1. Ngo capi cidisiso ca Mwari no pasi pano?

CIDISISO ca Mwari no pasi pano cinoshamaisadi kamare. Jehovha anoda kuti pasi pano pazare ngo vandhu vakadakara zve vano uhomi hwakanaka. Bhaibheri rinonanga kuti: “Mwari wakasima munda mu Edeni” zve iyena “wakakurisa mufumbo wese wo miti yakaseja inonakira kuhiwa.” Mwari paakapera kurura mwanarume no mwanakaji wo kutanga, Adhamu na Evha, iyena wakavadira mu muzi wakaseja zve ovabvunja kuti: “Barananyi muwande. Muzaje nyika, muitonge.” (Genesi 1:28; 2:8, 9, 15) Ngo kudaro cidisiso ca Mwari cainga co kuti vandhu vave no vana, vakurise muzi wavo wo paradhiso pasi pano, pomwe no kungwarira zvinyama.

2. (a) Tinozvizivisa kudini kuti cidisiso ca Mwari no pasi pano cinozokwanirisika? (b) Bhaibheri rinonangenyi ngo pamusoro po kurarama ko vandhu mbhera narini?

² Munorangarira kuti cidisiso ca Jehovha Mwari co kuti vandhu vararame kwenda no kwenda pasi pano mu paradhiso cinozoitika here? Mwari wakati: “Ndakabzinanga, ndinozobziita.” (Isaia 46:9-11; 55:11) Hina, zvokadi kamare Mwari anozoita cidisiso cake! Iyena wakananga kuti “aazivi kuirura inga bzipare” asi “ngo kusiana wakairura kuti igariwe.” (Isaia 45:18) Mwari waida vandhu vakadini kuti vararame mu nyika ino? Zve waida kuti vararame nguva yakadini? Bhaibheri rinopingura kuti: ‘Varurami vanozoita  veno vo nyika, vanozogaremo mbhera narini.’—Nduyo 37:29; Apokalipsi 21:3, 4.

3. Ngo api matambujiko ari pasi pano, zve izvi zvinomusa mubvunjo japi?

³ Zviri pambhene, kuti izvi azvito zvaitika. Vandhu wari vari kuhwaja no kufa, ivona vanotakana no kuurayana. Ciripo cakaposeka. Zvokadi, Mwari wainga acina cidisiso co kuti pasi pano pave inga zvatiri kuvonari nyamasi uno! Cicinyi cakaitika? Ngenyi cidisiso ca Mwari acizivi kuitika? Akuna bhuku ro ndhorovondho rakatahwa ngo mundhu ringakwanisa kutibvunja ngo ndava yo zvineso, ngo kuti zvakatangira mudenga.

4, 5. (a) Zvokadi ndiani kamare wakavereketa na Evha ecishandisa nyoka? (b) Zvingaitisa kudini kuti mundhu wakanaka, wakagondeka woguma pakuva mbavha?

⁴ Bhuku ro kutanga ro Bhaibheri rinotibvunja ngo pamusoro po muvengi umwe wa Mwari uwo wakavoneka mu munda wo Edheni. Iyena anosananguhwa inga “nyoka,” asi iyena aacaingepi cinyamavo haco. Bhuku ro kupejisira ro Bhaibheri rinokhombija inga ndi uwo anozwi “Diabu nokuti Sathana, mucengeji wo nyika jese jo pasi pano.” Iyena anodanijwavo kuti “nyoka yokutanga.” (Genesi 3:1; Apokalipsi 12:9) Ngirozi iyi ino simba, kana cisikwa ici co kumujimu, yakashandisa nyoka kuti ibhuye na Evha. Iyona yakaita kuti izwi rayo rizike inga riri kubva kunyoka. Azvikanakanwi kuti mundhu uwu wo kumujimu wainga aripo Mwari paakanasirira pasi pano kuitira vandhu.—Jobe 38:4, 7.

