Nduyo 97:1-12
97 Jehovha Waamambo!
Nyika ngaidakare.
Zvirundu zvakawanda ngazvidakare.
2 Makore no cidima cikuru zvakamutendeneja;Urungami no ururami ndizvona maambo o cigaro cake co umambo.
3 Muriro unoenda pamberi pakeWopisa vavengi vake mu mativi ese.
4 Mbheni jake jinovhenekera nyika;Nyika inozvivona yotetemera.
5 Matundhu anozonyunguruka inga namo pamberi pa Jehovha,Pamberi pa Mambo wo nyika yese.
6 Matenga anozivisa ururami hwake,Majinja ese anovona rukujo hwake.
7 Vese vanoshandira zvithombe zvakavezwa ngavanyowejwe,Ngavanyowejwe vese vaya vanozvikuja ngo ndava yo zvimwari zvavo zvicikashandi.
Zvimwari zvese ngazvimunamate.
8 Ziyoni rinozwa rodakara;Madhorobha o Judha akadakara,Ngo ndava yo matongero enyu imwimwi Jehovha.
9 Ngokuti imwimwi Jehovha muri Mukuru-Kuru pa nyika yese;Muri pacigaro cakakhwirira maningi ciri panyezuru po zvimwari zvimweni zvese.
10 Imwimwi munoda Jehovha, nyenyanyi zviro zvakashata.
Iyena anongwarira upenyu wa vaya vakagondeka;Ovaponesa mu nyara jo vandhu vakashata.
11 Ruvheneko unovhenekera vakarurama,Vaya vano mwoyo yakarungama vakadakara.
12 Imwimwi varurami dakaranyi kuna Jehovha,Simbanyi zina rake rakacena.
