Izaki wainga no 40 o makore paakacadha na Rebheka. Iyena wakamuda maningi. Mu kufamba ko nguva, ivona vakava no vana vaviri vorume vainga manyambiri.

Womukuru wakona wakadanijwa kuti Izau, umweni wakadanijwa Jakobe. Izau waidakarira maningi kutambira musora ecinyanga zvinyama zve waizvibata maningi. Asi Jakobe waidakarira maningi kugara pa muzi.

Mu njiku jiya, mwana wo mukuru waipuwa nyika zinji no mare pavanofa baba wake. Izvo zvaidanijwa kuti utaka. Mu mbhuri ya Izaki, utaka waibatanijavo divi ro zvigondiso zva Jehovha zvaainga wakaita kuna Abhirahama. Izau aacaidakarira zvigondiso zvondhozvo, asi Jakobe waiziva kuti izvona zvaisisira maningi.

Pa njiku imweni, Izau wakaguma ku muzi wakaremba maningi ecibva koopsaka zvinyama. Wakazwa kunuhira kwaushoni ko saja raibika Jakobe zve woti kwaari: ‘Ndiri kufa ngo njara! Ndipei zvauri kubikaro!’ Jakobe wakati: ‘Ndinozokupa, asi pakutanga ndigondesei kuti ungandipa utaka hwako.’ Izau wakati: ‘Andina basa ngo pamusoro po utaka hwangu! Ndinokupa. Ndinoda kuha basi.’ Unorangarira kuti i ciro cakanaka cakaitari Izau? Haiwa, asipi. Izau wakasveja kunja ciro cinosisira maningi kupinda zvokuha.

 Izaki paainga waamusharuka, yainga yakwana nguva yo kupa makomborero mwana wake mukuru. Asi Rebheka wakabesera Jakobe, uwo wainga mujaha, wakawana makomborero. Izau paakazviziva, iyena wakanyangajwa maningi zvokuti waida kuuraya hama yake. Izaki na Rebheka vaida kujivirira Jakobe, ngokudaro vakamubvunja kudari: ‘Ngatende zve ugare no hama ya mai wako, Rabhani, mbhera ushungu wa Izau upunguke.’ Jakobe wakazwira mbhangiro yo vabari vake zve wakaponesa upenyu hwake.