Neemiya 6:1-19
6 Sanibharati, Tobhiya, Geshemi mu Arabhiya no vavengi vedu vamweni pavakavhunjwa kuti inini ndainga ndapeja kuvakisa mupfimbiji, nokuti painga pacinazve pamweni pakashama (pikija hazvo kuti pa mukuvowo inini ndainga ndicito ndadira musuvo pamanghwiniro),
2 ngo kukasika, Sanibharati na Geshemi vakanditumira masoko aya: “Viyai, ngatisongane ku mutundhu uri kumuterero ko Ono.” Zvokadi , ivona vainga vakaronga kundiitira zvakashata.
3 Ngo kudaro, ndakatuma ndhumwa kuti jiende kovavhunja kudari: “Ndakabatikana pa basa guru, andikwanisi kuza kondhoyo. Ndingasiya basa rakaima kuti ndiviye kuzosongana na imwimwi here?”
4 Ivona vakanditumira masoko aya vhaza murongomuna. Pa vhaza jese iji, inini ndakavapa mbhinduro imweyo.
5 Ngo kudaro, Sanibharati wakanditumirazve mubeseri wake no masoko ondhowo pa vhaza yo cishanu, ano karata yakashama iri munyara.
6 Iyona yaitahwa kudari: “Pakati po majinja pari kunangwa masoko, Geshemi anozvitenderavo kuti iwewe no Vajudha muri kuronga kupanduka. Ndizvona zviri kumuitisaro kuti muvakise mupfimbiji. Mukuzwirana no zviri kunangwa, iwewe unozova mambo wavo.
7 Kusiyapo izvi, iwewe wakagaja vaporofeti kuti vazivise mu dhorobha rese ro Jerusarema ngo pamusoro pako, veciti: ‘Mujudha muna mambo!’ Vonai, zviro izvi zvinozozika ndi mambo. Ngo kudaro, viyai tibhuisane ngo pamusoro pazvo.”
8 Waro inini ndakamudavira kudari: “Zviro zvauri kunangaro, azvizivi kumboitika. Iwewe uri kunanga zviro zvo mumusoro* mako.”
9 Vese vaieja kutithyisa vecinanga kudari: “Nyara javo jinozoremba kuvakisa mupfimbiji, iwona auzoperi kuvakwa.” Ngo kudaro, ndakaita mukumbiro kuna Mwari ndeciti: “Vangisanyi nyara jangu.”
10 Tevere ndakaenda ku nyumba ka Shemaya mwana wa Dheraya. Pa mukuvo wokuti iyena aacaibuda pa muzi. Dheraya wainga mwana wa Mehetabheri. Shemaya wakati: “Ngatipsake nguva kuti tisongane pa nyumba ya Mwari wo cokwadi, mukati mo themberi. Tofunga musuvo jo themberi, ngokuti vari kuviya kuzokuuraya. Ivona vanozoviya usiku huno kuzokuuraya.”
11 Asi inini ndakamupingura kudari: “Kureva kuti mundhu wakaita inga ndini anodikana kutiza here? Mundhu wakaita inga ndini anganghwina mu themberi opona? Inini andizonghwini!”
12 Ngo kudaro, ndakaziva kuti Mwari wainga acizivi kumutuma. Asi Tobhiya na Sanibharati vainga vakamutenga kuti averekete masoko aya o uporofeti kwandiri.
13 Iyena wainga akatengwa kuti andithyisijire no kundishaishisa. Ivona vaizowana thangwe ro kusvipisa zina rangu no kundipseruja.
14 Waro ndakaita mukumbiro ndeciti: “Mwari wangu, mucakanganwa zviito zvese zvakaithwa ndi Tobhiya na Sanibharati, no zvese zvakaithwa ndi Nowadhiya muporofetikaji pamwepo no vaporofeti vese vakaeja kundithyisijira vhaza jakawanda.”
15 Mupfimbiji wakapejwa kuvakwa ngo makumashanu o njiku no njiku mbiri. Mu njiku makumaviri na shanu yo mweji wa Eruri.*
16 Vavengi vedu novaziva zviro izvi, no majinja ese aiitendeneja ozvivona, vakanyowejeka maningi. Voziva kuti basa rese iri rakakwanisika ngo besero ra Mwari wedu.
17 Mu njiku jondhojo, vandhu vaireremejwa vo Judha vakatumira karata jakawanda maningi kuna Tobhiya, Tobhiya waivadavira.
18 Vajudha vazinji vainga vakapika kuti vaizova vakagondeka kwaari, ngokuti iyena wainga mukwambo wa Shekaniya. Shekaniya wainga mwana wa Arahi. Jehohanani mwana wa Tobhiya wainga akacadha no mwana wokaji wa Meshuramu. Meshuramu wainga mwana wa Bherekiya.
19 Kusiyapo izvi, mukuvo wese ivona vaibhuya zvakanaka kwandiri ngo pamusoro pake, no kumuvhunja zvandainanga. Ngo kudaro, Tobhiya wainditumira karata jokundithyisijira.