⁵ Zvecivoneka kuti zvisikwa zvese zva Jehovha zvakaperera, ndiani wakarura “Dhiabhu,” “Sathana”? Ngo magama akareruka, umwe wo vana vokumujimu vano simba va Mwari wakajicinja ega wova Dhiabhu. Izvi zvakaitisa kudini? Nyamasi uno mundhu wakanaka zve wakagondeka, angaguma pakuva mbavha. Zvingaitisa kudini? Mundhuwo angatendera  kuti cidisiso cakashata cirambe cecikura mu mwoyo mwake. Kudari akandoramba acindozvirangarira, icona cingatoguma pakukura. Perepo, kudari akava no mukana, angatociita cidisiso cokushata ciani caaingaya ecirangarira.—Verenganyi Jakobo 1:13-15.

6. Zvakaitisa kudini kuti mwana wo kumujimu ano simba wa Mwari agume pakuva Sathana Dhiabhu?

⁶ Izvi ngo zvakaitika kuna Sathana Dhiabhu. Zvinoita inga kuti iyena wakazwa Mwari ecibvunja Adhamu na Evha kuti vaidikana kubara vana vazaje nyika ngo mubarihwana wavo. (Genesi 1:27, 28) Zvinovoneka kuti wakarangarira kudari: ‘Hino, vandhu vese ava vaizonamata inini kusiapo kunamata Mwari!’ Ngo kudaro cidisiso cakashata cainga cecikura mu mwoyo mwake. Pakupejisira, iyena wakacengeja Evha ngo kumubvunja manyepo ngo pamusoro pa Mwari. (Verenganyi Genesi 3:1-5.) Ngo kudaro iyena wakaguma pa kuva “Dhiabhu,” zvinoreva “Murevi.” Pa nguva imweyo, wova “Sathana,” zvinoti “Muphikizi.”

7. (a) Ngenyi Adhamu na Evha vakafa? (b) Ngenyi mubarihwana wese wa Adhamu unoita ukarahwa perepo wofa?

⁷ Ngo kushandisa manyepo no kucengejera, Sathana Dhiabhu wakaitisa kuti Adhamu na Evha vatame kuzwira Mwari. (Genesi 2:17; 3:6) Inga muvio, ivona vakazopejisira ngo kufa, inga zvainga zvakananga Mwari kuti vaizofa kudari vakatama kuzwira. (Genesi 3:17-19) Zvecivoneka kuti Adhamu wakava acizivi kukwana paakashaisha, mubarihwana wake wese wakagara utaka wo cishaishi cake. (Verenganyi VaRoma 5:12.) Mugariro uwo, ungaezanisihwa no ciumbiro co kuita pau cakabofoka. Kudari ciumbiro cakabofoka, zvicinyi zvaizoitika no pau jinoumbihwemo? Pau imwe nga imwe yaizova yakabofoka kana kuti icizivi kukwana. Mukuezana, mundhu umwe nga umwe wakatora utaka wo “kubofoka” ko kutama kukwana kwa Adhamu. Ngo iyo ndava vandhu vanoita ukarahwa perapo vofa.—VaRoma 3:23.

8, 9. (a) Zvokadi Sathana wakaphikizenyi kamare? (b) Ngenyi Mwari aazivi kuuraya vapanduki ciriporipoco?

 ⁸ Sathana paakaitisa kuti Adhamu na Evha vashaishire Mwari, zvokadi iyena wainga ecitungamirira pa kupandukira. Iyena waiphikiza matongere a Jehovha. Zvokadi Sathana waida kunanga kuti: ‘Mwari i mutongi wakashata. Iyena anovigira zvakanaka ku vatongwi vake. Vandhu avana dikano  yo kutongwa ndi Mwari. Ivona vangaita vega zvisungo ngo pamusoro po zvakanaka no zvakashata. Zve ivona vacazobudirira kudari vakatongwa ndini.’ Mwari waizoita kudini no mapumbhihwe aya anotuka? Vamweni vanovona kuti Mwari waitodikana basi kuuraya vapanduki ava. Asi, izvo zvaizopa mupinguro wo kuphikiza kwa Sathana here? Zvaizopa ucapupu wo kuti matongero a Mwari akarungama here?

