Varoma 9:1-33
9 Ndiri kubhuya cokwadi mukuzwirana na Kristu, andiripi kunyepa. Hana yangu inondiitira ucapupu mukuzwirana no mujimu mucena.
2 Ndakasuruvara maningi ndecihwajihwa mu mwoyo mwangu ndicikazorori.
3 Inini ndaida kuti ndiparajane na Kristu inga mundhu wakatukwa ngo ndava yo hama jangu no ukama hwangu hwo kunyama.
4 Ndivona Vaiziraeri, vana vakarehwa ndi Mwari, vano rukujo no citenderano, vakapuwa Mutemo no basa rakacena pomwe no zvigondiso.
5 Ivona vakavha ku majicekuru edu. Kristu wakavhavo kovari inga mundhu wokunyama. Mwari ari panyezuru po zvese, ngaakujwe mbhera narini. Ameni.
6 Ngo kudaro, izvi azvirevi kuti soko ra Mwari rakaposeka. Ngokuti asipi vese vakabahwa ngo Vaiziraeri vanonga vari “Vaiziraeri” kamare.
7 Asipi vese vo mbhuri ya Abhirahama vanozwi vana vake, ngokuti: “Wiya anozodanijwa mubarihwana wako,* anozobahwa ndi Izaki.”
8 Zvinoreva kuti vana vakabahwa ngo nyama asipi vana va Mwari kamare. Asi vana vo cigondiso, ndivona vana* va Abhirahama kamare mu mavonero a Mwari.
9 Ngokuti masoko o citenderano ainga okuti: “Inini ndinozoviya pa mukuvo uwu, Sara anozobara mwana.”
10 Izvi azvizivi kuitika pa mukuvo wondhowo basi, asi zvakaitikazve na Rebheka paakava no mimba wobara manyambiri no mwanarume umwe basi, Izaki cekuru wedu.
11 Pikija vainga vacito vabahwa, ivona avacaiita ciri cese cakanaka kana cakashata, kuti Mwari avhunje majibaba edu ngo pamusoro pa wiya waaizosana. Ngokuti Mwari anosana mundhu waanoda, kuciripi ngo mabasa.
12 Mwari wakamuvhunja kuti: “Wo mukuru anozoshandira wo mudoko.”
13 Inga kutahwa ko zvakaithwa kuti: “Ndakada Jakobe, asi ndakanyenya Ezau.”
14 Waro, tonangenyi? Mwari aatongi ngo njira yakarurama here? Hina, anotonga ngo njira yakarurama!
15 Mwari wakavhunja Mosi kuti: “Ndinozoitira usizi wandinoda kuitira usizi, ndozoitira pena wandinoda kuitira pena.”
16 Izvi azvifiri pa kuda ko mundhu kana kuvangisira kwake, asi zviri kuna Mwari ano usizi.
17 Matahwa anovhunja Faro kuti: “Inini ndakakuregera uri penye ngo pamusoro po thangwe iri: Rokutatija simba rangu ngo pamusoro pako kuti zina rangu rizivike pasi pese.”
18 Iyena anoitira usizi wiya waanoda no kuregera waanoda kuti atindivarise musoro wake.
19 Iwewe unozondivhunja kuti: “Ngenyi iyena aciri kupumbha vandhu? Ndiyani angaphikiza kuda kwake?”
20 Asi ndiwe ani iwewe mundhu kuti uphikizane na Mwari? Zvingaita kuti ciro cakaumbwa civhunje wakaciumbaro kuti: “Ngenyi wakandiita ngo njira iyi?”
21 Andiyepi muumbi anosimba rokuita zvaanoda no dongo kuti aumbe mushovo wese wo mbende kuti imwe inoshandiswa ngo njira inokujwa, imweni yoshandiswa ngo njira icikakujwi here?
22 Ndizvona zvondhozvo na Mwari. Iyena anoda kuvonesa ushungu hwake ku vandhu vakashata no kuvonesa simba rake. Pikija zvakadaro, iyena ari kusengerera ku vandhu vaakanyangajwa ndivona, vecifanera kuparajwa.
23 Iyena wakazviita kuti azivise kukura ko kukujwa kwake ku mujiyo yo usizi yaakanasirira kare kuti izokujwe,
24 kunangira itusu, vaakadanija pakati po Vajudha no po vomajinja.
25 Inga zvaakananga mu bhuku ra Hoseya kuti: “Vaya vaciripi vandhu vangu, ndinozovadanija kuti, ‘vandhu vangu,’ kuna wiya wainga acikadiwi, ndinozomudanija kuti, ‘mudiwa.’
26 Pa ndau yavakavhunjwa kuti, ‘Imwimwi amuripi vandhu vangu,’ pa ndau yondhoyo, vanozodanijwa kuti ‘vana va Mwari anopona.’”
27 Ngo kudaro, Isaya anodanija Iziraeri kuti: “Pikija Vaiziraeri vakawanda inga musanga wo mujombe, vashoma vavo, ndivona vanozoponeswa.
28 Jehovha* anozoita kuti vandhu vari panyika vajidavirire, ngo njira yakakwana acikanonoki.”
29 Isaya wakanangazve kuti: “Kudari Jehovha* wo hondo naacizivi kutisiira mubarihwana,* taizoita inga Sodhoma toezana no Gomora.”
30 Waro tonangenyi? Vandhu vo majinja ava pikija avacaitevera ururami, vakahuwana. Ururami uhu hunowanika ngo rutendo;
31 asi Vaiziraeri vaipsaka mutemo wo ururami. Ivona avazivi kuuwana.
32 Ngo ndava yenyi? Ngokuti avazivi kuupsaka ngo rutendo, asi vakaupsaka ngo mabasa. Ivona vakakhugunywa ngo “buwe rinokhugunya”;
33 ngo kuteveja zvainga zvakatahwa kuti: “Vonanyi! Ndiri kudira mu Ziyoni buwe rinokhugunya no kuwisa, wiya anoritenda aazonyangajwi.”
Masoko o Pasi
^ Gama ngo Gama: “mbeu yako.”
^ Gama ngo Gama: “mbeu.”
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Gama ngo Gama: “mbeu.”
