Jasefa wainga umwe wo mwana wo mudoko wa Jakobe. Hama jake jaingaya jaamadhodha jaivona Jasefa inga mwana waidiwa maningi ndi baba wavo. Unorangarira kuti ivona vaizwa kudini ngo pamusoro pazvo? Ivona vakaguma pakuva no ushanje na Jasefa. No papera nguva, Jasefa wakarota hope jinokahamajisa. Paakasumurira hama jake ngo pamusoro po hope jake, ivona vakazwisisa kuti njiku imweni vanozogwadama pambeji pake. Wari ivona vakamuzondazve kupinda kare!

Pa njiku imweni hama jake pojainga jiri kungwarira mabvuta phedo no dhorobha ro Shekemi. Jakobe wakatuma Jasefa kuti aende koovavona kuti vakadini. Paainga aciri ndhambo ivona vakavona Jasefa aciviya zve vakati umwe kuno umweni: ‘Ari kuviya muroti wo hope wiya. Vianyi timuuraye!’ Vakamubata zve vomukhandira mu mwimbo kana mudima rakajika. Asi Judha umwe wo hama yake, wakati: ‘Mucamuuraya! Ngatimutengese inga muranda.’ Vakamutengesa ngo 20 o macereni o sirivha ku vaiti vo nyagoso vaMidhiani avo vari kwenda Ejipita.

Perapo, vakauraya mbhuji votora nguvo yake voibija mu ngazi, voendesa nguvo yake kuna baba wavo, voti: ‘Asipi nguvo yo mwana wenyu iyi?’ Ngokudaro Jakobe wairangarira kuti cinyama ciri cese co musora cainga cauraya Jasefa. Wakamuka kukhuvazika mwoyo. Apana waikwanisa kumunyaraja.

Mu Ejipita, Jasefa wainga muranda anosisira maningi ku mukuru waidanijwa Potifari. Asi Jehovha wainga na Jasefa. Potifari wakavona kuti Jasefa wainga wakanaka maningi pa basa rake zve waigondeka kwaari. Ngo kukasika Potifari wakamugaja kuti angwarire zvese zvake.

Mukaji wa Potifari wakavona kuti Jasefa wainga wakaseja maningi zve wakavanga. Njiku no njiku waikumbira kuti Jasefa avate naye. Jasefa  wakaitenyi? Iyena wakaramba zve wakati: ‘Andidi! Izvo zvakashata. Patarau wangu vanodigonda, zve imwimwi muri mukaji wake. Kudari ndikavatana nemwi, ndinozoshaishira Mwari wangu!’

Pa njiku imweni mukaji wa Potifari wakaeja kuvangirija Jasefa kuti avatane naye. Wakamubata ngo nguvo yake, asi iyena wakatiza. Potifari paakaahwirira ku muzi, kusiapo kumuverengera cokwadi, iyena wakananga kuti Jasefa waeja kuvatana neni. Potifari wakanyangajwa maningi zve wakanghwinisa Jasefa mukadheya. Asi Jehovha aazivi kukanganwa Jasefa.