⁹ Mazwiro akakwana o urungami a Jehovha aacaizomutenderepi kuuraya vapanduki ciriporipoco. Iyena wakasunga nguva yaidika kudavira kuphikiza kwa Sathana mu maitiro anozwirana zve anopa ucapupu wo kuti Dhiabhu munyepi. Ngo kudaro Mwari wakasunga kuti iyena waizotendera kuti vandhu vajitonge vega pasi po kukwevejehwa ndi Sathana. Zvakaitisa kuti Jehovha aite izvo no kusia kuti pakhirire nguva yakareba acito akagajikisa shwiro iji, zvicazobhuiwa pa Cipauko co 11 co bhuku iri. Asi wari, zvaushoni kurangarira kudari: Adhamu na Evha vainga vakarungama here pavakathemba Sathana, uwo acizivi kumbovaitira ciri cese cakanaka? Zvakava zvakarungama kovari kutenda kuti Jehovha, uwo wainga wakavapa zviro zvese zvavainga nazvo, wakaoma mwoyo zve munyepi here? Zvicinyi zvamaizoita?

10. Mungabesera kudini divi ra Jehovha mu kudavira kuphikiza ka Sathana?

¹⁰ Zvakanaka kurangarira ngo pamusoro po mubvunjo iji ngo kuti umwe nga umwe wedu ari kusotana no shwiro iji nyamasi uno. Hina, imwimwi muno mukana wo kubesera divi ra Jehovha mukupingura kuphikiza kwa Sathana. Imwimwi mungatendera kuti Jehovha ave Mutongi wenyu zve mokhombija kuti Sathana ndi munyepi. (Nduyo 73:28; verenganyi Mazwi Akangwara 27:11.) Zvinosuruvaja ngo zvokuti pakati po mabhiriau o vandhu mu nyika ino, vashoma basi ngo vari kusana kubesera Jehovha. Izvi zvinomusa mubvunjo unosisira maningi wo kuti: Bhaibheri rinojijisadi kamare kuti Sathana ndi mutongi wo nyika ino here?

11, 12. (a) Muejo wakasongana na Jesu wakakhombijisa kudini kuti Sathana i mutongi wo nyika ino? (b) Ngo zvapi zvimweni zvinopa ucapupu wo kuti Sathana ndi mutongi wo nyika?

¹¹ Jesu aazivi kumbokakanija kuti Sathana ndi mutongi wo nyika ino. Ngo mushamaiso munganani, vhaza imweni Sathana wakakhombija Jesu“umambo hwese hwo nyika no goja rahwo.” Perepo Sathana wakagondisa Jesu kuti: “Ndinozokupa bzese ibzi kudari ukagwadama wondiromberera.” (Mateu 4:8, 9; Luka 4:5, 6) Amborangariranyi basi: Sathana waizoeja Jesu ngo cipo ici kudari iyena aacaingepi mutongi wo umambo hwese uhu here? Jesu aazivi kumboramba kuti mautongi ese aya o mu nyika ino ainga a Sathana. Zvokadi, Jesu waizoramba kudari Sathana aacaingepi simba riri ngo sure ko mautongi ese aya.

¹² Zvokadi kuti, Jehovha ndi Mwari wo masimba ese, Marure wo zvese zvinoshamaisa. (Apokalipsi 4:11) Asi, apana pari pese mu Bhaibheri panombonanga hapo kuti Jehovha kana kuti Jesu Kristu i mutongi wo nyika ino. Zvokadi, Jesu wakanangira Sathana kamare inga “mambo wo nyika.” (Johani 12:31; 14:30; 16:11) Bhaibheri rinotonangiravo Sathana Dhiabhu inga mwari wo “pasi pano.” (2 VaKorinto 4:3, 4) Ngo pamusoro po muphikizi uwo, kana Sathana, Johani mupostori wo ciKrisu, wakatara kuti:“Nyika yese iri mu nyara ja Sathana.”—1 Johani 5:19.

