CIJIJO 8
Abhirahama na Sara Vakazwira Mwari
Phedo no Bhabheri kwainga no dhorobha rimweni raidanijwa Uri, kondhoyo kwainga no vandhu vainga vacikanamati Jehovha asi vainamata zvimwari zvimweni. Asi ku Uri kwainga no mwanarume umwe basi wainamata Jehovha. Zina rake ndi Abhirahama.
Jehovha wakati kuna Abhirahama: ‘Budai mu nyika yako, siyai ukama hwako; endai ku nyika yo ndinozokutatija.’ Perapo Mwari wakamugondisa kuti: ‘Ndinozokuita jinja guru, zve ndinozoita zviro zvaushoni ku vandhu vese pa nyika ngo ndava yako.’
Abhirahama aacaizviziva kuti Jehovha waizomutumira kwapi, asi iyena waithemba Jehovha. Ngo kudaro Abhirahama, na Sara mukaji wake, pomwe na Tera baba wake, na Roti mwana wo hama yake, vakatora zviro zvavo zve ngo kunasa kuzwira kamare, vakatanga hwendo hwavo.
Abhirahama wainga waano 75 o makore okubahwa iyena no mbhuri yake pavakaguma mu nyika yaida Jehovha kuti ivona vagare. Nyika iyi yaidanijwa kuti Kanani. Kondhoyo Mwari wakabvunja Abhirahama cigondiso ici: ‘Zvese zvauri kuvona zvakakutendeneja, ndicazozvipa vana vako.’ Asi Abhirahama na Sara avacaingepi no mwana umwe hake. Waro Jehovha waizoitisa kudini kuti cigondiso ici cive cokwadi?
“Ngo rutendo Abrahama wakapurukira . . . woenda ku nyika yaaizopuwa ndi Mwari, inga utaka. Wakafuruka ku nyika yake, acikabzizivi kwapi kwaaizoenda.”—Vaheberi 11:8
