Vandhu vainga ku Ninivha ku dhorobha ro Asiriya, vainga vakashata maningi. Jehovha wakabvunja muporofita Jona kuti aende koovangwaja kuti vanodikana kusiya zviro zvakashata zvavaita. Asi Jona wakatiza woenda ku divi rimweni rakasiana. Iyena wakakhwira piketi woenda ku Tashishi ndhambo no Ninivha.

Piketi payainga mu jombe, kwakatanga kuita dutu rakavanga maningi zvo kuti vafambisi vo piketi vakatanga kuthya. Ivona vakaitira mukumbiro ku zvimwari zvavo, veciti: ‘Icinyi ciri kuitisa khombo iri?’ Jona wakavabvunja kuti: ‘Ndini ndiri kuitisari izvi. Ndiri kutiza basa rondakabvunjwa ndi Jehovha kuti ndiriite. Ndikhandirenyi mu jombe zve dutu iri ricaima kwamuri.’ Vafambisi vo piketi avacaidepi kumukhandira mu jombe, asi Jona wakaramba ecivabvunja kuti vamukhandire. Pavakamukhandira mu jombe, dutu rakaima.

Jona wairangarira kuti wainga wafa kamare. Painga ecindondomera mu jombe, wakaita mukumbiro kuna Jehovha. Pa nguva yondhoyo Jehovha wakatumira hove huru. Iyona yakamija Jona, asi aazivi kufa. Mu ndani mo hove, Jona wakaita mukumbiro eciti: ‘Ndinogondesa kukuteverera mukuvo wese.’ Jehovha wakangwarira Jona pa muzuva matatu akagara mundani mo hove, perapo iyona yakamuruca pa murambo pakaoma.

Kudari Jehovha wakaponesa Jona, zvinoda kureva kuti aacaidikanazve kuenda Ninivha here? Andizopi. Jehovha wakabvunjazve Jona kuti ahwirirezve kondhoyo. Pa nguva iyi, Jona anoteverera. Iyena wakaenda kondhoyo  zve wakabvunja vandhu vaya vakashata kuti: ‘Ku 40 wo dhiya, Ninivha inozoparajwa.’ Kubvira apo kwakaitika ciro cicikavetehwi, vandhu vo Ninivha vakazwira zve vocinja maitiro avo. Mambo wo ku Ninivha wakabvunja vandhu vake kuti: ‘Ndanijiranyi Mwari ngo simba zve tendeukanyi. Dangani iyena aazotiparaji.’ Jehovha paakavona kuti vandhu vatendeuka, aazivi kuparaja Ninivha.

Jona wakacamwa ngo kuti dhorobha arizivi kuparajwa. Amborangariranyi izvi: ‘Jehovha wakava anosengerera zve ano usizi kuna Jona, asi Jona aazivi kuzwira usizi vandhu vo Ninivha. Kunja ko izvo, wakabuda mu dhorobha no hope yakacamwa zve woenda kogara pasi po muti waidanwa mucunge.’ Mucunge wakona wakafa zve Jona wakanyangajwa maningi. Ngokudaro Jehovha wakamubvunja kuti: ‘Uri kuitira usizi muti uu kupinda vaNinivha. Ndakavazwira usizi ndizvo andizivi kuvaparaja.’ Ngenyi Jehovha wakamubvunja kudaro? Ngokuti vandhu vo Ninivha vaisisira maningi kupinda muti.