13. Ngenyi kuri kudikana nyika imbza?

¹³ Gore ngo gore, kushata ko nyika kuri kuramba kweciengejeka. Iyona yakazara ngo masoca o hondo, vo zvo matongehwe o nyika vacizivi kugondeka, vatungamiriri vo zviara vacengejeri no maphanga acikapingiki. Nyika yese kamare aicacinjiki. Bhaibheri rinokhombija kuti yaaphedo nguva yo kuti Mwari apeje nyika ino yakashata pa hondo yake yo Armagedhoni. Izvi zvicazofunungura gwanja kuitira nyika imbza yakarungama.—Apokalipsi 16:14-16.

14. Mwari wakasana aani kuti ave Mutongi wo Umambo Hwake, zve zvainga zvakanangiswa kudini?

 ¹⁴ Jehovha Mwari wakasana Jesu Kristu kuti ave Mutongi wo Umambo kana utongi Wake wo Mugore. Bhaibheri rakananga kare kuti: “Ngokuti takabarihwa mwana, takapuwa mwana. Iyena wakaaxira utongi panyezuru po mapfuji ake, wopuwa zina rokuti: . . . [‘Muzvare,’ BMAA] wo kunyarara; kutonga kwake kunozoita kukuru, kunyarara akuzoperi.” (Isaia 9:5, 6) No kuda ko utongi uhu, Jesu wakajijisa vateveri vake kuti vaite mukumbiro kudari: “Umambo hwenyu ngahuze kwedu, kuda kwenyu ngakuitwe pasi pano inga nyezuru.” (Mateu 6:10) Inga zvaticazovona mu bhuku iri, Umambo hwa Mwari sambi-sambi hucazobvisa mautongi ese o nyika ino, zve iwona kamare ucazomafakea. (Verenganyi Danieli 2:44.) Perepo Umambo hwa Mwari hucazoita kuti pasi pano pave paradhiso.

15. I cinyi “pasi papsa”?

¹⁵ Bhaibheri rinotigondesa kuti: “Tinovetera gore ripsa no [“pasi papsa,” NM] po hunogara” urungami. (2 Pedru 3:13; Isaia 65:17) Nguva jimweni Bhaibheri rikananga kuti “pasi,” riri kuda kunangira vandhu avo vanorarama pasi pano. (Genesi 11:1) Ngo kudaro “pasi papsa” po urungami i vandhu vanodavirika kuna Mwari.

16. Ngo capi cipo cicikapimiki cinobva kuna Mwari kuno vayani vaanotendera, zve zvicinyi zvatinodikana kuita kuti ticiashire?

¹⁶ Jesu wakagondesa kuti mu nyika imbza iri kuviari, vaya vanodavirika kuna Mwari vanozoashira cipo co “kurarama kucingaperi.” (Marco 10:30) Tapota fununguranyi Bhaibheri renyu pana Johani 3:16 no 17:3, kuti muverenge zvakananga Jesu zvatinodikana kuita kuti tiaashire upenyu ucikaperi. Wari, vonanyi makomborero ari mu Bhaibheri anozobuswa nga vaya vanokwanirisa kuti vaashire cipo cinoshamaisa cinobva kuna Mwari co kunghwina mu Paradhiso pasi pano.

17, 18. Tingava kudini no gwinyiso ro kuti kucazova no runyararo no rugarisiko pasi pese?

 ¹⁷ Ushati, hondo, kuphuka mutemo, zve no ugevenga zvicazopera. “Akuzovibze no muxati; . . . asi varombo vanozoita veno vo nyika, vanozodakara ngo kunyarara kwakaperera.” (Nduyo 37:10, 11) Runyararo ucazowanika ngo kuti Mwari ‘anozopeja hondo mbhera ku magumo o nyika.’ (Nduyo 46:10; Isaia 2:4) Pondhopo ‘ururami hunozotumbuka inga ruva, kunozowanika runyararo mbhera narini’!—Nduyo 72:7.

