Munyika yatiri kuponari nyamasi uno, inonanga kuti zviro zvakanaka zvakashata no zvakashata kuti zvakanaka. (Is 5:20) Ngo kudaro, vandhu vazinji vanoita zviro zvinonyenywa ndi Jehovha, kubatanija zviro zvakashata zvinoithwa ngo mwanarume no mwanarume, mwanakaji no mwanakaji. Vadoni vo kucikora vangaeja kucengeja vana vo Cikristu kuti vateveje mugariro javo. Mungabeseresa kudini vana venyu kuti vahwisane no muejo jakadari iji?

Beseranyi vana venyu kuti vazive ndhungamiriro ja Jehovha. (Lv 18:3) Padoko ngo padoko jijisanyi vana venyu zvinonanga Bhaibheri ngo pamusoro po ruvatano. Munodikana kuvajijisa zviro mukuzwirana no mupira wavo no zvavanozwisisa. (Dt 6:7) Zvivhunjisenyi kudari: ‘Kureva kuti ndinojijisa vana vangu ngo pamusoro po kukhombijirana rudo ngo njira yakanaka? Ndinojijisa vana vangu ngo pamusoro po masimirire akanaka? Ndinojijisa vana vangu ngo pamusoro po kureremeja vandhu vamweni? Vana vangu vanoziva zvavanodikana kuita kudari ari wese akaeja kuvakhombija zvoumitu-mitu, kana kuvavhunja kuita zviro zvinonyenywa ndi Jehovha?’ Kunasa kuvajijisa kunovabesera kuti vatize zvineso zvakawanda. (Mazwi 27:12; Muc 7:12) Kudari mukajijisa vana venyu, munonga mecikhombija rudo kuno vana venyu vamakapuwa ndi Jehovha.—Ndu 127:3.

VONANYI VHIDHIYO INOTI VAKANYI NYUMBA YAKAVANGA—NGWARIRANYI VANA VENYU KU ‘ZVAKASHATA,’ PERAPO DAVIRANYI MUVHUNJO JINOTEVERA:

• Ngenyi vabari vamweni vanoita nyowa kujijisa vana ngo pamusoro po zvo ruvatano?

• Ngenyi vabari vanodikana kujijisa vana vavo ngo ‘Mupango wa Jehovha’?—Ef 6:4

• Sangano ra Jehovha riri kubudisenyi kuti ribesere vabari kuti vajijise vana vavo ngo pamusoro po zvo ruvatano?—w19.05 12, bhokiso

• Ngenyi munodikana kubhuya no vana venyu mukuvo wese vacito vasongana no zvineso?