Sauro wainga mugari wo Roma zve iyena wakabahwa ku Tarsu. Wainga muFarisi waiziva mutemo wo ciJudha zve wainyenya maKristu. Iyena waibvisa vanarume no vanakaji vo ciKristu mu nyumba mavo ecivadira mukadheya. Vandhu pavainga vecifura mujiji Stefano mbhera kufa, iyena waivasota.

Asi Sauro aacaidakara ngo kusunga maKristu o ku Jerusarema basi. Iyena wakakumbira mupiri mukuru kuti amutumire ku dhorobha ro Dhamasko kopsaka maKristu amweni. Sauro paainga ecikhwedera ku dhorobha ro Dhamasko, wakatendenejwa ngo ubenengeri zve wowa pasi. Iyena wakazwa izwi reciti: ‘Sauro, Sauro, unonditevererenyi?’ Sauro wakapingura kuti: ‘Ndimwi ani?’ Iyena wakazwa izwi reciti: ‘Ndini Jesu. Endai ku Dhamasko zve unozobvunjwa zvo kuita.’ Ngo civhumbu, Sauro wakava bofu, ngokudaro waidikana kubatwa mukono wonghwiniswa mu dhorobha.

Ku Dhamasko, kwainga no umwe muKristu waigondeka waidanijwa Anania. Jesu wakamubvunja ngo mu civoniso kuti: ‘Endai ku nyumba yo muJudha, ngo gwanja rinodanijwa Rakarungama, upsange Sauro.’ Anania wakati: ‘Tenji, Ndakazwa vandhu vazinji vecinanga ngo pamusoro po mundhu uu! Ecidira vajiji venyu mukadheya!’ Asi Jesu wakati: ‘Endai kwaari. Inini ndakheta Sauro kuti acumaire masoko akanaka kuno majija mazinji.’

Ngokudaro Anania wakawana Sauro, womubvunja kuti: ‘Sauro, hama, yangu, Jesu wandituma kuti ndikufunungure majiso ako.’ Sauro wakatanga kuvona. Iyena wakajija ngo pamusoro pa Jesu zve wakaita muteveri wake. Sauro naapera kubhabhatijwa, wakatanga kucumaera muma sinagoga no maKristu amweni. Amborangariranyi kukahamara kwakaita  vaJudha ngo kuvona Sauro ecicumaira vandhu ngo pamusoro pa Jesu? Ivona vakati: ‘Uu andiyepi mwanarume waipsakaya vajiji va Jesu?’

Pa makore matatu, Sauro waicumaera vandhu vaigara ku Dhamasko. Vamweni vaJudha vaizonda Sauro, ngo kudaro vakaita urongwa kuti vamuuraye. Asi hama pajakazwa zvondhozvo jakamubesera kuti atize. Ivona vakamudira mucitengu vomubudisa ngo pa mufimbiji wo dhorobha

Sauro paakaenda ku Jerusarema, wakaeja, kobatana no hama jimweni jainga kondhoyo. Asi ivona vaimuthya. Mujiji umweni waidaninjwa Bharnabha wakaenda naye kwainga no vapostori ovaita kuti vagonde kuti Sauro wainga wacinja. Sauro wakatanga kucumaera masoko akanaka ku Jerusarema ngo kuvangisira. Kuperepo, iyena wakazivika inga Pauro.