¹⁸ Vanamati va Jehovha vacazorarama mu rugarisiko. Mu nguva jo Bhaibheri vaIziraeri pavaizwira Mwari, vairarama mu rugarisiko. (VaLevi 25:18, 19) Kudakajisa kwakadini kunozoveo ngo kubusa rugarisiko wakadari mu Paradhiso!—Verenganyi Isaia 32:18; Mikeya 4:4.

19. Ngenyi tinoziva kuti zvokuha zvinozowanda munyika impsa ya Mwari?

¹⁹ Akucazovizve no njara. Muimbi wo nduyo wakati: ‘Munda inozobara mbeu jakawanda. Musonjoti inozozungunyika panyezuru po matundhu.’ (Nduyo 72:16) Jehovha Mwari anozokomborera vandhu vake vakarurama, zve pasi ‘panozobara mucero.’—Nduyo 67:7.

20. Ngenyi tingava no gwinyiso ro kuti pasi pese pacazoguma pa kuva Paradhiso?

²⁰ Pasi pese panozova paradhiso. Nyumba imbza jakaseja no munda jo maruva zvicazova mu nyika yainga yakamboparajwa ngo vandhu vakashata. (Verenganyi Isaia 65:21-24; Apokalipsi 11:18) Pakufamba ko nguva, mativi o pasi pano anonga ecivonerehwa acazotambarajwa mbhera pasi pese pave pakaseja no panoibva inga munda wo Edheni. Zve Mwari aazomboposi ‘kufunungura nyara jake, wogutisa bzese bzinorarama.’—Nduyo 145:16.

21. Zvicinyi zvinotatija kuti kunozova no runyararo pakati po zvinyama no vandhu?

²¹ Kucazova no runyararo pakati po vandhu no zvinyama. Zvinyama zvo musora no zvo pamuzi zvicazohava pamwepo. Pikija mwana mudoko aacazothyi zvinyama zvinothyisa nyamasi uno.—Verenganyi Isaia 11:6-9; 65:25.

22. Zvicinyi zvicazoitika kuno ndhendha?

 ²² Ndhendha jicazongara-ngara. Inga Mutongi wo Umambo wa Mwari wo mugore, Jesu acazorapa zvinopinda kamare zvaakaita paainga ari pasi pano. (Mateu 9:35; Marco 1:40-42; Johani 5:5-9) Pa nguva iyo, “apana na umwe wo vagari vo guta angazonanga kuti: ‘Ndiri kuhwaja’.”—Isaia 33:24; 35:5, 6.

23. Ngenyi kumuswa ko vakafa kunozodakajisa mwoyo jedu?

²³ Vadiwa vakafa vacahwirijwazve ku upenyu no vetero yo kuzotama kufazve. Vese vakavata mu rufu, avo vari mu murangariro wa Mwari, vacazohwirijwazve ku upenyu. Zvokadi, “kunozowanika kumuka ko vakafa: vanasi no vacikanasi.”—Maitiro o Vapostori 24:15; verenganyi Johani 5:28, 29.

24. Munozwa kudini ngo pamusoro po kurarama mu Paradhiso pasi pano?

²⁴ Kumbeji kwakadini kunoshamaisa kuri kuvetehwa ngo vaya vanosana kujijira ngo pamusoro pa Marure wedu Mukuru-kuru, Jehovha Mwari, no kumushandira! Jesu wainga ecinangira Paradhiso iri kuviari pasi pano paakagondisa mushaishi wakafiraya pamutivi pake kuti: ‘Ucazova na inini mu Paradhiso.’ (Luka 23:43, Tradução do Novo Mundo) Zvinodikana maningi kuti tijijire zvizinji ngo pamusoro pa Jesu Kristu, uwo anozoshandiswa kuitira kuti kuwanike makomborero ese awo.