Tito 3:1-15
3 Rambai wecivayeujira kuti vareremeje utongi no vaimiriri vaho, kuti vave vakanasiririka pa mabasa ese akanaka,
2 kuti vatame kubhuya zvakashata ku mundhu ari wese, vatame kuita mapope, asi vave vanozwisisa no vakapfava ku vandhu vese.
3 Ngokuti na itusuvo tainga tiri mapenji, aticaizwirepi, taipauswa, tainga varanda vo zvido zvakawanda no zvinodakajisa muviri, teciita zvakashata no cishatihwa, tainyenywa no kunyenyana ngo cedu.
4 Ngo kudaro, pohwakakhombijwa unyasha hwa Mwari Muponesi wedu pamwepo no rudo hwake ku vandhu
5 (kuciripi ngo pamusoro po mabasa o urungami atakaita, asi ngo ndava yo unyasha hwake), iyena wakatiponesa ngo kumwa yakativiisira* upenyu, no kutiita vapsa ngo mujimu mucena.
6 Iyena wakatidururira mujimu uwu ngo kuda* kwake ecishandisa Jesu Kristu Muponesi wedu,
7 kuti pasure po kutokoteswa kuti tiri varurami ngo pamusoro po unyasha hucikaezaniswi, taizova vagari vo utaka mu kuzwirana no upenyu hucikaperi hwatinoimira.
8 Masoko aya anothembeka, ndinoda kuti urambe wecikohomejera zviro izvi, kuti vaya vakatenda Mwari, varambe vecirangarira kuita mabasa akanaka. Zviro izvi zvakanaka, zvinobesera vandhu.
9 Asi ucadonghwinira mu shwiro jicina hwiru no ngano jo mubarihwana yo kare, kuphikizana, kupopana ngo ndava yo Mutemo, ngokuti azvishandi, ngo zvomahara.
10 Kudari mundhu akandhandhanisa jijiso jo kunyepa, iwewe womupangira* ko kutanga no ko cipiri asi wotama kuzwa, ucaita ushamwari naye,
11 zivai kuti mundhu wakadaro wabuda mugwanja, ari kushaisha no kujitonga ega.
12 Ndikakutumira Artema kana Tikiko, itai zviri zvese kuti uviye kuzondivona ku Nikopori, ngokuti ndiri kurangarira kugara kondhoyo mu mweji yo kutondhora.
13 Dongesai* ushoni Zena, anozivaya Mutemo, na Aporo, kuti vatame kukarairihwa ngo ciri cese pa hwendo hwavo.
14 Asi vandhu vedu ngavajijevo kuramba veciita mabasa akanaka, kuti vabesere pakamuka zvinodiwa ngo kukasika, kuti vatame kuita vacikabari mucero.
15 Vese vandinogara navo kuno, vari kukutambisa. Tambisai vaya vanotida mu rutendo.
Unyasha hucikaezaniswi ngahuve na imwimwi mwese.
Masoko o Pasi
^ Gama ngo Gama: “ngo kutisambija kwakativiisira.”
^ Kana: “kukova.”
^ Kana: “kumungwaja.”
^ Kana: “rongesai.”
