kwangu;Imwimwi makagara pa cigaro cenyu co umambo, mecitonga mu njira yakarurama.
ג [Gimeri]
5 Imwimwi makatuka majinja no kuparaja vandhu vanoita zviro zvakashata,Makaparaja mazina avo kwenda no kwenda.
6 Vavengi vakaparajwa* mukuperera;Makaparaja madhorobha avo,Apana anozobhuya ngo pamusoro pavo.
ה [He]
7 Asi Jehovha ari pa cigaro cake co umambo kwenda no kwenda,Iyena wakavangisa cigaro cake co umambo kuti atonge ngo ururami.
8 Iyena anozotonga nyika yese yo pasi ngo urungami;Iyena anozotonga majinja ngo ururami.
ו [Wau]
9 Jehovha anozova ndau yokutizira yakangwaririka ku vaya vanobzinyirihwa,Anozova ndau yokutizira yakangwaririka pa nguva yo dambujiko
10 Vaya vanoziva zina renyu vanozomuthemba;Jehovha, imwimwi amuzosiyi vaya vanomupsaka.
ז [Zayini]
11 Imbanyi ndumbo jokusimba Jehovha, uwo anogara mu Ziyoni;Zivisanyi mabasa ake pakati po vandhu.
12 Mwari aakanganwi vandhu vakatambujwa, iyena anozokhawisa vaya vakavauraya;Iyena anozoceukija kucema kwavo.
ח [Heti]
13 Jehovha, ndiitirenyivo unyasha; vonanyi kutambujika kwangu kuri kuviiswa nga vaya vanondinyenya,Imwimwi ndimwi munondimusa pa musuvo jo rufu,
14 Kuti ndizivise mabasa enyu anofanera kusimbhwa pa musuvo jo mwana wokaji wo Ziyoni,No kudakara ngo ndava yo mabasa enyu o ruponeso.
ט [Teti]
15 Majinja awira mugomba* ravakaca;Murenje javo jabathwa ngo murau javakateya.
16 Jehovha anozivika ngo kutonga kwake.
Vandhu vanoita zviro zvakashata vasungika ngo mabasa o nyara javo.
Higayoni.* (Sera)
י [Yodhi]
17 Vashaishi vanozohwirira sure voenda mu Guva,*Ndikona kunozoenda majinja ese anokanganwa Mwari.
18 Mwari aazokanganwi varombo;Vetero yo vandhu vakapfava aizoperi.
כ [Kafi]
19 Jehovha Mwari wangu mukanyi, mucatendera kuti mundhu amunyise.
Majinja ngaatongwe pamberi penyu.
20 Jehovha, vathyisijirenyiItanyi kuti majinja azive kuti ivona ndi vandhu vanofa. (Sera)
Masoko o Pasi
^ Vonanyi Kudurujihwa ko Magama.
^ Kana: “vakapejwa.”
^ Kana: “murindi.”
^ Vonanyi Kudurujihwa ko Magama.
^ Kana: “Sheori.” Kana kuti, kufa kunoita vandhu vese. Vonanyi Kudurujihwa ko Magama.
